ក្នុងការពង្រឹង និងពង្រីកអំណាចបន្ថែម បុរសខ្លាំងរដ្ឋចិនរូបនេះ ក៏បានជ្រើសតាំងសមាសភាពគណៈកម្មាធិការអចិន្ត្រៃយ៍នៃការិយាល័យនយោបាយបក្សកុម្មុយនិស្តចិន ដែលសុទ្ធសឹងជាមនុស្សស្និទ្ធ ឬមានភក្តីភាពខ្លាំងនឹងលោក ខណៈដែលខ្លះក៏ត្រូវជំរុះចោលផងដែរ។ ក្នុងនោះក៏មានដែរ លោកនាយករដ្ឋមន្រ្តី លី ឃឺឈាំង នឹងដល់ពេលចូលនិវត្តន៍នៅខែមីនាឆ្នាំក្រោយ។ ទោះយ៉ាងណា បុរសខ្លាំងស៊ី ជីនពីង បានសម្លឹងឃើញរួចហើយ ចំពោះអ្នកដែលត្រូវមកស្នងដំណែងនេះ ដោយលោកស៊ី បានជ្រើសយកលោក លី ឈាំង ជាបុគ្គលដែលស្និទ្ធនឹងលោកមកធ្វើជានាយករដ្ឋមន្ត្រី ជំនួសលោក លី ខឺឈាំង។ តើលោក លី ឈាំង ដៃស្តាំរបស់លោក ស៊ី ជីនពីងនេះ មានប្រវត្តិបែបណា?
ក្នុងវ័យ៦៣ឆ្នាំ លោក លី ឈាំង ឈរនៅលំដាប់ទីពីរនៃគណៈកម្មាធិការអចិន្ត្រៃយ៍នៃការិយាល័យនយោបាយបក្សកុម្មុយនិស្តចិន និងជាអនាគតនាយករដ្ឋមន្ត្រីចិនថ្មីផងដែរ។ លោក លី ឈាំង ជាលេខាបក្សរបស់ទីក្រុងសៀងហៃ ហើយធ្លាប់បានបំពេញការងារ ជាមួយលោក ស៊ី ជីនពីង អំឡុងឆ្នាំ២០០៤ ដល់២០០៧ ពេលលោកកាន់តំណែងលេខាបក្សខេត្តជឺជាំង។
ដំបូងឡើយ លោក លី ឈាំង មិនត្រូវបានគេរំពឹងទេថា នឹងឡើងមកកាន់តំណែងកំពូលមួយនេះ ដោយសារតែកំហុសឆ្គងរបស់លោកក្នុងការទប់ស្កាត់ជំងឺកូវីដ-១៩ ដោយសម្រេចបិទខ្ទប់ក្រុងសៀងហៃ ដែលជាមជ្ឈមណ្ឌលសេដ្ឋកិច្ចដ៏ធំរបស់ប្រទេសចិន រហូតដល់ទៅ២ខែ ធ្វើឱ្យរង្គោះរង្គើដល់ទីផ្សារហិរញ្ញវត្ថុយ៉ាងខ្លាំង។លោក លី នឹងកាន់តំណែងនាយករដ្ឋមន្រ្តីបន្តពីលោក លី ខឺឈាំង ហើយដូចសព្វដងដែរ ដំណែងនេះ នឹងត្រូវក្តោបក្តាប់លើវិស័យសេដ្ឋកិច្ចរបស់ចិនទាំងមូល។
កាលនៅជាលេខាបក្សរបស់ទីក្រុងសៀងហៃ លោកលី ទទួលបានការខឹងសម្បារ រិះគន់យ៉ាងចាស់ដៃ ពីអ្នកលេងបណ្តាញសង្គមក្នុងប្រទេសចិន ពីការអនុវត្តតឹងតែងហួសហេតុអំឡុងពេលបិទខ្ទប់ ដែលបណ្តាលឱ្យមានការរំខានដល់សេដ្ឋកិច្ចរបស់ទីក្រុងសៀងហៃ។ មិនតែប៉ុណ្ណោះ ពលរដ្ឋក្រុងសៀងហៃ ទាំងជាង ២៥លាននាក់ ក៏បានសំដែងការខឹងសម្បារចំពោះរូបលោកដែរ។
