កម្ពុជាក្នុងនាមជាប្រធានអាស៊ាន នៅថ្ងៃនេះបានរៀបចំកិច្ចប្រជុំរដ្ឋមន្ត្រីការពារជាតិអាស៊ាន ដោយពិភាក្សាលើការអភិវឌ្ឍថ្មីៗ នៅក្នុងអាស៊ាន។ អ្វីដែលគួរឲ្យកត់សម្គាល់ គឺកិច្ចប្រជុំរដ្ឋមន្រ្តីការពារជាតិ ដែលកម្ពុជារៀបចំនាពេលនេះ មានការចូលរួមដោយផ្ទាល់ពីសំណាក់រដ្ឋមន្ត្រីការពារជាតិរបបសឹកភូមា ដែលអាស៊ានតែងតែផាត់ចោល ពីកិច្ចប្រជុំកន្លងមក។
ជារឿងមួយថ្មី ដែលកម្ពុជានិងបណ្តាប្រទេសសមាជិកអាស៊ានទាំង៨ផ្សេងទៀត បានអនុញ្ញាត្តឲ្យរដ្ឋមន្ត្រីការពារជាតិ នៃរបបសឹកភូមា បានចូលរួមកិច្ចប្រជុំ ខណៈដែលកន្លងមក អាស៊ានតែងតែផាត់ចោលភូមាចេញពីកិច្ចប្រជុំកំពូល ព្រោះមិនមានការជំរុញវឌ្ឍនភាពលើសេចក្តីសម្រេចជាឯកច្ឆ័នទាំង៥ចំណុច ដែលអាស៊ានបានដាក់ចេញកាលពីខែតុលា ឆ្នាំ២០២១កន្លងទៅ។
ជាកិច្ចប្រជុំរដ្ឋមន្ត្រីការពារជាតិអាស៊ានលើកទី១៦នាពេលនេះ របបសឹកភូមាបានចូលរួមប្រជុំដោយផ្ទាល់ ដោយមានគណៈប្រតិភូចំនួន៨នាក់ ដែលដឹកនាំដោយ នាយឧត្តមសេនីយ៍ យ៉ា ទុន អូ (Mya Tun Oo) រដ្ឋមន្ត្រីការពារជាតិនៃរបបសឹកភូមា។ នេះបើតាមការបញ្ជាក់របស់នាយឧត្តមសេនីយ៍ ណឹម សុវត្ថិ អគ្គនាយកនៃអគ្គនាយកដ្ឋាននយោបាយ និងកិច្ចការបរទេស ក្រសួងការពារជាតិ។
គួរបញ្ជាក់ថា ក្នុងនាមជាប្រធានអាស៊ាននៅឆ្នាំនេះ កម្ពុជាបានរៀបចំកិច្ចប្រជុំថ្នាក់ដឹកនាំអាស៊ានដោយផ្ទាល់ ចំនួន២ដងរួចមកហើយ គឺកិច្ចប្រជុំថ្នាក់រដ្ឋមន្ត្រីការបរទេសកាលពីខែកុម្ភៈ និងកិច្ចប្រជុំថ្នាក់រដ្ឋមន្ត្រីការពារជាតិ ដែលធ្វើឡើងនាពេលនេះ ខណៈដែលកិច្ចប្រជុំកំពូលអាស៊ាន នឹងធ្វើឡើងនៅចុងឆ្នាំ២០២២។ ជាប្រធានអាស៊ាននៅឆ្នាំនេះ កម្ពុជាបានជំរុញរបបសឹកភូមា ធ្វើយ៉ាងអនុវត្តឲ្យបាននូវកិច្ចព្រមព្រៀងជាឯកច្ឆ័នទាំង៥ចំណុច ក្រោយតែរបបសឹករបស់នាយឧត្តមសេនីយ៍ មីន អ៊ុងឡាំង បានធ្វើរដ្ឋប្រហារ កាលពីខែកុម្ភៈឆ្នាំ២០២១៕
