![ក្រុមហ៊ុនអចលនទ្រព្យចិនធំមួយទៀត ដាក់ពាក្យការពារការក្ស័យធននៅអាម៉េរិក](https://www.alynana.com/storage/untitled-1jpg14.jpg)
នៅថ្ងៃទី១៩ ខែកញ្ញា ក្រុមហ៊ុនអចលនទ្រព្យធំមួយរបស់ចិន Sunac China Holdings ទើបតែដាក់ពាក្យសុំការការពារក្ស័យធននៅអាម៉េរិកបន្ទាប់ពីបានទទួលការយល់ព្រមពីម្ចាស់បំណុលរបស់ខ្លួនក្នុងការរៀបចំរចនាសម្ព័ន្ធបំណុលដែលមានតម្លៃជិត១០ ពាន់លានដុល្លារ។
ក្រុមហ៊ុន Sunac China Holdings បានដាក់ពាក្យក្រោមជំពូកទី១៥ នៃច្បាប់ការពារការក្ស័យធនរបស់អាម៉េរិក។ ជំពូកនេះ នឹងអនុញ្ញាតឱ្យតុលាការអាម៉េរិកឈានជើងចូលនៅពេលដែលមានករណីក្ស័យធនពាក់ព័ន្ធនឹងប្រទេសមួយផ្សេងទៀត ហើយច្បាប់នេះទៀតសោតនឹងជួយការពារទ្រព្យសម្បត្តិរបស់ក្រុមហ៊ុនក្នុងអំឡុងពេលរៀបចំរចនាសម្ព័ន្ធឡើងវិញ។
នៅថ្ងៃទី១៨ ខែកញ្ញា ម្ចាស់បំណុលរបស់ក្រុមហ៊ុន Sunac China Holdings បានអនុម័តផែនការរបស់ក្រុមហ៊ុនក្នុងការរៀបចំរចនាសម្ព័ន្ធឡើងវិញនូវបំណុលបរទេសចំនួនជិត ១០ពាន់លានដុល្លារ។ នេះជាលើកទីមួយហើយដែលក្រុមហ៊ុនអចលនទ្រព្យចិនធំមួយបានអនុម័តផែនការរៀបចំរចនាសម្ព័ន្ធបំណុលក្នុងទំហំធំបែបនេះ។ Sunac China Holdings បានប្រកាសពីផែនការរៀបចំរចនាសម្ព័ន្ធបំណុលបរទេសឡើងវិញកាលពីខែមីនា។
បច្ចុប្បន្ននេះ Sunac គឺជាក្រុមហ៊ុនអចលនទ្រព្យធំជាងគេទី១៦ នៅចិន ដោយផ្អែកលើចំនួនការលក់ផ្ទះក្នុងរយៈពេល៨ខែដំបូងនៃឆ្នាំនេះ។ ក្រុមហ៊ុននេះក៏ស្ថិតក្នុងចំណោមក្រុមក្រុមហ៊ុនអចលនទ្រព្យរបស់ចិន ដែលបានសងបំណុលបរទេសចាប់តាំងពីវិស័យអចលនទ្រព្យរបស់ប្រទេសនេះបានធ្លាក់ចូលទៅក្នុងវិបត្តិសាច់ប្រាក់ក្នុងឆ្នាំ ២០២១។ មូលហេតុត្រូវបានគេនិយាយថាជាគោលនយោបាយបន្ទាត់ក្រហមបីរបស់ទីក្រុងប៉េកាំងដែលបានចាប់ផ្តើមដើម្បីកាត់បន្ថយហានិភ័យជាប្រព័ន្ធដោយកំណត់លទ្ធភាពរបស់ក្រុមហ៊ុនអចលនទ្រព្យក្នុងការខ្ចីប្រាក់ថ្មី។
កាលពីខែមុន China Evergrande Group ដែលជាក្រុមហ៊ុនអចលនទ្រព្យធំជាងគេទីពីររបស់ចិនក៏បានដាក់ពាក្យសុំការការពារការក្ស័យធននៅអាម៉េរិកផងដែរ។ Evergrande បានរងការខូចខាតច្រើនបំផុតនៅក្នុងវិស័យនេះ ដោយបំណុលសរុបរបស់ក្រុមហ៊ុនបច្ចុប្បន្នមានប្រហែល ២៤៣៧ពាន់លានយ័ន (៣៤០ពាន់លានដុល្លារ)។ ចំនួននេះគឺស្មើនឹង ២ភាគរយនៃផលិតផលក្នុងស្រុកសរុបរបស់ចិន៕