រដ្ឋាភិបាលវៀតណាម បានបញ្ជាក់ថា នាយករដ្ឋមន្ត្រី បានអនុម័តផែនការថាមពលដែលទន្ទឹងរង់ចាំជាយូរមកហើយសម្រាប់ទសវត្សរ៍នេះ ដែលត្រូវការថវិកាចំនួន១៣៤,៧ពាន់លានដុល្លារ សម្រាប់រោងចក្រថាមពល និងបណ្តាញអគ្គិសនីថ្មី។ ផែនការនេះ ត្រូវបានគេស្គាល់ថាជា PDP8 មានគោលបំណងធានាសន្តិសុខថាមពលសម្រាប់ប្រទេសអាស៊ីអាគ្នេយ៍ ខណៈដែលពេលចាប់ផ្តើមការផ្លាស់ប្ដូរពីការពឹងផ្អែកខ្លាំងនាពេលបច្ចុប្បន្ន លើធ្យូងថ្មទៅជាកាបូនអព្យាក្រិតនៅពាក់កណ្តាលសតវត្សរ៍...។
ចំពេលមានជម្លោះផ្ទៃក្នុង និងការងារលើកំណែទម្រង់ដ៏ស្មុគស្មាញ ផែនការនេះត្រូវបានពន្យារពេលជាងពីរឆ្នាំ ហើយត្រូវបានគេមើលឃើញថា មានសេចក្តីព្រាងច្បាប់ជាច្រើនមុនការអនុម័តដោយនាយករដ្ឋមន្ត្រី លោក ផាម មីញជីញ Pham Minh Chinh ដែលឥឡូវនេះ ត្រូវការភ្លើងខៀវជាផ្លូវការពីសភា មុនពេលអនុម័តចុងក្រោយ។ ផែនការនេះមានសារសំខាន់ក្នុងការបើកការវិនិយោគដំបូងចំនួន១៥,៥ ពាន់លានដុល្លារ នៅក្នុងមូលនិធិផ្លាស់ប្ដូរបៃតងដែលបានសន្យានៅវៀតណាមក្នុងខែធ្នូ ដោយក្រុមប្រទេសមានសេដ្ឋកិច្ចជឿនលឿនទាំង៧ (G7) និងប្រទេសអ្នកមានផ្សេងទៀត។ ពាក់កណ្តាលនៃមូលនិធិនឹងបានមកពីវិស័យសាធារណៈ និងនៅសល់ពីអ្នកវិនិយោគឯកជន។ បន្ទាប់ពីកិច្ចព្រមព្រៀងនេះ ក្រុមអ្នកចរចាបានតស៊ូអស់ជាច្រើនខែ ដើម្បីដំណើរការការងារបឋមបែងចែកមូលនិធិនេះ ខណៈដែលមន្ត្រីវៀតណាមបានរក្សាការបន្តរបស់ពួកគេក្នុងការទទួលយកប្រាក់កម្ចី ដែលជាធាតុផ្សំដ៏ធំបំផុតនៃមូលនិធិសាធារណៈដែលបានសន្យា នេះបើតាមមន្ត្រីជាច្រើននាក់ បានប្រាប់សារព័ត៌មានរ៉យទ័រ។អ្នកការទូតម្នាក់មកពីក្រុមម្ចាស់ជំនួយ G7 បានប្រាប់រ៉យទ័រនៅថ្ងៃអង្គារទី១៦ ខែឧសភាថា ការអនុម័តគឺជាជំហានដ៏សំខាន់មួយ ចាំបាច់ដើម្បីដោះសោការផ្ដល់មូលនិធិសម្រាប់គម្រោងកកើតឡើងវិញ ជាពិសេសខ្យល់នៅឆ្នេរសមុទ្រ។ អ្នកការទូតរូបនេះ បានបន្ថែមថា ទោះបីជាយ៉ាងណាក៏ដោយ វាមិនស្របតាមគោលដៅ G7 ទាំងស្រុងនោះទេ ដោយសារប្រទេសនេះនឹងនៅតែពឹងផ្អែកខ្លាំងលើធ្យូងថ្មនៅទសវត្សរ៍នេះ។ ដើម្បីបញ្ចប់ការផ្លាស់ប្ដូររបស់ខ្លួនទៅកាន់អព្យាក្រិតភាពកាបូន ជាមួយនឹងដំណាក់កាលចាកចេញពីការប្រើប្រាស់ធ្យូងថ្មទាំងស្រុងនៅឆ្នាំ២០៥០ រដ្ឋាភិបាលវៀតណាម ប៉ាន់ប្រមាណថា ខ្លួនត្រូវការទឹកប្រាក់ចំនួន៦៥៨ពាន់លានដុល្លារ ដែលក្នុងនោះ ១ភាគ៥ នឹងត្រូវចំណាយក្នុងទសវត្សរ៍នេះ។
ក្រសួងឧស្សាហកម្មដែលរៀបចំឯកសារ បានឱ្យដឹងនៅក្នុងសេចក្តីថ្លែងការណ៍មួយ កាលពីល្ងាចថ្ងៃចន្ទថា នៅក្រោមផែនការនេះ ពាក់កណ្តាលនៃអគារការិយាល័យ និងផ្ទះនៅប្រទេសវៀតណាម នឹងត្រូវបានបំពាក់ដោយបន្ទះសូឡានៅលើដំបូលនៅឆ្នាំ២០៣០។ ប្រទេសនេះ ក៏នឹងមានបំណងបង្កើតថាមពលបៃតងសម្រាប់ ការនាំចេញដែលមានគោលដៅពី ៥ទៅ១០ជីហ្គាវ៉ាត់ (GW) នៅឆ្នាំ២០៣០ ផងដែរ។ យ៉ាងណាមិញ សេចក្តីថ្លែងការណ៍មិនបានផ្តល់ព័ត៌មានលម្អិតពេញលេញនៃផែនការនោះទេ។
សេចក្តីព្រាងនៃ PDP8 ចុះថ្ងៃទី១០ ខែឧសភា និងឃើញដោយរ៉យទ័រ បានបង្ហាញថា ផែនការនេះនឹងកើនឡើងទ្វេដងនៃសមត្ថភាពផលិតថាមពលរបស់ប្រទេសពី ៦៩GW នៅចុងឆ្នាំ២០២០ ដល់ចំនួន ១៥៨GW នៅឆ្នាំ២០៣០។ រោងចក្រថាមពលដែលប្រើប្រាស់ឧស្ម័នក្នុងស្រុក និងឧស្ម័នធម្មជាតិរាវដែលបាននាំចូល (LNG) នឹងក្លាយជាប្រភពចម្បងនៃល្បាយផលិតថាមពលរបស់ប្រទេសនៅឆ្នាំ២០៣០ ដែលស្មើនឹង៣៧,៣៣ GW ឬ២៣,៦% យោងតាមសេចក្តីព្រាង។ យោងតាមសេចក្តីព្រាងច្បាប់នេះ បានឱ្យដឹងថា ធ្យូងថ្មនៅតែមានចំនួន១៩% នៃល្បាយនៅឆ្នាំ២០៣០ បន្ទាប់មកវារីអគ្គិសនីមាន១៨,៥%, ថាមពលខ្យល់១៧,៦% និងថាមពលពន្លឺព្រះអាទិត្យ១៣% នេះបើយោងតាមសេចក្តីព្រាងច្បាប់៕
