រដ្ឋាភិបាលនៃប្រទេសឥណ្ឌូនេស៊ី ដែលមានប្រជាជនច្រើនជាងគេក្នុងអាស៊ាន បានសម្រេចកំណត់គោលដៅបង្កើនការនាំចេញទៅកាន់ប្រទេសចិន ក្នុងឆ្នាំ២០២៤ នេះឱ្យឈានដល់ចន្លោះពី៦៥ពាន់លានដុល្លារ ទៅ៧០ពាន់លានដុល្លារ។ ក្នុងឆ្នាំ២០២៣ ទាំងមូល ទំហំនាំចេញសរុបរបស់ឥណ្ឌូនេស៊ី ទៅកាន់ប្រទេសចិន ត្រូវបានព្យាករថា ឈានដល់៦០ពាន់លានដុល្លារ ដោយធ្លាក់ចុះបន្តិចបើធៀបនឹងឆ្នាំ២០២២។
លោក ឌីឌី ស៊ូមេឌី (Didi Sumedi) អគ្គនាយកនៃអគ្គនាយកដ្ឋានអភិវឌ្ឍន៍ការនាំចេញ នៃក្រសួងពាណិជ្ជកម្មឥណ្ឌូនេស៊ី បានឱ្យដឹងថា ការនាំចេញសរុបទៅប្រទេសចិន អំឡុងខែមករា ដល់ខែវិច្ឆិកា ឆ្នាំ២០២៣ អាចសម្រេចបានប្រមាណជិត៥៧ពាន់លានដុល្លារ ហើយទំហំនាំចេញរហូតដល់ដាច់ឆ្នាំដដែលនេះត្រូវបានព្យាករថា ឈានដល់៦០ពាន់លានដុល្លារ។
លោកបានអះអាងថា សម្រាប់ឆ្នាំក្រោយ ប្រសិនបើការនាំចេញកើនឡើងជាមធ្យមក្នុងរង្វង់២,៥%ក្នុងមួយឆ្នាំ ការនាំចេញរបស់ឥណ្ឌូនេស៊ី ទៅកាន់ប្រទេសចិន នឹងអាចសម្រេចបានចន្លោះពី៦៥ពាន់លានដុល្លារ ទៅ៧០ពាន់លានដុល្លារ នៅឆ្នាំក្រោយ។
លោកបានបន្តថា ការបង្កើនគោលដៅនៃការនាំចេញនេះគឺជាការខិតខំប្រឹងប្រែងដើម្បីកែលម្អការអនុវត្តការនាំចេញទៅកាន់ប្រទេសចិន ដែលបានជួបប្រទះការធ្លាក់ចុះក្នុងឆ្នាំ២០២៣ ខណ:ដែលនៅឆ្នាំ២០២២ គេដឹងថា ការនាំចេញរបស់ឥណ្ឌូនេស៊ី ទៅកាន់ប្រទេសចិន អាចសម្រេចបានក្នុងទំហំជិត៦៦ពាន់លានដុល្លារ ប៉ុន្តែលោកបានពន្យល់ថា ការធ្លាក់ចុះនៃការនាំចេញមិនត្រឹមតែកើតឡើងរវាងប្រទេសឥណ្ឌូនេស៊ី និងប្រទេសចិន ប៉ុណ្ណោះទេ វាក៏កើតឡើងគ្រប់ប្រទេស ហើយនេះវាជានិន្នាការសកល។
លោកបានកត់សម្គាល់ថា “តាមពិតទៅ យើងមានសុទិដ្ឋិនិយមថា ការនាំចេញរបស់យើងនៅតែរឹងមាំ ការប្រកួតប្រជែងការនាំចេញរបស់យើងនៅតែល្អជាសកល ហើយយើងមានក្តីសង្ឃឹមចំពោះការរំពឹងទុកដែលបង្ហាញដោយអង្គការពាណិជ្ជកម្មពិភពលោក (WTO) ថា ឆ្នាំ២០២៤ ស្ថានភាពនឹងកាន់តែប្រសើរឡើង”។
ក្រសួងពាណិជ្ជកម្មឥណ្ឌូនេស៊ី នៅពេលនេះបានដាក់ចេញកម្មវិធីមួយចំនួនដើម្បីជំរុញការនាំចេញទៅកាន់ប្រទេសចិន ដោយមួយក្នុងចំណោមកម្មវិធីទាំងនោះគឺការរៀបចំពិព័រណ៍ផលិតផលឥណ្ឌូនេស៊ី នៅក្នុងខេត្តមួយចំនួនក្នុងប្រទេសចិន។
ឥណ្ឌូនេស៊ី និងមហាយក្សចិន កំពុងតែពង្រឹងទំនាក់ទំនងពាណិជ្ជកម្ម និងវិនិយោគយ៉ាងរឹងមាំ ជាពិសេសទាក់ទងនឹងគម្រោងអាជីវកម្មរ៉ែកម្រសម្រាប់ឧស្សាហកម្មរថយន្តអគ្គិសនី (EV)៕
