(សៀមរាប)៖ រាជរដ្ឋាភិបាល អនុញ្ញាតឱ្យជនបរទេស ឬវិនិយោគិនដែលស្នាក់នៅកម្ពុជាចាប់ពី ២ ឆ្នាំឡើងទៅ អាចស្នើសុំបណ្ណចូលទស្សនារមណីយដ្ឋានអង្គរ និងប្រាសាទកោះកែររយៈពេលមួយឆាំ្នម្តងដោយមិនបង់ថ្លៃដើម្បីជំរុញទេសចរណ៍ផ្ទៃក្នុង ក៏ដូចជាផ្តល់ការលើកទឹកចិត្តដល់ជនបរទេសដែលស្នាក់នៅកម្ពុជា។
សេចក្តីជូនដំណឹងរបស់គ្រឹះស្ថានអង្គរ ចុះថ្ងៃទី ១ ខែកញ្ញានេះ បានឱ្យដឹងថា ដើម្បីជំរុញទេសចរណ៍ផ្ទៃក្នុង ក៏ដូចជាផ្តល់ការលើកទឹកចិត្តដល់ជនបរទេស រាជរដ្ឋាភិបាលបានសម្រេចអនុញ្ញាតផ្តល់ជូនដល់ជនបរទេសទាំងអស់ដែលបាន និងកំពុងស្នាក់នៅក្នុងព្រះរាជាណាចក្រកម្ពុជា ចាប់ពី ២ ឆ្នាំឡើងទៅ រួមមាន មន្ត្រីការទូត វិនិយោគិន មន្ត្រីធ្វើការនៅអង្គការអន្តរជាតិ ជនបរទេសធ្វើការនៅក្រុមហ៊ុន និងសហគ្រាស ឯកជនគ្រប់ប្រភេទ អ្នកជំនាញការធ្វើការនៅតាមក្រសួង ស្ថាប័នរដ្ឋ និងឯកជន រួមទាំងក្រុមគ្រួសារដែលបានស្នាក់នៅជាមួយ អាចស្នើសុំបណ្ណចូលទស្សនារមណីយដ្ឋានអង្គរ និងប្រាសាទកោះកែររយៈពេលមួយឆ្នាំម្តង ដោយមិនបង់ថ្លៃចាប់ពីថ្ងៃទី ០១ ខែ កញ្ញា ឆ្នាំ ២០២២ តទៅ។
សេចក្តីជូនដំណឹងបន្តថា ចំពោះបែបបទនៃការស្នើសុំបណ្ណចូលទស្សនារមណីយដ្ឋានអង្គរ និងប្រាសាទកោះកែររយៈពេលមួយឆ្នាំម្តងដោយមិនបង់ថ្លៃ អាចធ្វើតាមប្រព័ន្ធអនឡាញ (តាមរយៈគេហទំព័រគ្រឹះស្ថានអង្គរ ឬគេហទំព័រ spass.angkorenterprise.gov.kh) ចាប់ពីថ្ងៃទី ០៩ ខែ កញ្ញា ឆ្នាំ ២០២២ ឬមកដាក់ពាក្យដោយផ្ទាល់នៅគ្រឹះស្ថានអង្គរ ក្នុងពេលម៉ោងធ្វើការ និងត្រូវភ្ជាប់មកជាមួយនូវលិខិតឆ្លងដែនច្បាប់ថតចម្លង និងទិដ្ឋាការស្នាក់នៅក្នុងប្រទេសកម្ពុជា រយៈពេលចាប់ពី ២ ឆ្នាំឡើងទៅចំនួនមួយច្បាប់ និងរូបថត ៤ គុណ ៦ រយៈពេល ៦ ខែចុងក្រោយចំនួនមួយសន្លឹក ចាប់ពីថ្ងៃប្រកាសនេះតទៅ។
សេចក្តីជូនដំណឹងបន្តថា អាស្រ័យដូចបានជម្រាបជូនខាងលើ សូមសាធារណជនជាតិ អន្តរជាតិ គ្រប់ប្រតិបត្តិករទេសចរណ៍ ព្រមទាំងជនបរទេសដែលស្នាក់នៅប្រទេសកម្ពុជាទាំងអស់មេត្តាជ្រាប និងអនុវត្តតាមកាលបរិច្ឆេទចាប់ពីថ្ងៃជូនដំណឹងនេះ៕
