ភ្នំពេញ៖ កម្ពុជានាំចេញកសិផល មានបរិមាណសរុបជាង ៣,៩លានតោន ក្នុងឆមាសទី១ ឆ្នាំ២០២៣នេះ ទទួលបានចំណូលប្រមាណជាង ២,៤ពាន់លានដុល្លារ ។
របាយការណ៍ពីក្រសួងកសិកម្ម រុក្ខាប្រមាញ់និងនេសាទ បង្ហាញថា ការនាំចេញអង្ករ មានចំនួនជិត ៣៣ម៉ឺនតោន ស្រូវចំនួន ជាង១,២លានតោន និងកសិផលក្រៅពីស្រូវ-អង្ករចំនួនជាង ២,៣លានតោន និងនាំចេញទៅកាន់ទិសដៅ ៦៧ប្រទេស។
ក្រសួងបញ្ជាក់ក្នុងរបាយការណ៍ថា ចំណូលលើការនាំចេញកសិផលធ្លាក់ចុះ ២២.៥ ភាគរយ ធៀបនឹងរយៈពេលដូចគ្នាកាលពីឆ្នាំ២០២២ មូលហេតុដែលការនាំចេញកសិផល ដោយសារ វិបត្តិសេដ្ឋកិច្ចសកលលោក បណ្ដាលឱ្យការបញ្ជាទិញទំនិញគ្រប់ប្រភេទថយចុះ និងបង្អាក់ចរន្តពាណិជ្ជកម្ម និងផលិតកម្មដំណាំមួយចំនួនមានការថយចុះ ដោយសារស្ថានភាពមិនច្បាស់លាស់ខាងទីផ្សារ និងបញ្ហាបម្រែបម្រួលអាកាសធាតុ នាំឱ្យប៉ះពាល់ដល់ទិន្នផល និងគុណភាពនៃដំណាំ។
ទន្ទឹមនេះ កំណើននៃការស្រូបទាញយកវត្ថុធាតុដើមក្នុងស្រុក ដើម្បីផលិតចំណីសត្វ និងការកែច្នៃក្នុងប្រទេសបណ្ដាលឱ្យមានកំណើននៃ ការស្រូបយកផលិតផលស្រស់មកកែច្នៃ ក៏ធ្វើឱ្យការនាំចេញធ្លាក់ចុះផងដែរ។
សម្តេចតេជោ ហ៊ុន សែន នាយករដ្ឋមន្រ្តីកម្ពុជា លើកឡើងកាលពីខែមិថុនា កន្លងទៅថា វិស័យកសិកម្ម នៅតែជាសសរស្តម្តសេដ្ឋកិច្ចមួយដ៏សំខាន់ បើទោះបីវិស័យនេះ កំពុងធ្លាក់ចុះនៃការរួមចំណែកចូលសេដ្ឋកិច្ចជាតិ ដោយសារការកើនឡើងនៃវិស័យឧស្សាហកម្ម និងសេវាកម្ម។
សម្តេចតេជោ ក៏បានលើកឡើងថា ការប្រើប្រាស់គ្រឿងយន្តក្នុងវិស័យកសិកម្ម កំពុងមាននិន្នាការកើនឡើង ឆ្ពោះទៅរកទំនើបកម្មកសិកម្ម ខណៈការប្រើប្រាស់គោក្របីសម្រាប់ការងារកសិកម្ម រួមចំណែកតិចតួចប៉ុណ្ណោះ៕ អត្ថបទ៖ វណ្ណៈ
