ការនាំចេញប្រេងរបស់រុស្ស៊ីទៅកាន់ប្រទេសឥណ្ឌា ដែលជាអ្នកនាំចូលប្រេងឆៅធំជាងគេទី ៣ របស់ពិភពលោកបន្ទាប់ពីប្រទេសចិន និងសហរដ្ឋអាមេរិក បានកើនឡើងដល់កំណត់ត្រា ១.៦២ លានបារ៉ែលក្នុងមួយថ្ងៃ (bpd) ក្នុងខែកុម្ភៈ។ នេះបើតាមរបាយការណ៍របស់ភ្នាក់ងារហិណ្ឌូកាលពីថ្ងៃអាទិត្យទី ៥ខែមីនាដកស្រង់ដោយអ្នកតាមដានទំនិញ Vortex ។
តួលេខបានបង្ហាញថា រុស្ស៊ីជាអ្នកផ្គត់ផ្គង់ប្រេងឆៅធំបំផុតរបស់ឥណ្ឌាជាប់មករហូតក្នុងរយៈពេលប្រាំខែជាប់ៗគ្នា។ ការនាំចេញប្រេងរបស់រុស្ស៊ីទៅកាន់ប្រទេសឥណ្ឌាក៏បានកើនឡើង ២៨% ពីមួយខែទៅមួយខែ ហើយលើសពីការចែកចាយរួមគ្នាពីប្រទេសអ៊ីរ៉ាក់ និងអារ៉ាប៊ីសាអូឌីត ដែលជាអ្នកផ្គត់ផ្គង់ដ៏សំខាន់របស់ឥណ្ឌាអស់ជាច្រើនទសវត្សរ៍ទៅទៀត។ ការនាំចូលពីអារ៉ាប៊ីសាអូឌីតបានធ្លាក់ចុះ ១៦% ពីមួយខែទៅមួយខែមកត្រឹម ៦៤៧,៨០០បារែលក្នុងមួយថ្ងៃ ខណៈពេលដែលការដឹកជញ្ជូនពីប្រទេសអ៊ីរ៉ាក់ក៏មាននៅត្រឹមប្រហែល ៩៣៩,៩០០ បារែលក្នុងមួយថ្ងៃដែរ។
សរុបជារួមមកដល់ឥឡូវនេះ រុស្ស៊ីបានផ្គត់ផ្គង់ ៣៥% នៃការនាំចូលប្រេងទាំងអស់របស់ឥណ្ឌា ដែលជាការកើនឡើងគួរឱ្យកត់សម្គាល់មួយ ព្រោះចំណែកផ្គត់ផ្គង់របស់រុស្ស៊ីក្នុងទីផ្សាឥណ្ឌាកាលពីឆ្នាំ២០២១ គឺមានតិចជាង ១%។
ការទិញនេះ បានកើតឡើងបន្ទាប់ពីការចាប់ផ្តើមប្រតិបត្តិការយោធារបស់រុស្ស៊ីនៅអ៊ុយក្រែន និង ការដាក់ទណ្ឌកម្មលោកខាងលិច។ ការរឹតបន្តឹងនេះបានបណ្តាលឱ្យរុស្ស៊ីបាត់បង់អ្នកទិញប្រេងលោកខាងលិចជាទម្លាប់របស់ខ្លួន ហើយបានបង្ខំឥណ្ឌាឱ្យស្វែងរកទីផ្សារជំនួសសម្រាប់ថាមពលរបស់ខ្លួនវិញ តាមរយៈការណែនាំការបញ្ចុះតម្លៃ។
បើតាមប្រធានផ្នែកវិភាគអាស៊ីប៉ាស៊ីហ្វិក Serena Huang “ក្រុមហ៊ុនចម្រាញ់ប្រេងរបស់ឥណ្ឌាកំពុងរីករាយនឹងការជំរុញការចម្រាញ់ពីប្រេងឆៅរុស្ស៊ីដែលបានបញ្ចុះតម្លៃ”។
ប្រភព៖ SKY NEWS
