បន្ទាយមានជ័យៈ អភិបាលខេត្តបន្ទាយមានជ័យ លោក អ៊ុំ រាត្រី បានបញ្ជាឱ្យអាជ្ញាធរក្រុងប៉ោយប៉ែត រុះរើស្លាកផ្សាយពាណិជ្ជកម្មទាក់ទងនឹងល្បែងភ្នាល់អនឡាញ នៅលើផ្លូវជាតិលេខ៥ នៅទល់មុខទីស្នាក់ការគយ និងរដ្ឋាករប៉ោយប៉ែតជាបន្ទាន់ បន្ទាប់ពីមានការរិះគន់ និងបង្ហាញការមិនពេញចិត្តយ៉ាងច្រើនពីសំណាក់ប្រជាពលរដ្ឋ។
រដ្ឋបាលក្រុងប៉ោយប៉ែត នៅថ្ងៃទី១៣ ខែសីហា បានប្រកាសឱ្យដឹងថា អនុវត្តតាមបទបញ្ជារបស់លោក អ៊ុំ រាត្រី អភិបាលខេត្តបន្ទាយមានជ័យ នៅម៉ោង២រសៀលថ្ងៃដដែលនោះ ក្រុមការងារក្រុងប៉ោយប៉ែតបានចុះរុះរើស្លាកផ្សាយពាណិជ្ជកម្មនៅលើផ្លូវជាតិលេខ៥ ទល់មុខទីស្នាក់ការគយ និងរដ្ឋាករប៉ោយប៉ែតនេះ រួចរាល់ហើយ។
រដ្ឋបាលក្រុងប៉ោយប៉ែត បានបញ្ជាក់ថា ៖ «ការដាក់ស្លាកនេះពុំមានច្បាប់អនុញ្ញាត និងមិនមានការស្នើពីអាជ្ញាធរមានសមត្ថកិច្ចណាមួយឡើយ»។ ជាមួយគ្នានេះ រដ្ឋបាលក្រុង ក៏បានប្រកាសទទួលយករាល់មតិរិះគន់ ដើម្បីស្ថាបនាពីសំណាក់ប្រជាពលរដ្ឋទាំងអស់ផងដែរ។
លោក គាត ហ៊ុល អភិបាលក្រុងប៉ោយប៉ែត នៅថ្ងៃទី១៣ ខែសីហា បានថ្លែងថា ប្រជាពលរដ្ឋបានថត និងធ្វើការផ្សព្វផ្សាយនៅលើបណ្តាញសង្គមហ្វេសប៊ុក និងការចុះផ្សាយពីសំណាក់សារព័ត៌មាន ដោយសម្តែងមិនពេញចិត្ត និងប្រតិកម្មខ្លាំងៗចំពោះស្លាកផ្សាយពាណិជ្ជកម្មនេះ។ ទោះជាយ៉ាងណា ស្លាកផ្សាយពាណិជ្ជកម្មនេះមិនត្រូវបានអនុញ្ញាត ឱ្យដាក់ផ្សាយពីអាជ្ញាធរពាក់ព័ន្ធនោះទេ។
លោក គាត ហ៊ុល បានបន្តថា លោកទើបតែដឹងនៅពេលដែលមានការប្រតិកម្មកពីមហាជន នៅលើបណ្តាញសង្គម ហើយលោកក៏បានស្នើសុំគោលការណ៍ពីអភិបាលខេត្តបន្ទាយមានជ័យ ហើយលោកអភិបាលខេត្តក៏បានបញ្ជាឱ្យរុះរើបន្ទាន់ ហើយពេលនេះ ក្រុមការងារក្រុងក៏បានរុះរើចេញអស់ហើយដែរ។
លោកបញ្ជាក់ទៀតថា ៖ «ស្លាកផ្សាយពាណិជ្ជកម្មនេះមានតែ១ទីតាំងនេះទេ ហើយរដ្ឋបាលខេត្តបានកោះ ហៅម្ចាស់ស្លាកនេះ មកណែនាំ និងអប់រំរួចរាល់ផងដែរ។ យើងគ្រាន់តែធ្វើការណែនាំគាត់សិន ដោយមិនមានវិធានការណាមួយនោះទេ»។
សូមបញ្ជាក់ថា ស្លាកផ្សាយពាណិជ្ជកម្មដែលអាជ្ញាធរក្រុងប៉ោយប៉ែតធ្វើការរុះរើនេះ ជារបស់ក្រុមហ៊ុនភ្នាល់ JUN88 និង789 BET ដែលមានតាំងបង្ហាញបុរសកាន់បាល់ ព្រមទាំងមានការសរសេរភាសាខ្មែរ និងថៃ ថា «ប្រជាជនថៃ ពួកយើងមកហើយ!»។ កត្តានេះហើយ បានធ្វើឱ្យមហាជន ដែលធ្វើដំណើការឆ្លងកាត់ទីតាំងនេះ ផ្ទុះការរិះគន់ និងមិនពេញចិត្តចំពោះអាជ្ញាធរក្រុង៕
