កំពង់ស្ពឺ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងថា ប្រទេសខ្លះកំពុងដំឡើងថ្លៃអគ្គិសនី តែសម្រាប់ប្រទេសកម្ពុជាមិនឡើងថ្លៃទេ។ អគ្គិសនីកម្ពុជាធ្វើអាជីវកម្មមិនចំណេញទេ ហើយបើចំណេញ ចំណេញតិច ដោយរដ្ឋឧបត្ថម្ភទុន។
សម្តេចបានលេីកឡេីងដូចនេះក្នុងឱកាសអញ្ជើញជួបសំណេះសំណាលជាមួយកម្មករនិយោជិត២ម៉ឺននាក់ នៅស្រុកគងពិសី ខេត្តកំពង់ស្ពឺ នៅថ្ងៃទី១៧ ខែមិថុនា ឆ្នាំ២០២៣។
សម្តេចតេជោ ហ៊ុន សែន ក៏បានបញ្ជាក់ថា នៅតាមភូមិជាទូទៅប្រមាណជាង ៩៩ភាគរយ មានអគ្គិសនីប្រើ តែមានតែភូមិថ្មីៗដែលទើបតែកើតបួនប្រាំផ្ទះទេមិនទាន់មានភ្លើងអគ្គិសនីទៅដល់។
អត់ទាន់មានអគ្គិសនីទៅដល់ពិតមែន ក៏ប៉ុន្តែប្រជាពលរដ្ឋប្រើសូឡា ប្រើអាគុយ មិនដុតចន្លុះទេ ពីមុនសម្តេចជិះយន្តហោះ បើក្រឡេកមើលក្រោមឆ្លងកាត់ប្រទេសជិតខាងឆ្លងចូលដល់ព្រំដែនកម្ពុជាងងឹតឈឹង មកដល់ភ្នំពេញទើបភ្លឺ ក៏ប៉ុន្តែឥឡូវចេញពីព្រំដែនថៃ ព្រំដែនឡាវចូលមកក្នុងទឹកដីកម្ពុជា តាមភូមិមានភ្លើងភ្លឺ។ មិនដូចពួកចង្រៃខ្លះវាថា ដឹកនាំប្រទេសខ្ទេចខ្ទាំនោះទេ។
សម្តេចតេជោ ហ៊ុន សែន បានលេីកឡេីងយ៉ាងដូច្នេះថា៖ «ស្បថឲ្យងាប់ទាំងម៉ែទាំងពូជឯងទៅថាពិតជាខ្ទេចខ្ទាំមែនទេ? គ្មានអ្វីអត់ជាងក្រោយឆ្នាំ១៩៧៩ ក្រោយរំលំប៉ុលពតទេ គ្មានអីស៊ី»។
សម្តេចតេជោ ហ៊ុន សែន បានប្រាប់កម្មករថា អាចសួរជីដូនជីតាថា ពីមុនយ៉ាងម៉េចលំបាកយ៉ាងម៉េច ប្រហែលជាឪពុកម្ដាយរបស់ក្មួយៗខ្លះជាកុមារជំនាន់ប៉ុលពត៕
