(ភ្នំពេញ)៖ ប្រទេសកម្ពុជាបាននាំចេញទំនិញទៅទីផ្សារជប៉ុនក្នុងទឹកប្រាក់ជិត ៦៦៨ លានដុល្លារក្នុងរយៈពេល ៧ ខែ ឆ្នាំ ២០២២ កើនជិត ១២ ភាគរយបើធៀបនឹងរយៈពេលដូចគ្នាឆ្នាំ ២០២១ ខណៈទំហំពាណិជ្ជកម្មទ្វេភាគីប្រទេសទាំង ២ កើនដល់ជាង ១,១ ពាន់លានដុល្លារ។ នេះបើយោងតាមអគ្គនាយកដ្ឋានគយ និងរដ្ឋាករកម្ពុជា។
ស្ថិតិជញ្ជីងពាណិជ្ជកម្មទំនិញជាមួយប្រទេសសំខាន់ៗ របស់អគ្គនាយកដ្ឋានគយ និងរដ្ឋាករកម្ពុជា បានបង្ហាញថា ចន្លោះពីខែមករា-ខែកក្កដា ឆ្នាំ ២០២២ ការនាំទំនិញពីកម្ពុជាទៅទីផ្សារជប៉ុនមានទឹកប្រាក់ ៦៦៧,៩២ លានដុល្លារ កើនឡើង ១១,៧ ភាគរយបើធៀបរយៈពេលដូចគ្នាឆ្នាំ ២០២១ ដែលមានចំនួនជាង ៥៩៧,៧១ លានដុល្លារ។ ចំណែកទំនិញនាំមកពីប្រទេសជប៉ុន មាន ៤៦៩,៦០ លានដុល្លារ កើន ២៣,១ ភាគរយ ពីចំនួន ៣៨១,៤ លានដុល្លារ។
យោងតាមស្ថិតិខាងលើទឹកប្រាក់សរុបការធ្វើពាណិជ្កម្មរវាងប្រទេសទាំង ២ មានចំនួន ១ ១៣៧,៥២ លានដុល្លារកើនពីចំនួន ៩៧៩,១១ លានដុល្លារ ឬស្មើនឹង ១៦,២ ភាគរយបើធៀបនឹងរយៈពេល ៧ ខែឆ្នាំ ២០២១។
ទំនិញសំខាន់ៗដែលកម្ពុជានាំទៅទីផ្សារជប៉ុន មានដូចជា សម្លៀកបំពាក់ ស្បែកជើង គ្រឿងបង្គុំ និងកសិផល ចំណែកជប៉ុននាំចូលមកកម្ពុជាវិញមាន ផលិតផលគ្រឿងម៉ាស៊ីន រថយន្ត គ្រឿងអេឡិចត្រូនិក និងគ្រឿងចក្រសម្រាប់វិស័យកសិកម្មជាដើម។
លោក ហុង វណ្ណៈ អ្នកសេដ្ឋកិច្ចនៃរាជបណ្ឌិត្យសភាកម្ពុជា បានប្រាប់ថា ក្នុងថ្ងៃទី ១៨ ខែសីហាថា កំណើននៃការវិនិយោគនៅកម្ពុជាពីសំណាក់វិនិយោគិនក្នុងស្រុក និងបរទេស បានជួយធ្វើឱ្យផលិតផលកម្ពុជាកាន់តែច្រើនបង្ហាញវត្តមានក្នុងទីផ្សារជប៉ុន ពិសេសផលិតផលកសិកម្ម និងវាយនភណ្ឌ។
លោកបន្ថែមថា ការនាំចេញទំនិញពីកម្ពុជាទៅជប៉ុនត្រូវគេមើលឃើញថា គឺជាចំណែកសំខាន់មួយនៃការនាំចំណូលមកកម្ពុជា ដោយចំនួនទឹកប្រាក់ដែលកម្ពុជានាំទៅជប៉ុន គឺស្មើនឹងជិត ៥ ភាគរយនៃការនាំចេញសរុបក្នុងរយៈពេល ៧ ខែដើមឆ្នាំ។ ទន្ទឹមនឹងនេះការនាំទំនិញពីជប៉ុនមកកម្ពុជា ក៏កើនឡើងគួរឱ្យកត់សម្គាល់ដែរ។
