ទុរេន ជាប្រភេទផ្លែឈើដែលមានភាពល្បីល្បាញ រសជាតិផ្អែមឆ្ញាញ់ ក្លិនក្រអូបឈ្ងុយ ជាពិសេសទុរេនដែលមានប្រភពមកពីទឹកដីស្រុកស្ទឹងត្រង់ ខេត្តកំពង់ចាម ឬគេស្គាល់ថាជា «ទុរេនបែកអន្លង់» ដែលមានមនុស្សនិយមចូលចិត្តបរិភោគច្រើនក្នុងមួយឆ្នាំៗ។
លោក ស ស្រ៊ី ជាម្ចាស់ចំការទុរេនមួយស្ថិតនៅក្នុងតំបន់បែកអន្លង់ មានផ្ទៃដីដាំដុះប្រមាណ ៧ហិកតា ហើយជាមធ្យមអាចប្រមូលទិន្នផលបានរហូតដល់ ៥០តោន ក្នុងមួយឆ្នាំ និងមិនសូវមានបញ្ហាក្នុងការស្វែងរកទីផ្សារលក់នោះឡើយ ថ្វីបើលោកមានភ្ញៀវទៅទិញដល់ចំការផ្ទាល់តែម្ដង។ ដោយឡែកសម្រាប់ឆ្នាំនេះវិញ ការលក់របស់លោកកាន់តែកើនឡើងមួយកម្រិតទៀត ដែលការកើនឡើងនេះដោយសារតែទីផ្សារមានតម្រូវការច្រើន។
