បាងកក៖ ឧបនាយករដ្ឋមន្ត្រីថៃ បាននិយាយនៅព្រឹកថ្ងៃច័ន្ទនេះថា គណៈរដ្ឋមន្ត្រីរបស់ប្រទេសថៃនឹងពិចារណាលើការពន្យារពេលការឧបត្ថម្ភធនអគ្គិសនី និងការកាត់ពន្ធគយសម្រាប់ប្រេងម៉ាស៊ូត ដើម្បីជួយកាត់បន្ថយផលប៉ះពាល់នៃតម្លៃថាមពលខ្ពស់ និងថ្លៃរស់នៅ។
ការកាត់បន្ថយពន្ធលើប្រេងម៉ាស៊ូត ៥បាត/លីត្រ ($0.1372) ត្រូវបានពន្យារពេលលើកចុងក្រោយសម្រាប់រយៈពេលពីរខែដោយ ថ្ងៃកំណត់គឺនៅថ្ងៃទី ២០ខែកញ្ញាខាងមុខនេះ។ ការកាត់បន្ថយពន្ធលើប្រេងដូចនេះ គឺដើម្បីរក្សាស្ថិរភាពតម្លៃថាមពលដែលបានជំរុញឱ្យអតិផរណា ឡើងដល់កម្រិតខ្ពស់រយៈពេល ១៤ឆ្នាំនៅឆ្នាំនេះ។ លោក Supattanapong Punmeechaow មិនបាននិយាយថាការកាត់បន្ថយពន្ធនឹងត្រូវបន្តរយៈពេលប៉ុន្មាននោះទេ ប៉ុន្តែបាននិយាយថារដ្ឋាភិបាលក៏ត្រូវការរក្សាសារពើពន្ធដែរ ត្បិតរដ្ឋាភិបាលបានចំណាយប្រាក់ ២០០ ពាន់លានបាត (៥,៤៩ ពាន់លានដុល្លារ) លើការគ្រប់គ្រងតម្លៃថាមពល។ គួរជម្រាបដែរថា គណៈរដ្ឋមន្ត្រីនឹងបើកកិច្ចប្រជុំនៅថ្ងៃអង្គារ។
ការឧបត្ថម្ភធនលើវិក្កយបត្រអគ្គិសនីក៏នឹងត្រូវដាក់ជូនគណៈរដ្ឋមន្ត្រីដើម្បីអនុម័តផងដែរ លោក Supattanapong ដែលជារដ្ឋមន្ត្រីក្រសួងថាមពលបានប្រាប់អ្នកយកព័ត៌មានដោយមិនបានផ្តល់ព័ត៌មានលម្អិត។ ក្រសួងថាមពលបានរៀបចំផែនការឧបត្ថម្ភធនចំនួន ៨ពាន់លានបាតលើវិក្កយបត្រអគ្គិសនីចាប់ពីខែកញ្ញាដល់ខែធ្នូ។
(1$ = 36.4400 បាត)
ប្រែសម្រួលដោយ៖ សូរីយ៉ាភ័ណ្ឌ
