កាលពីថ្ងៃព្រហស្បតិ៍កន្លងទៅ ប្រភពផ្លូវការមួយពីក្រសួងថាមពលអារ៉ាប៊ីសាអូឌីតបាននិយាយថា យ៉ាងហោចណាស់មួយខែទៀតនាខែកញ្ញាខាងមុខ ខ្លួននឹងបន្តការកាត់បន្ថយការផ្គត់ផ្គត់ប្រេងចំនួនប្រមាណ ១លានបារ៉ែលក្នុងមួយថ្ងៃបន្ថែមទៀត។
នេះបើតាមការចុះផ្សាយពីសារព័ត៌មាន CNN។មិនត្រឹមតែប៉ុណ្ណោះ ប្រភពដដែលបានបន្តទៀតថា ការកាត់បន្ថយការផ្គត់ផ្គត់នេះអាចនឹងកាត់បន្ថយបន្ថែមទៀត ក្នុងគោលដៅសំដៅគាំទ្រដល់ស្ថិរភាព និងតុល្យភាពនៃទីផ្សារប្រេង។
ជាមួយគ្នានោះ រុស្សីបានប្រកាសពីផែនការកាត់ការបន្ថយការនាំចេញប្រេងចំនួន ៣០០,០០០បារ៉ែលក្នុងមួយថ្ងៃនាខែកញ្ញាខាងមុខផងដែរ។
ដោយឡែក ទិន្និន័យកាលពីថ្ងៃព្រហស្បតិ៍បានបង្ហាញថា តំលៃប្រេងរបស់សហរដ្ឋអាមេរិកបានកំពុងមានការឡើងថ្លៃ ១,៦% ឬប្រមាណ ៨១,០៥ដុល្លារអាមេរិកក្នុងមួយបារ៉ែល ខណៈឯប្រេងឆៅ Brent ដែលជាស្តង់ដារពិភពលោកនោះបានកើនឡើងដល់ទៅ ១,៥% ឬប្រមាណ ៨៤,៥០ដុល្លារក្នុងមួយបារ៉ែលផងដែរ។
ជម្រាបផងថា វាជាលើកទីពីរហើយ ដែលអារ៉ាប៊ីសាអូឌីត ប្រកាសកាត់បន្ថយការនាំចេញ ខណៈជាលើកដំបូងបានប្រកាសកាលពីខែមិថុនាកន្លងទៅ បន្ទាប់ពីកិច្ចប្រជុំនៃសម្ព័ន្ធភាពរវាងអង្គការនៃប្រទេសនាំចេញប្រេងរុស្ស៊ី និងបណ្តាលប្រទេសផលិតខ្នាតតូចមួយចំនួន៕
