ភ្នំពេញ៖ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស .ស.យ.ក) នៅថ្ងៃទី២៩ ខែឧសភានេះ បានប្រគល់ទឹកប្រាក់ចំនួន៥០០លានរៀល ជូនលោក យី វាសនា អគ្គលេខាធិការនៃគណៈកម្មាធិការជាតិប៉ារ៉ាហ្គេមកម្ពុជា ដែលថវិកាទាំងនេះ បានពីយុទ្ធនាការ BeyondThe Games ផ្តួចផ្តើមដោយ ស.ស.យ.ក ពីការបរិច្ចាគ ក្រោមកម្មវិធីបំបែកឯតទគ្គកម្ម «បេះដូងច្រើនជាងគេលើពិភពលោក» ។
លោក ហ៊ុន ម៉ានី ដែលជាប្រធានគណៈកម្មការទទួលបន្ទុកសហការ និងសម្របសម្រួលការងារជាមួយ គណៈកម្មាធិការជាតិ CAMSOC–CAMAPGOC ដែរនោះ មានប្រសាសន៍លើកឡើងថា ជាមួយនិងភាពជោគជ័យ នៃការរៀបចំព្រឹត្តិការណ៍កីឡាស៊ីហ្គេម លើកទី៣២ និងការត្រៀមរៀបចំព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ កម្ពុជាបានបង្ហាញសក្តានុពលជាច្រើនទៅកាន់ពិភពលោក។
លោក យី វាសនា អគ្គលេខាធិការ នៃគណៈកម្មាធិការជាតិប៉ារ៉ា ឡាំពិកកម្ពុជា មានប្រសាសន៍បញ្ជាក់ថាសហភាពសហព័ន្ធយុវជនកម្ពុជា បានបង្ហាញនូវសក្តានុពល និងកសាងកិត្តិយស និងមរតកប្រវត្តិសាស្ត្រ ហើយជាការផ្តល់ឱកាសឲ្យយុវជនទាំងអស់ ចូលរួមនេះជាមោទនភាពរបស់ប្រជាពលរដ្ឋកម្ពុជា។ យុទ្ធនាការប៉ាយ៉ង់ឌឹហ្គេម បិទបេះដូងដើម្បីប្រមូលថវិកាជួយជនពិការ និងចូលរួមសកម្មភាពចូលរួមស៊ីហ្គេម និងប៉ារ៉ាហ្គេម ឲ្យទទួលបានជោគជ័យ។
លោក អគ្គលេខាធិការប៉ារ៉ាហ្គេម មានប្រសាសន៍ឲ្យដឹងបន្តទៀតថា ប៉ារ៉ាហ្គេម មានចំនួន១៤ប្រភេទកីឡា និងមាន៤២៦ វិញ្ញាសាប្រកួត មានកីឡាករជម្រើសជាតិ កម្ពុជាចំនួន២៥២នាក់ ។
លោក យី វាសនា ជឿជាក់កីឡាករ កម្ពុជា និងអាចដណ្តើមបានមេដាយមាសចំនួន ៨គ្រឿង, មេដាយប្រាក់២១គ្រឿង និងមេដាយសំរិទ្ធ២៧គ្រឿង។
សូមបញ្ជាក់ថា កាលពីថ្ងៃទី១១ ខែមេសា ឆ្នាំ២០២៣ កម្ពុជាបានបំបែកឯតទគ្គកម្ម «បេះដូង ច្រើនជាងគេលើពិភពលោក» ដោយជោគជ័យ ដែលមានចំនួនបេះដូងសរុបជាង៣លាន៩សែនបេះដូង ដែលបេះដូងទាំងនោះគឺជាកម្មវត្ថុក្នុងការស្វែងរកថវិកា ដើម្បីជូនទៅកាន់អត្ត ពលិកដែលមានពិការភាព ហើយក្រោមការសម្របសម្រួលរបស់យុទ្ធនាការ BeyondTheGames ដៃគូបរិច្ចាគចំនួន ៥បានស្ម័គ្រចិត្តចូលរួមបរិច្ចាគ ថវិកាជូនទៅគណៈកម្មាធិការជាតិប៉ារ៉ាឡាំពិកកម្ពុជា ៕
