តើរថយន្តយីហោណាខ្លះដែលលក់ដាច់ជាងគេនៅក្នុងឆមាសទី១ឆ្នាំ២០២៣?

នៅឆមាសទី១ឆ្នាំ២០២៣ ក្រុមហ៊ុនផលិតរថយន្តរបស់ប្រទេសជប៉ុនបានក្លាយជាក្រុមហ៊ុនលក់រថយន្តដាច់ជាងគេលើពិភពលោកក្នុងចំណោមក្រុមហ៊ុនផលិតរថយន្តរបស់ប្រទេសធំៗជាច្រើននៅលើពិភពលោក។ ក្នុងចំណោមរថយន្តជិត៣០លានគ្រឿង ដែលលក់ដាច់ជាងគេបំផុតរបស់ក្រុមហ៊ុនទាំង១០ ក៏មានរថយន្តផលិតដោយក្រុមហ៊ុនចិនមួយផងដែរ។

ក្រុមហ៊ុនផលិតរថយន្តធំៗនិងល្បីៗចំនួន១០បានលក់រថយន្តសរុបបានជិត៣០លានគ្រឿងនៅឆមាសទី១ឆ្នាំនេះ ក្នុងនោះក្រុមហ៊ុនតួយ៉ូតារបស់ជប៉ុន (Toyota)បានក្លាយជាក្រុមហ៊ុនលក់ដាច់ជាងគេបង្អស់ ហើយក្រុមហ៊ុន ប៊ីវ៉ាឌី (BYD) ស្ថិតនៅក្នុងលំដាប់ទី១០។ កាសែតឆាយណាដេលីបានរាយការណ៍ថា ក្រុមហ៊ុនផលិតរថយន្តអគ្គីសនីថ្មីរបស់ចិន BYD បានក្លាយជាក្រុមហ៊ុនលក់រថយន្តដាច់បំផុតទាំង១០នៅលើពិភពលោក ហើយចំនួនលក់របស់ក្រុមហ៊ុននេះ គឺបានវ៉ាដាច់ចំនួនលក់របស់ក្រុមហ៊ុន Mercedes-Benz, BMW និង Tesla ជាដើម។

យោងតាមរបាយការណ៍ហិរញ្ញវត្ថុដែល BYD បានប្រកាស ក្រុមហ៊ុនផលិតរថយន្តចិននេះអាចមានសមត្ថភាពលក់រថយន្តសរុបដល់ទៅ១លាន២៥ម៉ឺនគ្រឿងក្នុងរយៈពេលត្រឹមប្រាំមួយខែដំបូង កើនឡើងជាង៩៤% ដោយដណ្តើមបានចំណាត់ថ្នាក់ទី១០មិនធ្លាប់មាន។

ដោយឡែកក្រុមហ៊ុនផលិតរថយន្តចិនផ្សេងទៀតក៏កំពុងតែ បោះជំហានយ៉ាងប្រសើរក្នុងទីផ្សាររថយន្តអន្តរជាតិ ដូចជាក្រុមហ៊ុន Geely ឈរនៅលំដាប់ទី១៣ និង Changan ជាប់ចំណាត់ថ្នាក់ទី១៤ ខណៈដែលក្រុមហ៊ុន Chery ឈរនៅលេខរៀងទី១៧។

តាមស្ថិតិបានអះអាងថា ក្រុមហ៊ុនដែលលក់រថយន្តដាច់បំផុតនៅឆមាសទី១ នៃឆ្នាំ២០២៣ នេះ គឺក្រុមហ៊ុនតូយូតា ដែលអាចលក់រថយន្តបានសរុបដល់ទៅ ៥លាន៤១ម៉ឹនគ្រឿង។ ចំណែកក្រុមហ៊ុន វ៉ុលវ៉ាហ្គេន (Volkswagen)បានជាប់ចំណាត់ថ្នាក់លេខ២ ដែលអាចលក់បានសរុប៤លាន៣៧ម៉ឺនគ្រឿង។ រីឯក្រុមហ៊ុនផលិតរថយន្តលក់ដាច់ជាប់លេខ៣ គឺក្រុមហ៊ុន ហ៊ីយ៉ាន់ដាយ និងគៀ (Hyundai/Kia) របស់កូរ៉េ ដែលអាចលក់បានសរុប៣លាន៦៥ម៉ឺនគ្រឿង។ ខណៈក្រុមហ៊ុនលក់ដាច់លំដាប់ទី៤ គឺក្រុមហ៊ុនផលិតរថយន្តរ៉េណូត/នីសាន់/មីស៊ូប៊ីស៊ី( Renault / Nissan / Mitsubishi)របស់ជប៉ុន ដែលអាចលក់បានសរុប៣លាន២សែនគ្រឿង។

ដោយឡែក ក្រុមហ៊ុនផលិតរថយន្តស្តេឡានទី (Stellantis) ដែលជាក្រុមហ៊ុនអ៊ីតាលី និងអាមេរិកទទួលចំណាត់ថ្នាក់លេខ៥ ក្រោយលក់រថយន្តបាន៣លាន២សែនគ្រឿង។ ចំណែកក្រុមហ៊ុន ជេណឺរ៉ល មូធ័រ (General Motors) របស់អាមេរិកជាប់លំដាប់ថ្នាក់លេខ៦ ជាមួយបរិមាណលក់រថយន្តសរុប២លាន៩៦ម៉ឺនគ្រឿង។ រីឯក្រុមហ៊ុនហ្វត(Ford) របស់អាមេរិកឈរលំដាប់ទី៧ ក្រោយលក់បាន២លាន១៧ម៉ឺនគ្រឿង ខណៈក្រុមហ៊ុនហុងដារបស់ជប៉ុនជាប់លំដាប់លេខ៨ ដោយអាចលក់បាន១លាន៨៤ម៉ឺនគ្រឿង និងរថយន្តស៊ុយហ្សូគី (Suzuki)ជាប់លេខ៩ក្រោយលក់បាន១លាន៥២ម៉ឺនគ្រឿង៕