លោក អួន ស៊ីឡុត ប្រធានសមាគមស្វាយចន្ទីកម្ពុជា បានបញ្ជាក់ឱ្យដឹងថា នៅរយៈពេល៣ខែដំបូងឆ្នាំនេះ កម្ពុជាផលិតបានគ្រាប់ស្វាយចន្ទីឆៅចំនួន ២៦ម៉ឺនតោន ក្នុងនោះ នាំចេញទៅកាន់ប្រទេសវៀតណាមមានចំនួនប្រមាណជាង ២៣ម៉ឺនតោន ថយចុះជិត ១៣% ធៀបនឹងរយៈពេលដូចគ្នាកាលពីឆ្នាំមុន ដោយគិតជាទឹកប្រាក់ស្មើនឹង ៣២០លានដុល្លារ។ ។ ការនាំចេញគ្រាប់ស្វាយចន្ទីមានការថយចុះនេះ ត្រូវបាន លោក អួន ស៊ីឡុត អះអាងថា ដោយសារតែតម្លៃគ្រាប់ស្វាយចន្ទីសើមនៅចុងខែមីនាកន្លងទៅមានការធ្លាក់ចុះ។ ដូច្នេះហើយសមាគមស្វាយចន្ទីកម្ពុជា បានណែនាំដល់កសិករជាសមាជិកដែលមានលទ្ធភាព ឱ្យផ្អាកលក់គ្រាប់ស្វាយចន្ទីឆៅឱ្យវៀតណាមមួយរយៈសិន ហើយត្រូវហាលទុកសម្រាប់លក់នៅខែសីហាខាងមុខ ដោយរំពឹងថា នឹងអាចមានតម្លៃកើនខ្ពស់ជាងបច្ចុប្បន្ន។ ប្រធានសមាគមស្វាយចន្ទីកម្ពុជារូបនេះ បានសង្កត់ធ្ងន់ថា នៅអំឡុងខែសីហា គ្រាប់ស្វាយចន្ទីនៅលើទីផ្សារពិភពលោកគឺពុំសូវមានកំណើនច្រើននោះទេ ហើយនៅពេលនោះគ្រាប់ស្វាយចន្ទីស្ងួត គឺអាចលក់បានក្នុងតម្លៃល្អ ចន្លោះពី ៦០០០រៀល ទៅ ៧០០០រៀលក្នុងមួយគីឡូក្រាមឯណោះ ខណៈបច្ចុប្បន្នគ្រាប់ស្វាយចន្ទីសើមអាចលក់បានក្នុងតម្លៃ ៤០០០រៀល ទៅ ៤៦០០រៀលក្នុងមួយគីឡូក្រាមប៉ុណ្ណោះ។
យ៉ាងណាមិញ លោក អួន ស៊ីឡុត បានបញ្ជាក់ទៀតថា នៅដើមខែមេសានេះ បញ្ហាប្រែប្រួលអាកាសធាតុដោយមានភ្លៀងធ្លាក់ និងខ្យល់កន្ត្រាក់ខ្លាំងជាដើមនោះ ក៏បានប៉ះពាល់ដល់ដំណាំស្វាយចន្ទីដែរ ហើយក៏ជាដំណាក់កាលដែលដំណាំស្វាយចន្ទីទទួលរងគ្រោះខ្លាំងជាងគេផងដែរ។ ដោយលោក អួន ស៊ីឡុត ក៏មានក្តីបារម្ភដែរថា ប្រជាកសិករមួយចំនួនអាចនឹងទទួលរងការខាតបង់ដោយសារបញ្ហានេះ។ យ៉ាងណាក៏ដោយចុះ ក៏មានកសិករមួយចំនួនធំ បានប្រមូលផលរួចហើយផងដែរ មុនពេលមានភ្លៀងធ្លាក់ និងខ្យល់កន្ត្រាក់នេះកើតឡើង។
សូមជម្រាបថា ដោយសារបញ្ហាការប្រែប្រួលអាកាសធាតុនេះ សមាគមស្វាយចន្ទីកម្ពុជា ក៏បានទម្លាក់ការព្យាករទិន្នផលស្វាយចន្ទីនៅឆ្នាំ២០២៣នេះ ដោយមកនៅត្រឹមចន្លោះពី ៥០ម៉ឺនតោន ទៅ ៧០ម៉ឺនតោនប៉ុណ្ណោះ ខណៈកាលពីចុងឆ្នាំ ២០២២ កន្លងទៅ សមាគមស្វាយចន្ទីកម្ពុជាបានរំពឹងថា កម្ពុជាអាចផលិតគ្រាប់ឆៅចន្លោះពី ៨០ម៉ឺនតោន ទៅ១លានតោន នៅឆ្នាំ២០២៣៕
