វិស័យឧស្សាហកម្មកម្ពុជា មានកំណើនជារៀងរាល់ឆ្នាំ ពោលគឺមានការធ្លាក់ចុះតែអំឡុងឆ្នាំ ២០២០-២០២១ ដែលកើតមានវិបត្តិកូវីដ-១៩ប៉ុណ្ណោះ, ប៉ុន្តែក្រោយមកមានការកើនឡើងជាបន្តបន្ទាប់។ ជាក់ស្តែងនៅក្នុងឆ្នាំ ២០២៣នេះ មានការរំពឹងថា នឹងមានកំណើនដល់ទៅ ៣៩ភាគរយ នៃការចូលរួមចំណែកទៅលើផលិតផលក្នុងស្រុកសរុប GDP។ នេះបើតាមការបញ្ជាក់របស់លោក ហេង សុខគង់ រដ្ឋលេខាធិការ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍។
លោកបានលើកឡើងថា ការកើនឡើងនេះ ដោយសាររាជរដ្ឋាភិបាលកម្ពុជា បានបង្កើតនូវលិខិតបទដ្ឋានគតិយុត្តជាបន្តបន្ទាប់ នៅក្នុងគោលដៅជំរុញ និងលើកកម្ពស់វិស័យធុរកិច្ចនៅកម្ពុជា ជាពិសេសទាក់ទាញវិនិយោគិនឱ្យកាន់តែប្រសើរ។
បើតាមលោក ហេង សុខគង់ បញ្ជាក់ថា ច្បាប់វិនិយោគថ្មី បានទាក់ទាញវិនិយោគិនយ៉ាងច្រើនឱ្យចូលមកដាក់ទុនវិនិយោគនៅកម្ពុជា ក្រោយពីច្បាប់នេះចេញជាស្ថាពរ។ មន្រ្តីជាន់ខ្ពស់ក្រសួងឧស្សាហកម្ម បានបន្ថែមដូច្នេះថា« នៅក្រោយបោះឆ្នោត នឹងមានបណ្តាក្រុមវិនិយោគិនថ្មីៗ មកបោះទុនរកស៊ីនៅកម្ពុជាបន្ថែមទៀត ជាពិសេសវិស័យ Non Garment ដូចជា បច្ចេកវិទ្យា វិនិយោគលើធនធានរ៉ែ កម្មន្តសាល និងបង្កើតរោងចក្រផលិតឈីប ជាដើម»។
លោក សុខគង់ បានសង្កត់ធ្ងន់ថា បច្ចុប្បន្ននេះកម្ពុជា ចិន មានទំនាក់ល្អទាំងសេដ្ឋកិច្ច ពាណិជ្ជកម្ម និងនយោបាយ។ លោកថ្លែងបែបនេះថា« បើគិតទៅវិនិយោគិនចិនមកបណ្តាក់ទុនលេខ១នៅកម្ពុជាយើង រយៈពេលចុងក្រោយនេះ ពោលគឺប្រជែងជាមួយជប៉ុន និងកូរ៉េខាងត្បូង»។
ទោះយ៉ាងណាលោកថា កម្ពុជា ស្វាគមន៍រាល់អ្នកវិនិយោគទាំងអស់ ដែលមានបំណងចូលមកបណ្តាក់ទុននៅកម្ពុជា ក្នុងគោលបំណងប្រែក្លាយចក្ខុវិស័យប្រទេសដែលមានចំណូលមធ្យមកម្រិតខ្ពស់នៅឆ្នាំ ២០៣០ និងចំណូលខ្ពស់ នៅឆ្នាំ ២០៥០ខាងមុខ។
ជាមួយនឹងកំណើននេះ ធនាគារជាតិ ក៏បានព្យាករថា នៅឆ្នាំ២០២៣ សេដ្ឋកិច្ចកម្ពុជា នឹងមានកំណើន ៥,៥% ជាមួយនឹងកម្រិតអតិផរណាទាបប្រមាណ ២%៕
