(អូស្ត្រាលី)៖ សហគមន៍ជាច្រើននៅក្នុងរដ្ឋចំនួន ៣ របស់អូស្ត្រាលីត្រូវបានបញ្ជាឲ្យជម្លៀស ខណៈភ្លៀងធ្លាក់ខ្លាំងបង្កឲ្យមានទឹកជំនន់ធ្ងន់ធ្ងរ។ ផ្នែកមួយចំនួនរបស់ប្រទេសនេះបានទទួលទឹកភ្លៀងច្រើនជាងកម្រិតមធ្យម ៣ដងនៅខែតុលានេះក្នុងរយៈពេលត្រឹមតែ ២៤ម៉ោងប៉ុណ្ណោះ។
លំនៅឋានយ៉ាងហោចណាស់ ៥០០ខ្នងត្រូវបានទឹកជន់លិច មនុស្សម្នាក់ស្លាប់ និងម្នាក់បាត់ខ្លួន ខណៈគ្រោះមហន្តរាយនេះនៅតែបន្ត។ ការជន់លិចដ៏ធ្ងន់ធ្ងរនៅទូទាំងប្រទេសអូស្ត្រាលី ដែលបានបង្កឡើងដោយបាតុភូតអាកាសធាតុឡានីញ៉ា (La Niña) បានសម្លាប់មនុស្សជាង ២០នាក់នៅឆ្នាំនេះ។ Victoria ដែលជារដ្ឋមានប្រជាជនច្រើនបំផុតទី២ របស់ប្រទេសអូស្ត្រាលីត្រូវបានរងគ្រោះធ្ងន់ធ្ងរបំផុតនៅសប្ដាហ៍នេះ។
សហគមន៍មួយចំនួនត្រូវបានបញ្ជាឲ្យជម្លៀស រួមទាំងមួយចំនួនក្នុងទីក្រុងMelbourne។ ទឹកជំនន់បានជន់លិចពាសពេញផ្លូវ បានបង្ខំឲ្យបិទសាលារៀន និងកាត់ផ្ដាច់ចរន្តអគ្គិសនីនៅតាមលំនៅឋាន និងហាងអាជីវកម្មប្រមាណ ៣,០០០ខ្នង និងហាង៕
