កូរ៉េខាងត្បូង និងសហរដ្ឋអាមេរិក កំពុងរៀបចំកិច្ចប្រជុំដំបូងរបស់ក្រុមការងារប្រឹក្សាយោបល់នុយក្លេអ៊ែថ្មី

ឯកអគ្គរដ្ឋទូតកូរ៉េខាងត្បូងប្រចាំនៅសហរដ្ឋអាមេរិកបានឱ្យដឹងកាលពីថ្ងៃពុធថា កូរ៉េខាងត្បូង និងសហរដ្ឋអាមេរិក កំពុងធ្វើការដើម្បីរៀបចំកិច្ចប្រជុំដំបូងរបស់ក្រុមការងារប្រឹក្សាយោបល់នុយក្លេអ៊ែរថ្មី (NCG)។ លោកថា សម្ព័ន្ធមិត្តទាំងពីរបានធ្វើឱ្យមាន«វឌ្ឍនភាព»ឆ្ពោះទៅរកការបើកកិច្ចប្រជុំលើកដំបូងនៃក្រុមពិគ្រោះយោបល់នេះ ដែលត្រូវបានបង្កើតឡើងក្រោមសេចក្តីប្រកាសរួមទីក្រុងវ៉ាស៊ីនតោនរវាងប្រធានាធិបតីកូរ៉េខាងត្បូង លោក យូន ស៊ុក យើល និងប្រធានាធិបតីសហរដ្ឋអាមេរិក លោក ចូ បៃដិន កាលពីចុងខែមេសាកន្លងទៅ។នេះបើតាមការចុះផ្សាយដោយទីភ្នាក់ងារយ៉ុនហាប់។ លោក ឆូ យុន ដុង (Cho Hyun-dong) ឯកអគ្គរដ្ឋទូតកូរ៉េខាងត្បូង នៅសហរដ្ឋអាមេរិក បានប្រាប់អ្នកសារព័ត៌មានថា នៅពេលដែលការគំរាមកំហែងរបស់កូរ៉េខាងជើងកំពុងលេចចេញជារូបរាងនោះ ការពិភាក្សាសម្រាប់កិច្ចប្រជុំដំបូងរបស់ក្រុមពិគ្រោះយោបល់នុយក្លេអ៊ែរ (NCG) ដែលព្រមព្រៀងគ្នារវាងដោយកូរ៉េខាងត្បូង និងសហរដ្ឋអាមេរិក កំពុងដំណើរការ។ លោកបានបន្ថែមទៀតថា ជាពិសេសប្រទេសសម្ព័ន្ធមិត្តទាំងពីរកំពុងចែករំលែកព័ត៌មាន និងពិភាក្សាអំពីវិធានការរារាំងនៅគ្រប់កម្រិត ចាប់តាំងពីពេលដែលប្រទេសកូរ៉េខាងជើងបានប្រកាសអំពីការបាញ់បង្ហោះយានអវកាសជាលើកទីពីរក្រោយពីបរាជ័យក្នុងការបង្ហោះផ្កាយរណបឈ្លបយកការណ៍កាលពីខែឧសភា។គួររំលឹកឡើងវិញថា សេចក្តីថ្លែងការណ៍វ៉ាស៊ីនតោនត្រូវបានចុះហត្ថលេខាដោយប្រធានាធិបតី យូន ស៊ុក យើល និងប្រធានាធិបតីសហរដ្ឋអាមេរិក លោក ចូ បៃដិន ក្នុងអំឡុងពេលកិច្ចប្រជុំកំពូលទ្វេភាគីនៅខែមេសាកន្លងទៅ។ ក្រោមសេចក្តីប្រកាសនេះ សហរដ្ឋអាមេរិកបានបញ្ជាក់អំពីការប្តេជ្ញាចិត្តរបស់ខ្លួនជាថ្មី ក្នុងការផ្តល់នូវមធ្យោបាយទប់ស្កាត់កាំជ្រួចកូរ៉េខាងជើងបន្ថែមទៀត ឱ្យកូរ៉េខាងត្បូង រួមទាំងការប្រើប្រាស់នុយក្លេអ៊ែរផង ដើម្បីជួយការពារសម្ព័ន្ធមិត្តកូរ៉េខាងត្បូង។