អន្តរជាតិ៖ ប្រទេសចិនបានលក់រថយន្តទៅក្រៅប្រទេសបានច្រើនជាងប្រទេសដទៃទៀតនៅក្នុងត្រីមាសទី១ ក្នុងឆ្នាំនេះ ដោយសារការកើនឡើងពីការលក់ទៅឱ្យអតិថិជននៅក្នុងប្រទេសរុស្ស៊ី។
នេះបើយោងតាមការចេញផ្សាយដោយសារព័ត៌មានXinhua។ 
តាមការដកស្រង់ទិន្នន័យដែលចេញផ្សាយដោយក្រុមហ៊ុនផ្តល់ប្រឹក្សាផ្នែកហិរញ្ញវត្ថុលំដាប់ ពិភពលោក AlixPartners ដែលមានមូលដ្ឋាននៅសហរដ្ឋអាមេរិកបានចេញផ្សាយថា ប្រទេសមហាអំណាចអាស៊ីមួយនេះ បាននាំចេញរថយន្តចំនួន ១,០៧ លានគ្រឿងក្នុងរយៈពេល ៣ ខែដំបូងក្នុងឆ្នាំនេះ ដោយវ៉ាដាច់ប្រទេសជប៉ុន ដែលជាអ្នកនាំមុខជាយូរមកហើយ។ ប្រទេសចិន បានចែកចាយរថយន្តចំនួន ១១២,០០០ គ្រឿងទៅកាន់ប្រទេសរុស្ស៊ីក្នុងរយៈពេលពេញមួយឆ្នាំមុន។ 
ក្រុមហ៊ុនផលិតរថយន្ត របស់ប្រទេសលោកខាងលិចភាគច្រើន បានបោះបង់ចោលការនាំចេញរថយន្តទៅកាន់ប្រទេសរុស្ស៊ី ដោយសារការលុកលុយរបស់ប្រទេសនេះលើប្រទេសអ៊ុយក្រែន។ ភាពជោគជ័យនៃម៉ាកយីហោរបស់ចិន នៅប្រទេសផ្សេងទៀតនៅអឺរ៉ុប និងអាមេរិក នៅមានកម្រិតនៅឡើយ ដោយក្រុមហ៊ុនចិនបានលក់រថយន្តត្រឹមតែ ៩សែនគ្រឿងប៉ុណ្ណោះនៅទីនោះកាលពីឆ្នាំមុន។
លោក Stephen Dyer នាយកគ្រប់គ្រងក្រុមហ៊ុន AlixPartners នៅទីក្រុងសៀងហៃ និងជាអតីតនាយកប្រតិបត្តិក្រុមហ៊ុន Ford Motor Co. បានប្រាប់អ្នកយកព័ត៌មានថា "យើងជឿថាពេលនេះជាពេលដែលម៉ាកយីហោចិន ចាប់ផ្តើមបញ្ចេញឥទ្ធិពលរំខានរបស់ពួកគេ នៅលើទីផ្សារលោកខាងលិចហើយ"៕