លោក លី ឈាំង ក៏ជាមនុស្សដំបូងផងដែរ ដែលបានឡើងមកធ្វើជានាយករដ្ឋមន្ត្រី ដោយផ្ទុយពីឋានានុក្រមអំណាច ពោលរាប់ចាប់ពីឆ្នាំ១៩៧៦មក គឺលោក ជាបុរសទី១ហើយ ដែលឡើងធ្វើជានាយករដ្ឋមន្ត្រី ដោយមិនធ្លាប់ធ្វើជាឧបនាយករដ្ឋមន្ត្រី។
អ្នកឃ្លាំមើលស្ថានការណ៍ប្រទេសចិនម្នាក់មកពីសហរដ្ឋអាមេរិក និយាយថា នេះជាបើតាម ទម្លាប់គឺអ្នកណាម្នាក់ដែលក្លាយជានាយករដ្ឋមន្ត្រីបាន ត្រូវតែធ្លាប់ជាឧបនាយករដ្ឋមន្ត្រីពីមុន ហើយការរុញតំណែងលោក លី ឈាំង គឺផ្ទុយទាំងស្រុងពីគោលការណ៍គណបក្ស។ លើសពីនេះគេមិនទាំងធ្លាប់បានឃើញលោកលី ឈាំង ណែនាំកំណែទម្រង់ទីផ្សារណាមួយឡើយ ឬសូម្បីតែបទពិសោធន៍ផ្នែកសេដ្ឋកិច្ច។
ទោះយ៉ាងណា ការរុញឱ្យលោក លី ឈាំងឡើងមកដល់ដំណែងកំពូលមួយនេះ មិនមែនជារឿងចៃដន្យឡើយសម្រាប់អ្នកតាមដានស្ថាបការណ៍នយោបាយនៅប្រទេសចិន។ លោក លី ឈាំង ដែលជាមនុស្សស្និទនឹងលោក ស៊ី តាំងតែពីបំពេញការងារជាមួយគ្នាននៅខេត្តជឺជាំង បានតែងតាំងឡើងមកជាលេខាបក្សមជ្ឈមណ្ឌលហិរញ្ញវត្ថុក្រុងសៀងហៃ ក្នុងឆ្នាំ២០១៣ ជាឆ្នាំដែលលោកស៊ី ឡើងកាន់ជាប្រធានាធិបតីដំបូងដែរ។ នេះបានសេចក្តីថា លោកស៊ី បានសម្លឹងឃើញតំណែងកំពូលសម្រាប់លោក លី រួចអស់ហើយ។
សូមជម្រាបថា លោក លី ឈាំងមិនមែនជាបុគ្គលតែម្នាក់ ដែលស្និទ្ធនឹងលោក ស៊ី ជីនពីង ហើយបាន ឡើងមកកាន់ដំណែងកំពូលរបស់បក្សដូចនេះទេ។ ក្នុងនោះ នៅមានមនុស្សជំនិត ដៃឆ្វេងនិងស្តាំង ៥រូបទៀតរួមមាន លោក ចៅ ឡេជី(Zhao Leji) អ្នកទទួលខុសត្រូវប្រយុទ្ធប្រឆាំងនឹងអំពើពុករលួយ និង លោក វ៉ាង ហ៊ុននីង(Wang Huning) ទទួលបន្ទុកផ្នែកមនោគមវិជ្ជាបក្ស។ ទាំងពីររូបនេះជាសមាជិកចាស់ដែលបន្តអាណត្តិថ្មី។ ចំណែកលោក ខៃ ជី (Cai Qi) អគ្គលេខាបក្សក្រុងប៉េកាំង លោក ឌីង សៀវស៊ែង(Ding Xuexiang) នាយកការិយាល័យមជ្ឈិមបក្ស និងការិយាល័យប្រធានាធិបតី ដែលចាត់ទុកដៃឆ្វេងរបស់លោកស៊ីជីនពីង ព្រមទាំងលោក លី ស៊ី (Li Xi) អគ្គលេខាបក្សខេត្តក្វាងទុង ជាសមាជិកអចិន្ត្រៃយ៍ថ្មីដែលមកជំនួសអ្នកចូលនិវត្តន៍៕
