នៅប៉ុន្មានសប្តាហ៍ថ្មីៗមកនេះ ទីក្រុងប៉េកាំងបានបង្កើតគម្រោងធំៗចំនួន២ធ្វើជាមជ្ឈមណ្ឌលនៃគោលនយោបាយលំនៅឋានរបស់ខ្លួន ដោយគម្រោងទាំង២នេះ គឺជាការសាងសង់លំនៅឋានសង្គម និងការជួសជុលនៅតាមសង្កាត់មួយចំនួនដោយទទួលបានការគាំទ្រផ្នែកនយោបាយ ហើយឆាប់ៗនេះ រដ្ឋាភិបាលកណ្ដាលរបស់ចិន អាចនឹងចាក់បញ្ចូលថវិកា១៣៨ពាន់លានដុល្លារបន្ថែមទៀត ដើម្បីគាំទ្រគម្រោងទាំងនេះ។
បច្ចុប្បន្នអាជ្ញាធរកំពុងពិចារណាស្នើសុំផ្តល់ប្រាក់កម្ចីរបស់ធនាគារកណ្តាលក្នុងតំម្លៃថោកដល់ធនាគារគោលនយោបាយរបស់រដ្ឋសំខាន់ៗ ដើម្បីផ្តល់មូលនិធិដល់គម្រោងទាំងនេះ ហើយចំនួនទឹកប្រាក់ដែលគេកំពុងពិភាក្សានេះ គឺស្មើនឹងប្រហែល១០% នៃការលក់ផ្ទះថ្មីប្រចាំឆ្នាំជាមួយនឹងលទ្ធភាពបង្កើនថវិកា និងមូលនិធិផ្សេងទៀត។
បើសិនជាផែនការថ្មីរបស់ចិននេះពិតជាដំណើរការល្អមែន ចិនអាចទាំងបញ្ចប់ការធ្លាក់ចុះជិត៣ឆ្នាំនៃការសាងសង់អចលនទ្រព្យ និងអាចទាំងបំពេញតាមគោលបំណងរបស់ប្រធានាធិបតីចិន លោក ស៊ី ជីនពីង ដើម្បីលើកកម្ពស់វិបុលភាពរួមផងដែរ។
លោក បេតធី វ៉ាង (Betty Wang) សេដ្ឋវិទូជាន់ខ្ពស់នៅក្រុមហ៊ុន Australia & New Zealand Banking Group នៅទីក្រុងហុងកុងបាននិយាយថា នេះគឺជាផែនការដែលបានកែសម្រួលកាន់តែច្រើននូវរចនាសម្ព័ន្ធរយៈពេលវែងក្នុងវិស័យអចលនទ្រព្យដូចជាគំរូរបស់ប្រទេសសិង្ហបុរី ដែលមានភាពល្បីល្បាញសម្រាប់ទីផ្សារលំនៅឋានគ្របដណ្តប់ដោយលំនៅឋានសាធារណៈ ហើយថា វាមិនត្រឹមតែជាកិច្ចខិតខំប្រឹងប្រែងរយៈពេលខ្លី ដើម្បីបង្កើនការវិនិយោគអចលនទ្រព្យប៉ុណ្ណោះទេ ប៉ុន្តែវាថែមទាំងជាគោលដៅវិបុលភាពរួមរបស់ចិន នៅឆ្នាំ២០៣៥ ផងដែរ។
ព័ត៌មានលម្អិតពីការជំរុញការសាងសង់លំនៅឋានសង្គមនេះនៅមិនទាន់ផ្សព្វផ្សាយជាសាធារណៈទាំងស្រុងនៅឡើយទេ ប៉ុន្តែកាសែតអ្នកសង្កេតការណ៍សេដ្ឋកិច្ចបានរាយការណ៍ថា ក្រុមប្រឹក្សារដ្ឋរបស់ចិន បានបង្ហាញការណែនាំកាលពីខែមុននៅក្នុងឯកសារទី១៤ ដ៏សម្ងាត់ដោយបានអំពាវនាវឱ្យមានគំរូថ្មីសម្រាប់វិស័យអចលនទ្រព្យ ហើយទីក្រុងចំនួន៣៥ ត្រូវបានគេរំពឹងថានឹងដាក់នៅក្រោមការសាកល្បងនៃកម្មវិធីនេះ។ ក្រុមអ្នកវិភាគបាននិយាយថា គំនិតនេះគឺដើម្បីបង្កើតទីផ្សារលំនៅឋានសង្គម ដែលគ្រប់គ្រងយ៉ាងតឹងរ៉ឹងជាមួយនឹងដែនកំណត់លើអ្នក ដែលមានសិទ្ធិទិញផ្ទះបាន និងរបៀបដែលពួកគេអាចលក់ទៅឱ្យម្ចាស់ថ្មី។ វិធីមួយ ដើម្បីធានាបានចំពោះបញ្ហានោះ គឺថានឹងតម្រូវឱ្យពួកគេលក់ទៅឱ្យ រដ្ឋាភិបាលវិញ។
ក្រុមអ្នកវិភាគនៅក្រុមហ៊ុន Enodo Economics បានសរសេរនៅក្នុងកំណត់ត្រាមួយនៅសប្តាហ៍នេះថា ពួកគេបានអះអាងថា ការផ្លាស់ប្ដូរគម្រោងអចលនទ្រព្យនេះគឺសម្រាប់ការរស់នៅ គឺមិនមែនសម្រាប់ទុកលក់យកចំណេញនោះទេ ហើយឯកសារទី១៤នេះទំនងជាចង់បង្ហាញថា នេះអាចជាករណីសម្រាប់អ្នកមានទ្រព្យ និងអ្នកមានប្រាក់ចំណូលខ្ពស់៕
