(ភ្នំពេញ)៖ នៅព្រឹកថ្ងៃទី២៨ ខែមករាឆ្នាំ២០២៣នេះ គណបក្សប្រជាជនកម្ពុជា ដែលជាគណបក្សកំពុងដឹកនាំរាជរដ្ឋាភិបាលបានបើកមហាសន្និបាតវិសាមញ្ញតំណាងទូទាំងប្រទេសរយៈពេល២ថ្ងៃ ថ្ងៃទី២៨-២៩មករា២០២៣ នៅវិមាន ៧មករា នៅរាជធានីភ្នំពេញ។មហាសន្និបាតបានប្រារព្ធក្រោមអធិបតីភាពសម្តេចតេជោ ហ៊ុន សែន ប្រធានគណបក្សប្រជាជន និងសម្តេចអគ្គមហាពញាចក្រី ហេង សំរិន ប្រធានកិត្តិយសគណបក្សប្រជាជនកម្ពុជា និងដោយមានការចូលរួមពីសមាជិកអចិន្ត្រៃយ៍ សមាជិកគណៈកម្មាធិការកណ្តាលគណបក្ស និងមានការអញ្ជើញចូលរួមពីសមាជិក សមាជិកា ព្រឹទ្ធសភា រដ្ឋសភា រាជរដ្ឋាភិបាលមន្ត្រីជាន់ខ្ពស់មួយចំនួននៅតាមក្រសួង-ស្ថាប័នរាជ ធានី-ខេត្តក្រុងស្រុកខណ្ឌអង្គការមហាជន ។
បើតាមឯឧ សុខ ឥសាន អ្នកនាំពាក្យគណបក្សប្រជាជនកម្ពុជា បានឲ្យដឹងថា មហាសន្និបាតនេះ មានរយៈពេល២ថ្ងៃដោយមានរបៀបវារៈមួយចំនួនដែលនៅថ្ងៃដំបូងនេះមានពិធីបើក មហាសន្និបាតវិសាមញ្ញថ្លែងសុន្ទរកថា បើកដោយសម្តេចអគ្គមហាពញាចក្រី ហេង សំរិន និងរបាយការណ៍អំពីលទ្ធផលនៃការអនុ វត្តកម្មវិធីនយោបាយគណបក្សពីឆ្នាំ២០១៨ -២០២៣និងទិសដៅភារកិច្ចឆ្នាំ ២០២៣ ការពិភាក្សា ។
ចំណែករបៀបវារៈនៅថ្ងៃទី២គឺថ្ងៃអាទិត្យស្អែកនេះ នឹងអនុម័តលើរបាយការណ៍អំពីលទ្ធផលនៃការអនុវត្តកម្មវិធីនយោបាយគណបក្សពីឆ្នាំ២០១៨-២០២៣ និងទិសដៅភារកិច្ចឆ្នាំ២០២៣ ការអនុម័តលើសេចក្តីព្រាងកម្មវិធីនយោបាយរបស់គណបក្ស សម្រាប់ការកសាង និងការពារមាតុភូមិឆ្នាំ ២០ ២៣-២០២៨ និងមតិបូកសរុបនិងការណែនាំរបស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជាជាដើម ។
ក្រោយបញ្ចប់មហាសន្និបាតវិសាមញ្ញនឹងមានសេចក្តីប្រកាសអំពីលទ្ធផលនៃមហា សន្និបាតវិសាមញ្ញនេះផងដែរ។
គួរបញ្ជាក់ថា បើតាមសម្តេចតេជោ ក្នុងពិធីប្រគ ល់សញ្ញាបត្រជូននិស្សិតសាកលវិទ្យាល័យ វេស្ទើនកាលពីថ្ងៃទី២៦ ខែមករាកន្លងទៅ បានឱ្យដឹងថា មហាសន្និបាតវិសាមញ្ញនេះធ្វើឡើងក្នុងគោលបំណង ដើម្បីជជែករៀបចំក្របខណ្ឌគោលនយោបាយ ២០២៣-២០២៨ ដែលមានការចូលរួមតាំងពីថ្នាក់ដឹកនាំស្រុករហូត ដល់ថ្នាក់កំពូលដើម្បីចូលរួមផ្ដល់មតិទៅលើទិស ដៅដែលត្រូវប្រកាន់យកក្នុងរយៈ ពេល៥ ឆ្នាំទៅមុខ។
សម្ដេច បានឲ្យដឹងដែរថា មហាសន្និបាតវិសាមញ្ញនេះជាពិសេស បញ្ហាមនុស្សក្លាយទៅជាបញ្ហាសំខាន់ជាងគេដូចដែលសម្ដេចធ្លាប់និយាយហើយថាថវិកាឆ្នាំ ២០២៣ គឺជាថវិកាបម្រើឲ្យមនុស្ស។ក្នុងនោះមានទាំងការដំឡើងបៀវត្សការធ្វើអន្ដរាគមន៍ជួយចំពោះអ្នកក្រីក្រដែលជួបបញ្ហាកូវីដ១៩ និងបញ្ហាអតិផរណា ជាដើម ៕