លោកបញ្ជាក់ថា ក្រៅពីមានទំនាក់ទំនងល្អជាលក្ខណៈទ្វេភាគី ប្រទេសទាំង ២ ក៏ជាសមាជិកនៃប្រទេសជាហត្ថលេខីនៃកិច្ចព្រមព្រៀងពាណិជ្ជកម្មគ្រប់ជ្រុងជ្រោយតំបន់ RCEP ដែលនឹងបើកឱកាសកាន់តែច្រើនឱ្យមានការផ្លាស់ប្តូរទំនិញជាមួយគ្នាក្រោមលក្ខខណ្ឌពិសេស។
លោកថ្លែងថា៖«តាមរយៈលក្ខខណ្ឌទាំងអស់ខាងលើ ខ្ញុំមានសុទិដ្ឋិនិយមថា ទឹកប្រាក់នៃការធ្វើពាណិជ្ជកម្មរវាងប្រទេសទាំង ២ នឹងបន្តកើនឡើង និងមាននិរន្តរភាពយូរអង្វែងផងដែរ»។
លោកបន្តថា៖ «ជាមួយនឹងការខិតខំរៀបចំដាក់ឱ្យអនុវត្តនូវយុទ្ធសាស្រ្តថ្មីៗជាបន្តបន្ទាប់របស់រដ្ឋាភិបាលដើម្បីទាក់ទាញអ្នកវិនិយោគ និងការជំរុញសមត្ថភាពផលិតកម្ម និងគុណភាពផលិតផលក្នុងស្រុក ព្រមទាំងមានការចូលរួមពីផ្នែកឯកជនផងនោះ ចំនួនទឹកប្រាក់នៃការនាំចេញរបស់កម្ពុជាទៅកាន់ទីផ្សារអន្តរជាតិ រួមទាំងប្រទេសជប៉ុន នឹងមានចំនួនកាន់តែច្រើន»។
កាលពីថ្ងៃទី ៦ ខែសីហា ក្នុងដំណើរទស្សនកិច្ចមកប្រទេសកម្ពុជាដើម្បីចូលរួមកិច្ចប្រជុំរដ្ឋមន្ត្រីការបរទេសអាស៊ាន លោក Hayashi Yoshimasa រដ្ឋមន្ត្រីការបរទេសជប៉ុន បានលើកឡើងនៅក្នុងជំនួបជាមួយលោកនាយករដ្ឋមន្ត្រី ហ៊ុន សែន ថា រដ្ឋាភិបាលជប៉ុននឹងខិតខំជំរុញកិច្ចសហប្រតិបត្តិការជាមួយនឹងកម្ពុជាឱ្យកាន់តែខ្លាំងថែមទៀត ពិសេសនឹងជំរុញអ្នកវិនិយោគជប៉ុនឱ្យចូលមកវិនិយោគនៅកម្ពុជាកាន់តែច្រើន។
បើយោងតាមធនាគារជាតិនៃកម្ពុជា (NBC) ជប៉ុន គឺជាប្រទេសដែលបានមកវិនិយោគផ្ទាល់នៅកម្ពុជាច្រើនជាងគេទី ៥ បន្ទាប់ពី ចិន កូរ៉េ សិង្ហបុរី និងវៀតណាម។ វិនិយោគិនជប៉ុនភាគច្រើនបានវិនិយោគលើវិស័យឧស្សាហកម្ម ធនាគារ សណ្ឋាគារ ទេសចរណ៍ សំណង់ និងអចលនទ្រព្យ ពិសេសវិស័យលក់រាយ ផ្សារទំនើប វិស័យសេវាកម្ម និងវិស័យភោជនីយដ្ឋាន ជាដើម។
ពាណិជ្ជកម្មទ្វេភាគីកម្ពុជា ជប៉ុន ឆ្នាំ ២០២១ មានតម្លៃសរុប ១ ៧៣៤,១៤ លានដុល្លារ កើន ១,២ ភាគរយធៀបឆ្នាំ ២០២០ ក្នុងនោះការនាំទំនិញពីកម្ពុជាទៅជប៉ុន មានតម្លៃ ១ ០៩៣,៦២ លានដុល្លារ កើន ៣ ភាគរយ និងនាំចូលមានតម្លៃ ៦៤០,៥១ លានដុល្លារ ធ្លាក់ ១,៦ ភាគរយ។ នេះបើតាមទិន្នន័យពីអគ្គនាយកដ្ឋានគយ និងរដ្ឋាករកម្ពុជា៕
