(ថៃ)៖ គណៈរដ្ឋមន្ត្រីបានយល់ព្រម ក្នុងការផ្តល់ប្រាក់ចំនួន៥០០០០បាត ក៏ដូចជាប្រាក់កម្ចី ដល់កម្មករថៃ ដែលកំពុងជ្រើសរើសស្នាក់នៅក្នុងប្រទេសអ៊ីស្រាអែល ដោយសារតែការសន្យាពីថៅកែអ៊ីស្រាអែល ក្នុងការតំឡើងប្រាក់ខែ ។
លោកនាយករដ្ឋមន្រ្ដី ស្រេថា ថាវីស៊ីន បាននិយាយថា គណៈរដ្ឋមន្ត្រីបានសម្រេចចិត្តប្រើប្រាក់លើក ទឹកចិត្ត ដើម្បីព្យាយាមបញ្ចុះបញ្ចូលពលករថៃឱ្យត្រឡប់ទៅផ្ទះវិញនៅពេលនេះ ខណៈដែលការប៉ះទង្គិច គ្នា រវាងអ៊ីស្រាអែល និងក្រុមហាម៉ាស បានកើនឡើងកាន់តែខ្លាំងឡើង។
នាយករដ្ឋមន្ត្រីបាននិយាយថា ស្ថានទូតថៃប្រចាំនៅទីក្រុង Tel Aviv បានរាយការណ៍ថា ទាំងប្រតិបត្តិការ ជើងគោក និងការទម្លាក់គ្រាប់បែកតាមអាកាសបានពង្រីក ហើយវាពិតជាគ្រោះថ្នាក់ណាស់ក្នុងការ បន្តរស់នៅក្នុងប្រទេសអ៊ីស្រាអែល។
លោក ស្រេថា បានថ្លែងថា «ខ្ញុំបញ្ជាក់ជំហរថារដ្ឋាភិបាលចង់ឲ្យប្រជាជនរបស់យើងត្រឡប់មកវិញ»។
លោកបានបន្ថែមថា រដ្ឋាភិបាលបានវិភាគស្ថានការណ៍ហើយបានដោះស្រាយថាប្រជាជនថៃមួយចំនួនមានការស្ទាក់ស្ទើរក្នុងការចាកចេញពីអ៊ីស្រាអែលដោយសារបញ្ហាហិរញ្ញវត្ថុ។
ជាលទ្ធផល គណៈរដ្ឋមន្ត្រីបានសម្រេចផ្តល់សំណងចំនួន ៥០០០០បាតដល់ពលករថៃម្នាក់ៗ ដែលត្រឡប់មកពីប្រទេសអ៊ីស្រាអែល ហើយពួកគេក៏នឹងមានសិទ្ធិទទួលបានប្រាក់កម្ចីទន់ចំនួន ១៥ម៉ឺនបាតផងដែរ។
ក្រសួងការបរទេសថៃបានបញ្ជាក់ថា ជនជាតិថៃចំនួន ៣២ នាក់ត្រូវបានសម្លាប់ និង ១៩ នាក់បានរងរបួស នៅក្នុងការប្រយុទ្ធគ្នា ខណៈ ២២ នាក់ផ្សេងទៀតត្រូវបានចាប់ខ្លួនដោយ ក្រុមហាម៉ាស៕
