ធនាគារកណ្តាលអាម៉េរិកនឹងបញ្ចុះអត្រាការប្រាក់ចាប់ពីពាក់កណ្តាលឆ្នាំ២០២៤

អ្នកជំនាញនៅធនាគារ Goldman Sachs គិតថាធនាគារកណ្តាលអាម៉េរិក Fed នឹងចាប់ផ្តើមទម្លាក់អត្រាការប្រាក់នៅ០,២៥ភាគរយមកវិញចាប់ពីត្រីមាសទី២ ឆ្នាំ២០២៤ ហើយរំពឹងថាក្នុងរយៈពេលវែង អត្រាការប្រាក់នឹងត្រលប់ទៅកម្រិតស្ថិរភាពចន្លោះពី ៣ភាគរយទៅ៣,២៥ភាគរយ ។

នៅក្នុងរបាយការណ៍ទស្សនវិស័យសេដ្ឋកិច្ចរបស់ Goldman Sachs ដែលបានចេញផ្សាយកាលពីថ្ងៃទី១៣ ខែសីហា សេដ្ឋវិទូ Jan Hatzius និង David Mericle បានសង្កត់ធ្ងន់ថា ការព្យាករគឺផ្អែកលើការរំពឹងទុកនៃអត្រាការប្រាក់ត្រឡប់មកធម្មតា បន្ទាប់ពីការរឹតបន្តឹងបច្ចុប្បន្ន ខណៈដែលអតិផរណាបានកើនឡើងជិតដល់គោលដៅ។

ក្រុមហ៊ុន Goldman បានព្យាករថា ការកាត់បន្ថយអត្រាការប្រាក់នឹងចាប់ផ្តើមនៅក្នុងត្រីមាសទីពីរនៃឆ្នាំ២០២៤។ ក្រុមហ៊ុនដដែលបានរំពឹងថា ធនាគារកណ្តាលអាម៉េរិក (Fed) មិនដំឡើងអត្រាការប្រាក់នៅក្នុងកិច្ចប្រជុំខែកញ្ញាខាងមុខនេះទេ។

« តម្រូវការមានលក្ខណៈធម្មតា មិនមែនជាការលើកទឹកចិត្តបន្ទាន់ដើម្បីកាត់បន្ថយនោះទេ។ ដូច្នេះហើយយើងរំពឹងថា Fed នឹងរក្សាអត្រាថេរក្នុងរយៈពេលខ្លី។ បន្ទាប់មកពួកគេអាចកាត់បន្ថយអត្រាការប្រាក់ ០,២៥ភាគរយជារៀងរាល់ត្រីមាស។ ប៉ុន្តែយើង ក៏មិនប្រាកដពេកអំពីល្បឿននេះដែរ»​។ នេះជាការអះអាងក្រុមអ្នកសេដ្ឋកិច្ចរបស់ធនាគារ Goldman Sachs ។ 

កាលពីសប្តាហ៍មុនទិន្នន័យបានបង្ហាញថា សន្ទស្សន៍តម្លៃទំនិញប្រើប្រាស់របស់អាម៉េរិក (CPI) ក្នុងខែកក្កដាបានកើនឡើងច្រើនជាងការរំពឹងទុកដែលមាន ៣,២ភាគរយបើធៀបគ្រាដូចគ្នានៅឆ្នាំមុន។ នេះជាលើកដំបូងក្នុងរយៈពេល១៣ ខែដែលអតិផរណារបស់អាម៉េរិកបានកើនឡើងម្តងទៀត។ យ៉ាងណាមិញ CPI បានបង្កើនល្បឿនជាចម្បងដោយសារតែកម្រិតមូលដ្ឋានទាបនៃខែកក្កដាឆ្នាំ២០២២។

អតិផរណាស្នូល (មិនរាប់បញ្ចូលតម្លៃអាហារ និងឥន្ធនៈដែលប្រែប្រួល) បានកើនឡើង ៤,៧ភាគរយ។ នេះគឺជារយៈពេល៤ខែជាប់ៗគ្នា ដែលអតិផរណាស្នូលបានត្រជាក់ចុះបន្តិចម្តងៗ។ តម្លៃទាបនៃរថយន្តជជុះ និងសំបុត្រយន្តហោះបានរួមចំណែកធ្វើឱ្យ CPI ស្នូលធ្លាក់ចុះ។

កម្រិតអតិផរណាខ្ពស់របស់ពេលវែងបានដាក់សម្ពាធដល់ប្រជាជនអាម៉េរិកអស់រយៈពេលជាង ២ឆ្នាំ។ នេះបានជំរុញឱ្យ Fed ធ្វើអន្តរាគមន៍ដោយការដំឡើងអត្រាការប្រាក់ចាប់ពីខែមីនាឆ្នាំ២០២២ ។ បន្ទាប់ពីការដំឡើង ១១ដងជាប់គ្នាៗ អត្រាការប្រាក់យោងនៅអាម៉េរិកបច្ចុប្បន្នស្ថិតនៅចន្លោះ ៥,២៥ភាគរយដល់ ៥,៥ភាគរយ។ Goldman Sachs បានសន្និដ្ឋានថាអត្រាការប្រាក់នឹងមានស្ថេរភាពប្រហែល ៣ភាគរយទៅ ៣,៥ភាគរយ៕