ភ្នំពេញៈ ទឹកប្រាក់ជាង ១,២៥ ពាន់លានដុល្លារត្រូវបានកម្ពុជាប្រមូលបានពីការនាំចេញម៉ាស៊ីន ឧបករណ៍អគ្គិសនី និងបំណែករបស់វា នារយៈពេល ៥ ខែដើមឆ្នាំ ២០២៣ កើនជិត ១០០ ភាគរយបើធៀបនឹងរយៈពេលដូចគ្នាឆ្នាំមុន ខណៈក្នុងខែឧសភា ឆ្នាំ ២០២៣ ការនាំចេញកើនលើស ១០០ ភាគរយ។ នេះបើតាមស្ថិតិពាណិជ្ជកម្មនាំចេញនៃអគ្គនាយកដ្ឋានគយ និងរដ្ឋាករកម្ពុជា។
យោងតាមស្ថិតិទំនិញពាណិជ្ជកម្មនាំចេញនៃអគ្គនាយកដ្ឋានគយ និងរដ្ឋាករកម្ពុជា ចន្លោះពីខែមករា ដល់ខែឧសភា ឆ្នាំ ២០២៣ ការនាំចេញទំនិញស្ថិតក្នុងជំពូក (HS ២ខ្ពង់) លេខកូដ ៨៥ ដែលរួមមានម៉ាស៊ីន ឧបករណ៍អគ្គិសនី និងបំណែករបស់វា មានទឹកប្រាក់សរុប ១២៥៣,៤៦ លានដុល្លារ កើន ៩៦ ភាគរយធៀបរយៈពេលដូចគ្នាឆ្នាំ ២០២២ ដែលមាន ៦៣៩,៦ លានដុល្លារ។ ទឹកប្រាក់នេះស្មើ ១៣,៦ ភាគរយនៃការនាំចេញសរុបរបស់កម្ពុជាដែលមានចំនួនទឹកប្រាក់ ៩ ១៨៣,៤៧ លានដុល្លារ។
ដោយឡែកសម្រាប់ខែឧសភា ឆ្នាំ ២០២៣ ការនាំចេញផលិតផលខាងលើ មានចំនួន ២៧៤,៤១ លានដុល្លារ កើនឡើង ១០២,៤ ភាគរយបើធៀបនឹងខែឧសភា ឆ្នាំ ២០២២ ដែលមាន ១៣៥,៥៦ លានដុល្លារ។ ក្នុងខែមេសា ឆ្នាំ ២០២៣ ទឹកប្រាក់នាំចេញទំនិញជំពូកនេះ គឺ ២៤២,២៨ លានដុល្លារ។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ភ្នំពេញប៉ុស្តិ៍ថា ជាបណ្តើរៗកម្ពុជាបានក្លាយជាទីតាំងផលិតគ្រឿងម៉ាស៊ីន ឧបករណ៍អគ្គិសនី និងគ្រឿងបង្គុំ សម្រាប់ផ្គត់ផ្គង់ទីផ្សារពិភពលោក។ កំណើនទឹកប្រាក់នាំចេញផលិតផលទាំងនេះបង្ហាញថាកម្ពុជាពេលនេះមិនពឹងផ្អែកខ្លាំងលើការនាំចេញផលិតផលក្នុងវិស័យវាយនភណ្ឌទៀតទេ។
លោកបន្តថា សម្រាប់មូលហេតុដែលរោងចក្រផលិតផលិតផលទាំងអស់នេះមាននៅកម្ពុជាកាន់តែច្រើន គឺដោយសារកម្ពុជាមានច្បាប់វិនិយោគទាក់ទាញ សម្បូរកម្លាំងពលកម្មជំនាញនិងមានតម្លៃសមរម្យ មានទីផ្សារទទួលទិញច្រើន និងជាពិសេសកម្ពុជាមានប្រព័ន្ធអនុគ្រោះពន្ធនាំចូលទំនិញទៅកាន់ប្រទេសជាច្រើន។
លោកថ្លែងថា៖ «តាមរយៈកំណើនការនាំចេញនេះ គឺកម្ពុជាក៏នឹងមានឱកាសទាក់ទាញក្រុមហ៊ុនធំៗឱ្យមកបើករោងចក្រផលិតគ្រឿងយន្តធំៗដែលមានបច្ចេកវិទ្យាទំនើបៗសម្រាប់នាំចេញទៅទីផ្សារអន្តរជាតិផងដែរ»។
លោកបន្តថា ក្នុងគោលបំណងត្រៀមទទួលរោងចក្រឧស្សាហកម្មធំៗ រដ្ឋាភិបាលកម្ពុជាក៏កំពុងរៀបចំហេដ្ឋារចនាសម្ព័ន្ធ និងអភិវឌ្ឍន៍ធនធានមនុស្សរបស់ខ្លួនផងដែរដើម្បីចាំទទួលគម្រោងវិនិយោគទាំងអស់នោះ។
ក្រុមប្រឹក្សាអភិវឌ្ឍន៍កម្ពុជា កាលពីសប្តាហ៍មុន ទើបអនុម័តឱ្យក្រុមហ៊ុន ៣ សាងសង់រោងចក្រផលិតឧបករណ៍អគ្គិសនី និងបំណែករបស់វា ដោយរួមមាន ក្រុមហ៊ុន Rongdasheng Industrial Co., Ltd, ក្រុមហ៊ុន TG-Brother Electronic Lighting Co., Ltd. និងក្រុមហ៊ុន Boxu Crafts Co., Ltd.។ គម្រោងទាំង ៣ មានទុនវិនិយោគសរុប ១២,៥ លានដុល្លារ។
ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា លោកតែ តាំងប៉ បាននិយាយថា ឱកាសក្នុងការទាក់ទាញអ្នកវិនិយោគឱ្យមកបណ្តាក់ទុននឹងមានកាន់តែច្រើនបើតម្លៃអគ្គិសនីនៅកម្ពុជាអាចធ្លាក់ទាបជាងពេលនេះ ឬប្រហាក់ប្រហែលប្រទេសជិតខាង។
លោកថ្លែងថា៖ «តម្លៃប្រេង និងតម្លៃអគ្គិសនី ជាកត្តាគួបផ្សំដ៏សំខាន់ក្នុងការទាក់ទាញវិនិយោគគិន ព្រោះប្រេង និងអគ្គិសនី គឺជាធាតុផ្សំដ៏សំខាន់សម្រាប់ផ្នែកផលិតកម្ម ក្រៅពីការចំណាយលើវត្ថុធាតុដើម និងកម្លាំងពលកម្ម។ កាលណាតម្លៃប្រេង រួមទាំងតម្លៃអគ្គិសនីមានស្ថិរភាព និងតម្លៃទាប វិនិយោគិននឹងមើលឃើញឱកាសផ្សេងៗចេញពីកត្តាទាំងអស់នោះ»។
ទិន្នន័យពីអគ្គនាយកដ្ឋានគយ និងរដ្ឋាករកម្ពុជា បង្ហាញថា ក្នុងឆ្នាំ ២០២២ កម្ពុជាប្រមូលបានប្រាក់ ១ ៩៩៨,១៩ លានដុល្លារ កើន ៨៤,៨ ភាគរយបើធៀបនឹងឆ្នាំ ២០២១ ដែលមានចំនួន ១ ០៨១,១ លានដុល្លារ។ ប្រាក់នាំចេញម៉ាស៊ីន និងឧបករណ៍អគ្គិសនី និងបំណែករបស់វា ស្មើនឹង ៨,៩ ភាគរយនៃចំនួនទឹកប្រាក់នាំចេញសរុប៕
