រូបភាព៖ រដ្ឋបាលខេត្តស្ទឹងត្រែង
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន ក្នុងឱកាសចុះបណ្តុះបណ្តាលពង្រឹងសមត្ថភាពមន្ត្រីនគរបាលយុត្តិធម៌ពីការប្រឆាំងការសម្អាតប្រាក់ពាក់ព័ន្ធបទល្មើសធនធានធម្មជាតិ នៅថ្ងៃទី៥ ខែតុលា បានឱ្យដឹងថា ក្នុងកំលុងពេលនៃការចុះបង្រ្កាបនេះ មន្ត្រីឧទ្យានុរក្ស បានដកហូតវត្ថុតាងជាឈើអារចម្រុះចំនួន៧៥៨ម៉ែត្រគូប ដកហូតវត្ថុតាងជាមធ្យោបាយ ឧបករណ៍សម្ភារៈក្នុងនោះរួមមាន រណារយន្តចំនួន១.៧២៤គ្រឿង រថយន្ត៥១គ្រឿង ត្រាក់ទ័រចំនួន៧គ្រឿង គោយន្តកន្ត្រៃចំនួន១៣៨គ្រឿង ម៉ូតូ១៥២គ្រឿង ដោះអន្ទាក់សត្វចំនួនជាង២ម៉ឺន៦ពាន់អន្ទាក់ ដកហូតអាវុធកែច្នៃចំនួន៣៤៤ដើម បានអប់រំកិច្ចសន្យាចំនួន១.១៦៧ករណី បានពិន័យអន្តរការណ៍ចំនួន២៥៨ ករណី និងបញ្ជូនសំណុំរឿងទៅតុលាការ៣៥៣ករណី។
លោកសង្កត់ធ្ងន់ថា បច្ចុប្បន្ននេះ បទល្មើសធនធានធម្មជាតិទ្រង់ទ្រាយធំលែងកើតមានទៀតហើយ នៅមានតែបទល្មើសទ្រង់ទ្រាយតូច ដែលមន្ត្រីជំនាញ ជាពិសេសមន្ត្រីឧទ្យានុរក្សនៃក្រសួងបរិស្ថានបន្តទប់ស្កាត់និងបង្ក្រាបជាប្រចាំ។ តែទោះជាយ៉ាងនេះក្តី មន្ត្រីនគរបាលយុត្តិធម៌នឹងត្រូវពន្លាតលើបទល្មើសនៃការសម្អាតប្រាក់និងហិរញ្ញប្បទានភេរវកម្ម ក្នុងករណីរកឃើញថា បទល្មើសដើមនៃបទល្មើសព្រៃឈើ និងបទល្មើសសត្វព្រៃខុសច្បាប់មានតម្រុយពាក់ព័ន្ធនឹងការសម្អាតប្រាក់។
បើតាមអ្នកនាំពាក្យក្រសួងបរិស្ថាន បច្ចុប្បន្ននេះ បទល្មើសធនធានធម្មជាតិទ្រង់ទ្រាយធំលែងកើតមានទៀតហើយ គឺនៅមានតែបទល្មើសខ្នាតតូចដែលយើងចាំបាច់ត្រូវបន្តទប់ស្កាត់និងបង្ក្រាប។ ជាមួយនឹងគ្នានេះ លោក ក៏បានជំរុញឱ្យមន្ត្រីនគរបាលយុត្តិធម៌និងមន្ត្រីអនុវត្តច្បាប់ ត្រូវតែបង្កើនការយកចិត្តទុកដាក់និងបន្តអនុវត្តច្បាប់ឱ្យបានហ្មត់ចត់ ប្រកបដោយការទទួលខុសត្រូវ និងវិជ្ជាជីវៈ ដើម្បីបង្កើនប្រសិទ្ធភាពខ្ពស់ក្នុងកិច្ចការពារនិងអភិរក្សធនធានធម្មជាតិ និងជាពិសេសទប់ស្កាត់និងបង្ក្រាបបទល្មើសទាក់ទងនឹងការសម្អាតប្រាក់និងហិរញ្ញប្បទានភេរវកម្មពាក់ព័ន្ធនឹងបទល្មើសធនធានធម្មជាតិ៕
