(ភ្នំពេញ)៖ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា នៅថ្ងៃទី ១៣ វិច្ឆិកានេះ បានស្នើសុំដល់រាជរដ្ឋាភិបាលកម្ពុជាចំនួន៣ចំណុច ជាពិសេសប្រព័ន្ធពន្ធដារ និងការបកស្រាយខ្លឹមសារនានា។ការស្នើយ៉ាងដូច្នេះ ធ្វើឡើងក្នុងវេទិការាជរដ្ឋាភិបាល និង វិស័យឯកជន នៅវិមានសន្តិភាព រាជធានីភ្នំពេញ។
សំណើរចំនួន៣ចំណុចដែលអ្នកឧកញ៉ា គិត ម៉េង ស្នើសុំដល់រាជរដ្ឋាភិបាលជួយពិនិត្យ សម្រួលដល់វិស័យឯកជនមានជាអាទិ៍ ការជួយសម្រួលដល់វិស័យហិរញ្ញវត្ថុដែលកំពុងប្រឈមនៅពេលបច្ចុប្បន្ន ទី២ បទបញ្ញាតិមួយចំនួនដែលបង្កើតឡើងត្រួតសុីគ្នា ហើយនាំដល់ប៉ះពាល់ដល់វិស័យឯកជន និងទី៣ ការប្រមូលពន្ធដារដែលទាមទារពង្រីកលើគ្រប់វិស័យ និងពន្យល់ខ្លឹមសារឱ្យបានច្បាស់លាស់។
បើតាម អ្នកឧកញ៉ា គិត ម៉េង ប្រសិនបើរាជរដ្ឋាភិបាលជួយសម្រួលដល់វិស័យទាំងអស់គ្នា នោះវិស័យវិនិយោគឯកជននឹងកាន់តែល្អប្រសើរ ដើម្បីចូលរួមចំណែកជាមួយរាជរដ្ឋាភិបាលបន្តអភិវឌ្ឍប្រទេសកម្ពុជាឱ្យកាន់តែរីកចម្រើនស្របតាមគោលនយោបាយរបស់រាជរដ្ឋាភិបាល៕
