បើគ្មានការប្រែប្រួលទេ កម្ពុជា-ឥណ្ឌានឹងបើកការហោះហើរត្រង់រវាងគ្នា នាអំឡុងពាក់កណ្តាលខែមិថុនា ឆ្នាំ២០២៤ ខាងមុខនេះ ដែលវានឹងកាន់តែផ្តល់ភាពងាយស្រួលជាងមុន។ ការរៀបចំដំណើរការតភ្ជាប់ជើងហោះហើរត្រង់នេះ គឺក្រោយពេលវិបត្តិជំងឺកូវីដ-១៩ ត្រូវបានបញ្ចប់ ដើម្បីជំរុញសកម្មភាពទេសចរណ៍ឡើងវិញ និងជំរុញកិច្ចសហប្រតិបត្តិការរវាងប្រទេសទាំងពីរ ឱ្យកាន់តែជិតស្និទ្ធថែមទៀត។ តើការតភ្ជាប់ជើងហោះហើរត្រង់នេះនឹងផ្ដល់អត្ថប្រយោជន៍បែបណាខ្លះដល់ប្រទេសទាំងពីរ? ហើយអ្នកជំនាញមានការយល់ឃើញបែបណាចំពោះការតភ្ជាប់ជើងហោះហើរនេះ?
លោក ហូ វណ្ឌី ទីប្រឹក្សាសមាគមទេសចរណ៍កម្ពុជា ជឿជាក់ថា ប្រសិនបើដំណើរការតភ្ជាប់ជើងហោះហើរត្រង់មានភាពរលូន នោះភ្ញៀវទេសចរឥណ្ឌា កាន់តែច្រើននឹងមានវត្តមានមកលេងកម្សាន្តនៅកម្ពុជា។ ទន្ទឹមនឹងពេលវេលានៃការតភ្ជាប់ជើងហោះហើរត្រង់រវាងកម្ពុជា-ឥណ្ឌា ខិតជិតចូលមកដល់ អ្នកជំនាញវិស័យទេសចរណ៍រូបនេះ បានជំរុញឱ្យអ្នកពាក់ព័ន្ធត្រូវយកចិត្តទុកដាក់លើការស្វាគមន៍ភ្ញៀវទេសចរឥណ្ឌា ក្នុងនោះមានទាំងម្ហូបអាហារ កន្លែងស្នាក់នៅ កន្លែងដើរលេង និងផ្សារទំនិញជាដើម។
តើគួរធ្វើបដិសណ្ឋារកិច្ចបែបណាដើម្បីអាចទាក់ទាញភ្ញៀវទេសចរឥណ្ឌា? ជុំវិញសំណួរនេះ លោក ហូ វណ្ឌី បានឆ្លើយតបថា អាជ្ញាធរត្រូវរូតរះជួយពិនិត្យតាមលទ្ធភាពលើសំបុត្រយន្តហោះ កន្លែងស្នាក់នៅ និងការផ្ដល់សេវានានាឱ្យមានតម្លៃសមរម្យ និងឆាប់រហ័ស ហើយប្រសិនបើបង្កភាពសាំញ៉ាំច្រើននោះកម្ពុជានឹងអាចបាត់បង់ភ្ញៀវទេសចរមិនខាន។
ជាមួយគ្នានេះ ឯកឧត្តម ស៊ីន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរស៊ីវិល រំពឹងថា ក្រោយការភ្ជាប់ជើងហោះហើរត្រង់រវាងកម្ពុជា និងឥណ្ឌា វានឹងជួយស្រូបទាញភ្ញៀវទេសចរឥណ្ឌា ឱ្យមកកម្សន្តនៅកម្ពុជាកាន់តែច្រើនបន្ថែមទៀត។ ជាពិសេស វាជួយកាត់បន្ថយការចំណាយ និងពេលវេលានៃការធ្វើដំណើររបស់ភ្ញៀវទេសចរនៃប្រទេសទាំងពីរ ដែលធ្លាប់តែប្រើប្រាស់ជើងហោះហើរតាមរយៈប្រទេសដទៃ។
បើតាមអ្នកនាំពាក្យរដ្ឋលេខាធិការដ្ឋានអាកាសចរស៊ីវិល បើគ្មានការប្រែប្រួលទេ កម្ពុជា-ឥណ្ឌានឹងបើកការហោះហើរត្រង់រវាងគ្នា នៅថ្ងៃទី១៦ ខែមិថុនា ឆ្នាំ២០២៤ខាងមុខ ក្នុងនោះប្រទេសទាំងពីរនឹងមានការហោះហើរក្នុង១សប្តាហ៍ចំនួន៤ជើង៕
