លោក ហុង សុហួរ ប្រតិភូរាជរដ្ឋាភិបាលទទួលបន្ទុកអគ្គនាយកផ្សារមូលបត្រកម្ពុជា បានឱ្យដឹងថា គិតមកដល់ពេលនេះ ផ្សារមូលបត្រកម្ពុជា មានក្រុមហ៊ុនចំនួន១៨ហើយដែលបានបោះផ្សាយ ក្នុងទំហំទឹកប្រាក់ជាង៣០០លានដុល្លារ ។ សម្រាប់ឆ្នាំ ២០២២ ការជួញដូរមានទំហំទឹកប្រាក់ប្រមាណ៥០ម៉ឺនដុល្លារក្នុងមួយថ្ងៃ ស្មើនឹងអ្នកលេងភាគហ៊ុនប្រមាណ ៣០០០នាក់ ខណៈដែលនៅឆ្នាំ២០១៧ មានទំហំទឹកប្រាក់ប្រមាណតែ ១,៥ម៉ឺនដុល្លារប៉ុណ្ណោះ ក្នុងមួយថ្ងៃ។ មានន័យថា ចំនួននេះបានកើនឡើងយ៉ាងខ្លាំង។
លោក បញ្ជាក់ថា ជាមហិច្ឆិតា គឺចង់បានទំហំនៃការជួញដូរលើទឹកប្រាក់ ១០០លានដុល្លារក្នុងមួយថ្ងៃ។ «ប្រទេសយើងតូច តែយើងមានក្តីស្រម័យធំ ។ សូមគាំទ្រទីផ្សារមួយនេះឱ្យកាន់តែច្រើន នោះទីផ្សារមូលបត្ររបស់យើង អាចរីកចម្រើនដូចស្រុកគេដែរ»។ នេះជាការបន្ថែមរបស់លោក ហុង សុហួរ នៅព្រឹកថ្ងៃទី១៩ ខែមេសា ឆ្នាំ២០២៣នេះ។
ថ្លែងនៅក្នុងកម្មវិធីរ៉ូដសូ បោះផ្សាយលក់មូលបត្រកម្មសិទ្ធិសាធារណៈលើកដំបូងរបស់ក្រុមហ៊ុន ម៉េងលី ជេ.គួច អេឌ្យូខេសិន ម.ក អ្នកឧកញ៉ា វេជ្ជបណ្ឌិត គួច ម៉េងលី ក៏បានបញ្ជាក់ថា ដោយមានផែនការច្បាស់លាស់ និងមានចក្ខុវិស័យវែងឆ្ងាយ ក្រុមហ៊ុន ម៉េងលី ជេ. គួច អេឌ្យូខេសិន បានធ្វើសំណើទៅនិយ័តករមូលបត្រកម្ពុជា ក្នុងការចុះបញ្ជីលក់មូលបត្រកម្មសិទ្ធិរបស់ក្រុមហ៊ុនជាផ្លូវការ និងបានអំពាវអោយបងប្អូនប្រជាពលរដ្ឋ ពិសេសអាណាព្យាបាលសិស្ស ចូលរួមទិញជាភាគហ៊ុនជាមួយក្រុមហ៊ុន ដើម្បីអាចពង្រីក និងពង្រឹងខ្លួនកាន់តែខ្លាំងក្លាថែមទៀតលើវិស័យអប់រំ បណ្តុះបណ្តាធនធនមនុស្ស។
បន្ទាប់ពីនិយ័តករមូលបត្រកម្ពុជា បានធ្វើការពិនិត្យ និងសិក្សាច្បាស់លាស់ លើសំណើរសុំដាក់ពាក្យចូលក្នុងបញ្ជីលក់មូលបត្រកម្មសិទ្ធិរបស់ក្រុមហ៊ុន ម៉េងលី ជេ. គួច អេឌ្យូខេសិន និងបានឃើញពីវិសាលភាពការរីកចម្រើន និងការអភិវឌ្ឍរបស់ក្រុមហ៊ុន ទើបនៅថ្ងៃទី៧ ខែមីនា ឆ្នាំ២០២៣ ផ្សារមូលបត្រកម្ពុជា បានសម្រេចឯកភាពជាគោលការណ៍លើពាក្យស្នើសុំពិនិត្យលទ្ធភាពអាចចុះបញ្ជីលក់មូលបត្រកម្មសិទ្ធិ និងនៅថ្ងៃទី២០ ខែមីនា ឆ្នាំ២០២៣ ផ្សារមូលបត្រកម្ពុជា បានឯកភាពលើសំណើដាក់តម្លៃ ២០៨០ រៀលក្នុងមួយភាគហ៊ុន របស់ក្រុមហ៊ុននេះ។
សូមបញ្ជាក់ថា ដើម្បីចុះបញ្ជីលក់មូលបត្រកម្មសិទ្ធិរបស់ក្រុមហ៊ុន ម៉េងលី ជេ. គួច អេឌ្យូខេសិន ជាផ្លូវការបាន ក្រុមហ៊ុនត្រូវតែទទួលបានការអនុញ្ញាតឱ្យបោះផ្សាយលក់មូលបត្រកម្មសិទ្ធិជាសាធារណៈពីនិយ័តករមូលបត្រកម្ពុជា និងត្រូវទទួលបានការបញ្ជាក់យល់ព្រមជាមុនពីផ្សារមូលបត្រកម្ពុជា អំពីការកំណត់ថ្លៃលក់មូលបត្រ និងបំពេញបាននូវលក្ខខណ្ឌចុះបញ្ជីទាំងឡាយបន្តទៀត របស់ផ្សារមូលបត្រកម្ពុជា ពាក់ព័ន្ធនឹងមូលបត្រកម្មសិទ្ធិ៕
