ភ្នំពេញៈ លោកនាយករដ្ឋមន្ត្រី ហ៊ុន សែន ថ្លែងថាកម្ពុជានឹងស្វាគមន៍ប្រតិភូឥណ្ឌូនេស៊ីដែលនឹងធ្វើដំណើរមកកាន់ប្រទេសកម្ពុជានាពេលខាងមុខដើម្បីពិភាក្សាលើការនាំអង្ករចេញពីកម្ពុជា។
លោក ហ៊ុន សែន ថ្លែងដូច្នេះក្នុងជំនួបតាមប្រព័ន្ធទូរស័ព្ទជាមួយលោក ចូកូ វីដូដូ (Joko Widodo) ប្រធានាធិបតីឥណ្ឌូនេស៊ី នាថ្ងៃទី១១ ខែសីហា។
លោក អ៊ាង សុផល្លែត ជំនួយការផ្ទាល់លោក ហ៊ុន សែន បានឱ្យដឹងថា កិច្ចសន្ទនានេះបានផ្ដោតទៅលើការយកចិត្តទុកដាក់ទៅលើបញ្ហាសន្តិសុខស្បៀង ដែលក្នុងនោះលោក វីដូដូ បានបញ្ជាក់នូវបំណងក្នុងការនាំអង្ករចេញពីកម្ពុជា ហើយនៅពេលដ៏ខ្លីខាងមុខនេះលោកស្នើសុំការអនុញ្ញាតពីលោក ហ៊ុន សែន ដើម្បីបញ្ជូនប្រតិភូមកពិភាក្សាលើករណីនេះផងដែរ។
លោក អ៊ាង សុផល្លែត បញ្ជាក់ថា៖ «សម្តេចតេជោក៏បានមានប្រសាសន៍ថាកម្ពុជា នឹងស្វាគមន៍ចំពោះប្រតិភូឥណ្ឌូនេស៊ីដែលនឹងមកកម្ពុជានៅពេលខាងមុខ ក្នុងការពិភាក្សាលើការនាំអង្ករចេញពីកម្ពុជា»។
លោក ហ៊ុន សែន លើកឡើងអំពីលទ្ធភាពដែលអ្នកវិនិយោគឥណ្ឌូនេស៊ីអាចដាក់ទុន១០០ភាគរយនៅកម្ពុជាលើការបង្កើតជារោងម៉ាស៊ីនកិនស្រូវ ឃ្លាំងស្តុក និងបណ្ដាញទិញស្រូវពីប្រជាកសិករ ដើម្បីធានាស្ថិរភាពសម្រាប់ការនាំចេញនាពេលខាងមុខ។
បើតាមលោក អ៊ាង សុផល្លែត លោក វីដូដូ បានបញ្ជាក់ថា លោកទន្ទឹងរង់ចាំក្នុងការបំពេញការងារនានាជាមួយលោក ហ៊ុន ម៉ាណែត នាយករដ្ឋមន្ត្រីកម្ពុជាក្នុងអាណត្តិថ្មី នៅក្នុងកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធនៅប្រទេសឥណ្ឌូនេស៊ីនៅចុងឆ្នាំ២០២៣នេះ។
លោក អ៊ាង សុផល្លែត បញ្ជាក់ថា៖ «ក្នុងកិច្ចប្រជុំកំពូលនោះ ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត ដែលជានាយករដ្ឋមន្ត្រីថ្មីរបស់កម្ពុជា នឹងដឹកនាំគណៈប្រតិភូទៅចូលរួមកិច្ចប្រជុំកំពូលដ៏មានសារៈសំខាន់មួយនេះផងដែរ»៕
