ភ្នំពេញៈ ចំណងមិត្តភាពទ្វេរភាគី រវាងកម្ពុជាថៃ នៅតែបន្តភាពរឹងមាំ និងកាន់តែរីកចម្រើនបើទោះពិភពលោកបានជួបនឹងវិបត្តិការរីករាលដាលនៃជំងឺកូវីដ១៩ ក៏ដោយ។
បន្ទាប់ពីការចូលជួបសម្តែងការគួសម និងជម្រាបលា របស់ឯកឧត្តម Panyyarak Poolthup ឯកអគ្គរាជទូតនៃព្រះរាជាណាចក្រថៃ ប្រចាំកម្ពុជានៅវិមានសន្តិភាព ដោយបានទទួលការអនុញ្ញាតពី សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃទី ០៥ ខែកញ្ញានេះ ឯកឧត្ដម អ៊ាង សុផល្លែត ជំនួយការសម្ដេចតេជោបានឱ្យដឹងក្រោយជំនួបនោះថា ឯកឧត្ដម Poolthup បានគោរពថ្លែងអំណរគុណយ៉ាងជ្រាលជ្រៅជាទីបំផុត ជូនចំពោះសម្ដេចតេជោ រាជរដ្ឋាភិបាលកម្ពុជា ដែលបានផ្ដល់វ៉ាក់សាំងដល់ឯកឧត្ដម និងមន្ត្រីស្ថានទូតទាំងអស់ ដែល មិនត្រឹមតែមន្ត្រីស្ថានទូតថៃនោះទេ គឺមន្ត្រីស្ថានទូតទាំងអស់ដែលកំពុងស្នាក់នៅទូទាំងព្រះរាជាណាចក្រកម្ពុជា។
ឯកឧត្ដម ក៏បានសម្ដែងនូវការអបអរសាទរចំពោះសម្ដេចតេជោ និងរាជរដ្ឋាភិបាលកម្ពុជា ដែលបានទប់ស្កាត់ការរីករាលដាលជំងឺកូវីដ១៩ បានយ៉ាងមានប្រសិទ្ធភាព ហើយក្នុងនាមជាប្រធានអាស៊ាន កម្ពុជាបានបើកប្រទេសឡើងវិញ និងដឹកនាំកិច្ចប្រជុំរដ្ឋមន្ត្រីការបរទេសអាស៊ាន និងកិច្ចប្រជុំពាក់ព័ន្ធទទួលជោគជ័យ ដែលនេះសបញ្ជាក់ពីតួនាទីដ៏រឹងមាំរបស់កម្ពុជាលើឆាកអន្តរជាតិ។
ឯកឧត្ដម Panyyarak Poolthup បានជម្រាបជូនសម្ដេចតេជោថា ក្នុងពេលដែលឯកឧត្ដមទើបមកបំពេញបេសកកម្មការទូតនៅកម្ពុជាកាលពីឆ្នាំ២០១៨ ឯកឧត្ដមបានប្ដេជ្ញាជូនសម្ដេចថា នឹងពង្រីកពង្រឹងកិច្ចសហប្រតិបត្តិការ និងទំនាក់ទំនងរវាងប្រទេសទាំងពីរឱ្យកាន់តែខ្លាំងឡើង ដោយឈរលើមូលដ្ឋានដែលមានស្រាប់ ហើយនៅពេលនេះឯកឧត្ដមបានសម្រេចតាមការប្ដេជ្ញារបស់ឯកឧត្ដមហើយ ដែលកិច្ចសហប្រតិបត្តិការ និងទំនាក់ទំនងរវាងប្រទេសទាំងពីរ ត្រូវបានពង្រីកនិងពង្រឹង ដែលទំហំពាណិជ្ជកម្មរវាងប្រទេសទាំងពីរបានកើនឡើង១០ភាគរយ ទោះបីស្ថិតក្នុងដំណាក់កាលកូវីដ១៩ក៏ដោយ វិស័យអប់រំការអភិវឌ្ឍធនធានមនុស្ស និងវិស័យដទៃទៀតក៏មានការរីកចម្រើនផងដែរ។
ជាការឆ្លើយតប សម្ដេចតេជោនាយករដ្ឋមន្ត្រីបានថ្លែងអំណរគុណចំពោះឯកឧត្ដម Poolthup ដែលបានប្រឹងប្រែងអស់ពីកម្លាំងកាយចិត្តបំពេញបេសកកម្មកការទូត នាំឱ្យព្រះរាជាណាចក្រកម្ពុជា និងព្រះរាជាណាចក្រថៃ មានទំនាក់ទំនងនិងកិច្ចសហប្រតិបត្តិការកាន់តែល្អប្រសើរឡើង។ សម្ដេចតេជោមានប្រសាសន៍ថា ទោះបីស្ថិតក្នុងកាលៈទេសៈកូវីដ១៩ក៏ដោយ យើងបានខិតខំរួមគ្នាធ្វើការបានល្អ ជំរុញទំនាក់ ទំនងរវាងប្រទេសទាំងពីរផង និងជំរុញកិច្ចសហប្រតិបត្តិការលើវិស័យ ពាណិជ្ជកម្ម អប់រំ និងវិស័យដទៃទៀតបានយ៉ាង ល្អជាទីមោទនៈ៕
