នៅថៃកំពុងមានបញ្ហា ខណៈរថយន្តខ្ទង់ ៩មុឺនគ្រឿងត្រូវបានរឹបអូសនិងលក់ឡៃឡុង

ធនាគារកណ្ដាលរបស់ថៃបានកំណត់ថាបើកម្រិតបំណុលពលរដ្ឋថៃលើស៨០% នៃ GDPសរុប គឺអាចបង្កហានិភ័យដល់កំណើនសេដ្ឋកិច្ចរបស់ថៃរយៈពេលវែងនិងបង្កហានិភ័យដល់ស្ថេរភាពហិរញ្ញវត្ថុរបស់ថៃថែមទៀតផង។ បើមើលមកស្ថានភាពសេដ្ឋកិច្ចបច្ចុប្បន្ន អត្រាអតិផរណានិងអត្រាការប្រាក់ ធនាគារកណ្ដាលថៃបានព្យាករថាប្រសិនបើគ្មានការអនុវត្តពីការរៀបចំឥណទានឡើងវិញទេនោះ កម្រិតបំណុលនឹងរក្សានៅ៨៤% ត្រឹមឆ្នាំ២០២៧។

រដ្ឋលេខាធិការនៃក្រុមប្រឹក្សាអភិវឌ្ឍនសង្គមនិងសេដ្ឋកិច្ចជាតិរបស់ថៃ លោក Danucha Pichayanan បានសង្កត់ធ្ងន់ថា «កម្រិតបំណុលពលរដ្ឋថៃអាចនឹងឈានដល់ចំណុលមួយដែលមានការព្រួយបារម្ភខ្លាំងដូច្នេះសម្រាប់រដ្ឋាភិបាលអាណត្តិបន្ទាប់ត្រូវតែត្រួតពិនិត្យឲ្យម៉ត់ចត់ហើយត្រូវដោះស្រាយបញ្ហានេះតាមរយៈការរៀបចំធ្វើឥណទានឡើងវិញនិងជំរុញចំណេះដឹងផ្នែកហិរញ្ញវត្ថុដល់ពលរដ្ឋថៃ»។

លោកបានបន្ថែមទៀតថាបញ្ហាបំណុលពលរដ្ឋថៃនេះមិនមែនប៉ះពាល់តែពលរដ្ឋនោះទេ ប៉ុន្ដែប៉ះពាល់ដល់សេដ្ឋកិច្ចជាតិទាំងមូល។ ជាពិសេសនឹងកាត់បន្ថយតម្រូវការដែលជាកត្តាជំរុញសេដ្ឋកិច្ច ព្រមទាំងធ្វើឱ្យពលរដ្ឋជួបបញ្ហាហិរញ្ញវត្ថុធ្ងន់ធ្ងរទៀតផង។

គួរបញ្ជាក់ផងដែរថា បច្ចុប្បន្ននេះធនាគារកណ្ដាលថៃកំពុងរៀបចំគ្រប់គ្រងការជួលរថយន្ត និងម៉ូតូ ដើម្បីពង្រឹងការការពារអ្នកប្រើប្រាស់ និងដោះស្រាយបំណុលគ្រួសារ។ ទន្ទឹមនឹងនោះក្រសួងហិរញ្ញវត្ថុក៏បានរាយការណ៍ដែលថា ប្រតិបត្តិការនៅក្នុងវិស័យជួលរថយន្តមានចំនួន ១២.៤%នៃបំណុលគ្រួសារសរុប ហើយចំនួននេះក៏កំពុងបន្តកើនឡើងថែមទៀតផងដែរ៕