![ទិន្នផលស្រូវនៅប្រទេសថៃអាចធ្លាក់ចុះនៅរដូវឆ្នាំនេះដោយសារប្រែប្រួលអាកាសធាតុ](https://www.alynana.com/storage/untitled-1jpg62453.jpg)
(បាងកក)៖ នាយកដ្ឋានសេដ្ឋកិច្ចកសិកម្មនៃក្រសួងកសិកម្មនិងសហករណ៍ថៃបានព្យាករថា ផលិតកម្មស្រូវរបស់ប្រទេសថៃរំពឹងថានឹងធ្លាក់ចុះ ៨៧១ ០០០ តោនស្មើនឹង ៣,២៧% មកនៅត្រឹម ២៥,៨លានតោនសម្រាប់រដូវប្រមូលផលឆ្នាំ២០២៣-២០២៤ ដែលភាគច្រើនដោយសារបាតុភូតអាកាសធាតុអ៊ែលនីណូ។
លោក Tantita Bunyamaneekul អគ្គលេខាធិការរងនៃនាយកដ្ឋានសេដ្ឋកិច្ចកសិកម្មបានប្រាប់កាសែតកកប៉ុស្តិ៍ថា ផ្ទៃដីដាំដុះស្រូវរបស់ប្រទេសថៃសម្រាប់ឆ្នាំ២០២៣-២០២៤ មានសរុបចំនួន ៦២,៤លានរ៉ៃ (៩,៩៨លានហិចតា) ថយចុះចំនួន ៦២០ ០០០រ៉ៃ ឬ ០,៩៦% ធៀបនឹងឆ្នាំមុន។
ផ្ទៃដីប្រមូលផលត្រូវបានប៉ាន់ប្រមាណថាមានចំនួន ៥៩,៦លានរ៉ៃ ថយចុះចំនួន ៣១៦ ០០០រ៉ៃ ឬ ០,៥៣% ធៀបនឹងឆ្នាំមុន។ ការធ្លាក់ចុះផ្ទៃដីដាំដុះនេះគឺដោយសារការប្រែប្រួលលក្ខខណ្ឌអាកាសធាតុដែលនាំឱ្យមានការពន្យារពេលធ្លាក់ភ្លៀង។
យោងតាមកាសែតបាងកកប៉ុស្តិ៍ ទឹកភ្លៀងត្រូវបានរំពឹងថានឹងមានកម្រិតទាបជាងឆ្នាំមុន។ ចាប់ពីពាក់កណ្តាលខែមិថុនាដល់ពាក់កណ្តាលខែកក្កដាឆ្នាំនេះ មានជំនន់ទឹកភ្លៀង បណ្តាលឱ្យមានការខ្វះខាតទឹកក្នុងវិស័យកសិកម្ម ជាពិសេសនៅតំបន់ស្ងួតដែលមិនមានប្រព័ន្ធធារាសាស្រ្ត។
កត្តានេះបានធ្វើឱ្យកសិករមួយចំនួនលែងមានស្រែចម្ការ ខណៈខ្លះទៀតអាចធ្វើស្រែបានតែម្ដង។ ទិន្នផលក្នុងមួយរ៉ៃក៏ធ្លាក់ចុះដោយសារភ្លៀងធ្លាក់តិចផងដែរ។
នាយកដ្ឋានសេដ្ឋកិច្ចកសិកម្មបានឱ្យដឹងថា ក៏មានហានិភ័យជំងឺ និងសត្វល្អិតចង្រៃផងដែរដែលនាំឱ្យផលិតកម្មស្រូវជាតិធ្លាក់ចុះ។
តម្លៃស្រូវបានកើនឡើងជាលំដាប់សម្រាប់ស្រូវក្រអូបថៃ ស្រូវដំណើប និងស្រូវដែលមានសំណើម ១៥% ចាប់តាំងពីដើមឆ្នាំ២០២២។
ការនាំចេញអង្កររបស់ថៃក្នុងរយៈពេលប្រាំពីរខែដំបូងឆ្នាំនេះបានកើនឡើងទាំងបរិមាណនិងតម្លៃធៀបនឹងរយៈពេលដូចគ្នាក្នុងឆ្នាំ២០២២។ ការនាំចេញអង្ករបានកើនឡើងដល់ ២,៥៤ លានតោនសម្រាប់រយៈពេលនេះ កើនឡើង ៣០,២% ធៀបនឹងរយៈពេលដូចគ្នាកាលពីឆ្នាំមុន ដោយមានតម្លៃនាំចេញ ៤០,៨ពាន់លានបាត (ប្រហែល ១,១ពាន់លានដុល្លារ) កើនឡើង ៥១,៨%។ នេះបើយោងតាមកាសែតបាងកកប៉ុស្តិ៍៕