ប្រព័ន្ធផ្សព្វផ្សាយរដ្ឋ បានរាយការណ៍ថា មេដឹកនាំប្រទេសកូរ៉េខាងជើង លោក Kim Jong Un បាននិយាយកាលពីថ្ងៃព្រហស្បតិ៍ថា លោកមានបំណងកសាងទំនាក់ទំនងយូរអង្វែងជាមួយប្រទេសរុស្ស៊ី ខណៈលោកបានជួបជាមួយរដ្ឋមន្ត្រីការបរទេសលោក Sergei Lavrov ។ ដំណើរទស្សនកិច្ចរយៈពេលពីរថ្ងៃរបស់បេសកជនជើងចាស់រូបនេះ ត្រូវបានគេរំពឹងថានឹងដាក់មូលដ្ឋានការងារសម្រាប់ដំណើរទស្សនកិច្ចទៅកាន់ប្រទេសនេះដោយប្រធានាធិបតីរុស្ស៊ី លោក Vladimir Putin ដែលត្រូវបានអញ្ជើញដោយលោក Kim កាលពីខែមុននៅក្នុងកិច្ចប្រជុំកំពូលកម្រិតខ្ពស់មួយនៅចុងបូព៌ារបស់រុស្ស៊ី។ កិច្ចប្រជុំកំពូលកាលពីខែកញ្ញា បានធ្វើឱ្យប្រទេសលោកខាងលិចមានការព្រួយបារម្ភថា ទីក្រុងព្យុងយ៉ាង អាចនឹងផ្តល់អាវុធទៅឲ្យទីក្រុងមូស្គូសម្រាប់សង្គ្រាមរបស់ខ្លួននៅអ៊ុយក្រែន។
ទីភ្នាក់ងារសារព័ត៌មាន KCNA បានរាយការណ៍ដោយប្រើប្រាស់ពាក្យកាត់ផ្លូវការសម្រាប់កូរ៉េខាងជើង ថាលោកKim និយាយថា វាគឺជាគោលបំណងរបស់គណបក្សពលករ ដែលកំពុងកាន់អំណាច និងរដ្ឋាភិបាល ដើម្បីដាក់ចេញផែនការឈានដល់ទំនងទំនងយូរអង្វែង និងដោយស្ថិរភាព សម្រាប់ទំនាក់ទំនងកូរ៉េខាងជើងនិងរុស្ស៊ី ក្នុងយុគសម័យថ្មី។ លោក Lavrov បានរិះគន់ចំពោះអ្វីដែលលោកបានចាត់ទុកថាជាគោលនយោបាយដ៏គ្រោះថ្នាក់របស់សហរដ្ឋអាមេរិកចំពោះកូរ៉េខាងជើង ខណៈកោតសរសើរកម្រិតយុទ្ធសាស្ត្រថ្មី នៃទំនាក់ទំនងរវាងទីក្រុងមូស្គូ និងទីក្រុងព្យុងយ៉ាង។ លោក Lavrov បានប្រាប់អ្នកសារព័ត៌មានថា ដូចជាមិត្តភ័ក្តិកូរ៉េខាងជើងរបស់យើង យើងមានការព្រួយបារម្ភយ៉ាងខ្លាំងអំពីការកើនឡើងសកម្មភាពយោធារបស់សហរដ្ឋអាមេរិក ជប៉ុន និងកូរ៉េខាងត្បូង នៅក្នុងតំបន់ និងដោយគោលនយោបាយរបស់ទីក្រុងវ៉ាស៊ីនតោន។ ក្នុងប្រឈមមុខទៅនឹងការសាកល្បងអាវុធជាបន្តបន្ទាប់ច្រើនបំផុត ធ្វើឡើងដោយទីក្រុងព្យុងយ៉ាងនៅឆ្នាំនេះ ទីក្រុងសេអ៊ូលមានវិធានការពង្រឹងទំនាក់ទំនងសន្តិសុខជាមួយសហរដ្ឋអាមេរិកជាសម្ព័ន្ធមិត្តប្រពៃណី ខណៈរៀបចំការពារត្រីភាគីដែលរួមមានទាំងប្រទេសជប៉ុនផងដែរ៕
