ភ្នំពេញ៖ នៅចំពោះមុខលោក ម៉ានូអែល ម៉ារ៉េវ៉ូ គ្រុស នាយករដ្ឋមន្ត្រីគុយបា កាលពីថ្ងៃទី០៤ ខែតុលា ឆ្នាំ២០២២ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានថ្កោលទោសចំពោះការបាញ់ម៉ីសីលរបស់ប្រទេសកូរ៉េខាងជើងឆ្លងកាត់ប្រទេសជប៉ុន។
សម្តេចតេជោបានថ្លែងថា ឥរិយាបទរបស់សាធារណរដ្ឋប្រជាមានិតប្រជាធិបតេយ្យកូរ៉េ គឺប្រកបដោយគ្រោះថ្នាក់ និងជាការបំពានមួយទៀតទៅលើសេចក្តីសម្រេចនៃក្រុមប្រឹក្សាសន្តិសុខអង្គការសហប្រជាជាតិ។
សម្តេចតេជោនាយករដ្ឋមន្ត្រី ក៏បានបញ្ចេញទស្សនៈ ចំពោះសង្គ្រាមនៅអ៊ុយក្រែនផងដែរ។ សម្តេចបានដូច្នេះថា៖ «កម្ពុជាយល់អំពីហេតុផលប្រវត្តិសាស្ត្រ យល់អំពីការព្រួយបារម្មណ៍ផ្នែកសន្តិសុខ និងភាពស្មុគស្មាញនៃបញ្ហា»។
សម្តេចតេជោនាយករដ្ឋមន្តី បន្តមានប្រសាសន៍ថា កម្ពុជាមិនយល់ស្របចំពោះការចូលលុកលុយ ប្រទេសអ៊ុយក្រែន និងការភ្ជាប់ជាតំបន់ចំណុះ ពីប្រទេសអធិបតេយ្យមួយនោះទេ។ សម្តេចបានថ្លែងថា៖ «កម្ពុជា ក្នុងនាមជាប្រទេសតូច ប្រកាន់នូវការគោរពអធិបតេយ្យ បូរណភាពដែនដី និងឯករាជ្យភាពនយោបាយ នៃរដ្ឋសមាជិក និងធម្មនុញ្ញអ.ស.ប»។
គូសបញ្ជាក់ថា ក្នុងជំនួបទ្វេភាគី នាយករដ្ឋមន្ត្រីទាំងពីរបានផ្លាស់ប្តូរមតិ ពាក់ព័ន្ធនឹងបញ្ហាតំបន់ និងអន្តរជាតិ និងបានប្តេជ្ញា ពង្រឹងទំនាក់ទំនងនៃប្រទេសទាំងពីរ កម្ពុជា-គុយបា ចំណងមិត្តភាព និងសហប្រតិបត្តិការ លើវិស័យជាច្រើន មានដូចជា វិស័យអប់រំ សុខាភិបាល វប្បធម៌ កសិកម្ម ពាណិជ្ជកម្ម និងទំនាក់ទំនងលើឆាកអន្តរជាតិ។
សូមបញ្ជាក់ថា នៅថ្ងៃទី០៤ ខែតុលានេះ ប្រទេសកូរ៉េខាងជើងបានបាញ់មីស៊ីលផ្លោងមួយគ្រាប់រំលងប្រទេសជប៉ុន ជាលើកដំបូងក្នុងរយៈពេល៥ឆ្នាំកន្លងមកនេះ ចាប់តាំងពីឆ្នាំ២០១៧ មុននឹងធ្លាក់ចូលសមុទ្រប៉ាស៊ីហ្វិក។ ការបាញ់គ្រាប់មីស៊ីលចេញពីខេត្តចាហ្កាំង (JAGANG) របស់កូរ៉េខាងជើងលើកនេះ គឺជាបាញ់លើកទី៥ហើយ៕
