ក្នុងការជួបសន្ទនា តាមទូរស័ព្ទជាមួយប្រធានាធិបតីឥណ្ឌូនេស៊ី កាលពីថ្ងៃពុធ ប្រធានាធិបតីរុស្ស៊ីលោក វ៉ា្លឌីមៀរ ពូទីន បានអះអាងពីការមិនទាន់សម្រេចចិត្តចូលរួមកិច្ចប្រជុំកំពូលរបស់ក្រុមប្រទេសអភិវឌ្ឍន៍សេដ្ឋកិច្ច (G20) នៅប្រទេសឥណ្ឌូនេស៊ី នៅថ្ងៃទី ១៥ និង ១៦ ខែវិច្ឆិកា នេះទេ ប៉ុន្តែលោកបានកោតសរសើរឥណ្ឌូនេស៊ី ចំពោះអព្យាក្រឹតភាព ក្នុងនាមជាប្រធានប្តូរវេន ហាក់បញ្ជាក់ថា លោកនឹងមិនចូលរួម។
តាមរយៈសេចក្តីប្រកាសរបស់វិមានក្រឹមឡាំង ដែលបានចុះផ្សាយបន្ត ដោយទីភ្នាក់ងារព័ត៌មានរុស្ស៊ី TASS ក្នុងជំនួបសន្ទនាតាមទូរស័ព្ទ ជាមួយសមភាគីឥណ្ឌូនេស៊ីលោក ចូកូ វីដូដូ កាលពីថ្ងៃពុធ លោកពូទីន បានអះអាងពីការមិនទាន់សម្រេចចិត្តចូលរួមកិច្ចប្រជុំកំពូលទេ ទោះបីលោក សរសើរតួនាទីឥណ្ឌូនេស៊ី ក្នុងនាមជាប្រធានប្តូរវេននៃ G20 ដែលមានលក្ខណៈស្ថាបនា និងគ្មាននយោបាយរបស់ហ្សាការតា។
លោក ពូទីន ក៏បានកោតសរសើរឥណ្ឌូនេស៊ី ទាក់ទងនឹងបញ្ហាសំខាន់ៗ ដូចជាកិច្ចប្រឹងប្រែងពង្រឹងសន្តិសុខថាមពល និងស្បៀង ធានាការផ្លាស់ប្តូរថាមពលប្រកបដោយតុល្យភាព និងការផ្លាស់ប្តូរឌីជីថលនៃសេដ្ឋកិច្ចសកលលោក ក៏ដូចធ្វើឱ្យប្រសើរឡើងនូវការថែទាំសុខភាព។
ការកោតសរសើររបស់លោក ពូទីន ប្រៀបដូចជាសារ ១ បញ្ជាក់ពីការអបអរសាទរឥណ្ឌូនេស៊ី ខណៈលោកនឹងមិនបានចូលរួមប្រជុំ ដោយផ្ទាល់នោះទេ។
ដោយសារសង្គ្រាម នៅអ៊ុយក្រែន ដែលលោក ពូទីនខ្លួនឯងជាអ្នកបញ្ឆេះឡើង ហើយត្រូវបានថ្កោលទោសពីអន្តរជាតិ ស្ទើរតែពេញពិភពលោក លោកពូទីន ទំនងបោះបង់កិច្ចប្រជុំកំពូលជាច្រើន ក្នុងនោះមានកិច្ចប្រជុំកំពូលអាស៊ានរុស្ស៊ី កិច្ចប្រជុំអាស៊ីបូព៌ា នៅប្រទេសកម្ពុជា កិច្ចប្រជុំ G20 នៅប្រទេសឥណ្ឌូនេស៊ី និងកិច្ចប្រជុំកំពូល APEC នៅថៃ ដែលសុទ្ធតែធ្វើឡើងក្នុងខែវិច្ឆិកានេះ។
នៅមុននេះ លោក ពូទីនក៏ធ្លាប់បោះបង់មហាសន្និបាតអង្គការសហប្រជាជាតិ កាលពីខែកញ្ញាកន្លងទៅផងដែរ៕
