(ភ្នំពេញ)៖ នៅក្នុងជំនួបជាមួយអនុប្រធានជាន់ខ្ពស់ និងនាយកគ្រប់គ្រងតំបន់ H.E. លោក Michael W. Michalak សម្តេចតេជោ ហ៊ុន សែន បានលើកឡើងថា គ្មានពេលណាទៀតទេដែលទំនាក់ទំនងកម្ពុជា-អាមេរិកល្អជាងពេលនេះ។
នាយករដ្ឋមន្ត្រីបានធ្វើអត្ថាធិប្បាយក្នុងឱកាសទទួលគណៈប្រតិភូក្រុមប្រឹក្សាធុរកិច្ចអាមេរិក-អាស៊ាន ដឹកនាំដោយអនុប្រធានជាន់ខ្ពស់ និងនាយកគ្រប់គ្រងតំបន់ លោក Michael W. Michalak កាលពីថ្ងៃទី ២៨ ខែកុម្ភៈ នេះបើតាមលោក អ៊ាង សុផល្លែត ជំនួយការផ្ទាល់របស់នាយករដ្ឋមន្ត្រី ហ៊ុន សែន នៅវិមានសន្តិភាព។
លោក ហ៊ុន សែន បានពន្យល់ថា ទំនាក់ទំនងល្អត្រូវបានឆ្លុះបញ្ចាំងដោយការកើនឡើងនៃពាណិជ្ជកម្មទ្វេភាគី ដោយលោកបានបន្ថែមថា ប្រជាជនអាមេរិកប្រើប្រាស់ផលិតផល Made-in-Cambodia ខណៈប្រជាជនកម្ពុជាមានការងារធ្វើ។
លោក Michael W. Michalak បានអបអរសាទរកម្ពុជាចំពោះភាពជោគជ័យនៃការធ្វើជាប្រធានអាស៊ានរបស់ខ្លួនកាលពីឆ្នាំមុន និងការរីកលូតលាស់នៃទំនាក់ទំនងកម្ពុជា-សហរដ្ឋអាមេរិកលើគ្រប់វិស័យ ព្រមទាំងទំនាក់ទំនងអាស៊ាន-សហរដ្ឋអាមេរិកផងដែរ។
លោកក៏បានជូនពរដល់ប្រទេសកម្ពុជាទទួលបានជោគជ័យក្នុងការធ្វើជាម្ចាស់ផ្ទះកីឡាស៊ីហ្គេមនៅខែឧសភា និងការបោះឆ្នោតសកលនៅខែកក្កដាឆ្នាំនេះផងដែរ។
លោក Michael W. Michalak បានជម្រាបជូនលោក ហ៊ុន សែន អំពីដំណើរទស្សនកិច្ចរបស់លោក គោលបំណងគឺដើម្បីបង្ហាញពីការគាំទ្រចំពោះផែនការស្តារសេដ្ឋកិច្ចក្រោយកូវីដ ដោយស្វែងរកមធ្យោបាយកែលម្អលទ្ធភាពទទួលបានមូលនិធិសម្រាប់សហគ្រាសធុនតូច និងមធ្យមក្នុងស្រុក និងឧស្សាហកម្មដែលរងផលប៉ះពាល់ធ្ងន់ធ្ងរ។
គោលបំណងមួយទៀតនៃដំណើរទស្សនកិច្ចនេះ គឺដើម្បីលើកកម្ពស់វិស័យឯកជនរបស់សហរដ្ឋអាមេរិក ដែលជាប្រភពគន្លឹះសម្រាប់ចំណេះដឹង ការអនុវត្តល្អ និងបច្ចេកវិទ្យា ដែលគាំទ្រដល់ការខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការរៀបចំ និងអនុវត្តកំណែទម្រង់សេដ្ឋកិច្ច សំដៅពង្រឹងឧស្សាហកម្មដែលមានស្រាប់ បង្កើនតម្លៃបន្ថែមដល់ សេវាកម្ម និងឧស្សាហកម្ម និងគាំទ្រដល់កិច្ចខិតខំប្រឹងប្រែងក្នុងការកសាងសមត្ថភាព បណ្តុះបណ្តាលធនធានមនុស្ស និងសហគ្រាសធុនតូច និងមធ្យម និងកម្មវិធីភាពជាអ្នកដឹកនាំយុវជន៕
