ត្រឹមរយៈពេល១០ខែប៉ុណ្ណោះ ក្នុងឆ្នាំ២០២៣ វៀតណាម បាននាំចេញទុរេនក្នុងទំហំ២,១ពាន់លានដុល្លារទៅចិន ។ ការនាំចេញដ៏ច្រើនសន្ធឹកនេះ គឺដោយសារទុរេនវៀតណាមមានតម្លៃទាបជាងទុរេនថៃ។
នៅក្នុងខែសីហា ឆ្នាំ២០២២ ចិន បានអនុម័តការនាំចូលទុរេនស្រស់ៗពីវៀតណាម។ ការបើកភ្លើងបៃតងនេះ បានធ្វើឱ្យវៀតណាមអាចនាំចេញទុរេនជាច្រើនតោនទៅចិន និងអាចកើបចំណូលបានជាច្រើនពាន់លានដុល្លារ។
តាមការបញ្ជាក់របស់សមាគមបន្លែ និងផ្លែឈើវៀតណាម ការនាំចេញទុរេនទៅចិនមានទំហំ២,១ពាន់លានដុល្លារ នៅចន្លោះខែមករា ដល់ខែតុលា ឆ្នាំ២០២៣ ដែលចំនួននេះ បានធ្វើឱ្យចិនបានក្លាយជាទីផ្សារនាំចេញទុរេនដ៏ធំបំផុតរបស់វៀតណាម។ ប្រទេសស្ថិតក្នុងតំបន់អាស៊ីអាគ្នេយ៍មួយនេះ មានកន្លែងដាំទុរេនចំនួន៤២២ និងមានមជ្ឈមណ្ឌលខ្ចប់សម្រាប់ដឹកទៅប្រទេសជិតខាងចំនួន១៥៣កន្លែង។
តាមការបញ្ជាក់របស់ លោក Han Tao អ្នកគ្រប់គ្រងទូទៅនៃក្រុមហ៊ុននាំចេញនាំចូលផ្លែឈើក្នុងស្រុកចិន Hekou Sutao Trading Company លោកបាននាំចូលទុរេនពីវៀតណាមប្រមាណ៦០០តោន ចាប់តាំងពីខែតុលា ឆ្នាំ២០២២ មក។ ចិននាំចូលទុរេនប្រភេទ Ri-6 ពីវៀតណាម។ ការនាំចូលទុរេនពីវៀតណាមដ៏ច្រើនបែបនេះ គឺដោយសារវាមានតម្លៃទាប នេះបើតាមការចុះផ្សាយរបស់សារព័ត៌មាន The Nation។
«ប្រៀបធៀបទៅទុរេនពីថៃ, ទុរេនវៀតណាមគឺមានតម្លៃទាបជាង។ ប៉ុន្តែគុណភាព រសជាតិ និងរូបរាង របស់វៀតណាម មានលក្ខណៈពិសេស»។ លោក Han Tao បានសង្កត់ធ្ងន់បែបនេះ។
ចំណែក លោក Nong Liqing អ្នកគ្រប់គ្រងទូទៅនៅក្រុមហ៊ុននាំចេញនាំចូលមួយ ក្នុងក្រុង Pingxiang ខេត្ត Guangxi អះអាងថា ក្រុមហ៊ុនរបស់លោកបាននាំចូលទុរេនពីវៀតណាមរហូតដល់១៦០០តោនឯណោះ បើគិតមកដល់ខែធ្នូ ឆ្នាំ២០២៣។ បន្ថែមពីនេះ ចិន គ្រោងនាំចូលទុរេនជាច្រើនពាន់តោនពីវៀតណាមបន្ថែមទៀត។
នៅក្នុងឆ្នាំ២០២២ ចិននាំចូលទុរេនរហូតដល់៨២៥០០០តោន ដោយទុរេន ជាផ្លែឈើទីមួយនាំចូលទៅចិនច្រើនជាងគេ និងមានទំហំ ៤,០៣ពាន់លានដុល្លារ។ ក្នុងចំនួននោះទុរេនថៃមានទំហំ ប្រមាណ ៧៨ម៉ឺនតោន៕
