(ភ្នំពេញ)៖ ដើម្បីបង្កភាពងាយស្រួលដល់ប្រជាពលរដ្ឋ ដែលមានកាតព្វកិច្ចបង់ពន្ធជូនរដ្ឋ អគ្គនាយកដ្ឋានពន្ធដារ បានសហការជាមួយធនាគារវីង (ខេមបូឌា) ម.ក ក្នុងការបង្កើតកម្មវិធីអាចបង់ពន្ធគ្រប់ប្រភេទ តាមរយៈធនាគារមួយនេះ ដោយឥតគិតថ្លៃ ។
នៅក្នុងពិធីសម្ពោធជាផ្លូវការ លើកិច្ចសហការរវាងក្រសួងសេដ្ឋកិច្ច និងហិរញ្ញវត្ថុ និងធនាគារវីង ស្តីពីការប្រើប្រាស់សេវាកម្មរបស់ធនាគារវីង សម្រាប់ប្រតិបត្តិការចំណូលពន្ធដារគ្រប់ប្រភេទ ដែលប្រមូលដោយអគ្គនាយកដ្ឋានពន្ធដារ និងអនុវត្តនៅទូទាំងប្រទេស នៅថ្ងៃទី២៩ ខែឧសភា ឆ្នាំ២០២៤ លោក ហោ ប៊ុនថែ អគ្គនាយករងធនាគារវីង លើកឡើងថា កិច្ចសហការនេះ សាធារណជននឹងមានជម្រើស ទូទាត់ពន្ធកាន់តែងាយស្រួល និងមានសុវត្ថិភាពខ្ពស់ ដោយអាចទូទាត់បានតាមបញ្ជរសាខាធនាគារវីងទាំង ២២ទីតាំង នៅទូទាំងប្រទេស រៀងរាល់ម៉ោងធ្វើការដោយមិនគិតថ្លៃសេវាបន្ថែម ពោលគឺនៅតាមចំនួនទឹកប្រាក់ នៅក្នុងវិក្កយបត្រតែប៉ុណ្ណោះ ។
លោកបន្តថា អាស្រ័យហេតុនេះ សូមសាធារណជនអាចទូទាត់ប្រាក់ពន្ធ បាននៅតាមបណ្ដាសាខាធនាគារវីងនៅជិតបំផុត ដោយភ្ជាប់មកជាមួយឯកសារ ដែលមានជាការស្រេច ហើយសង្ឃឹមថាធនាគារវីង នឹងអាចប្រើប្រាស់បច្ចេកវិទ្យាហិញ្ញវត្ថុ និងជំនាញ ដើម្បីគាំទ្រទៅដល់ការប្រមូលនូវពន្ធគ្រប់ប្រភេទ សម្រាប់ជាប្រយោជន៍ដល់ការអភិវឌ្ឍ របស់សង្គមជាតិឲ្យកាន់តែរីកចម្រើនជាងមុន ដោយបច្ចេកវិទ្យាឌីជីថល បានជួយឲ្យសាធារណជនទាំងអស់ អាចបំពេញកាតព្វកិច្ចពន្ធបានដោយងាយស្រួល ប្រកបដោយប្រសិទ្ធភាពខ្ពស់ ។
ក្នុងឱកាសនោះ ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកអគ្គនាយក នៃអគ្គនាយកដ្ឋានពន្ធដារ មានប្រសាសន៍ថា តាមរយៈការព្យាករណ៍ ក្នុងមួយឆ្នាំអាចប្រមូលពន្ធបានជាង ៤ពាន់លានដុល្លារ ដែលការប្រមូលចំណូលនេះ តាមរយៈធនាគារវីង នឹងទទួលបានគ្រប់ ប្រកបដោយសាកសិទ្ធភាព ប្រសិទ្ធភាពការងារ និងតម្លាភាព ។
ឯកឧត្តមបានបន្តថា ការបង់ពន្ធតាមសេវាកម្មបច្ចេកវិទ្យានេះ គឺលឿន ពុំចាំបាច់ទៅបង់ពន្ធនៅតាមសាខាពន្ធដារ អាចបង់បានតាមធនាគារវីង ជាពិសេសអ្នកបង់ពន្ធមធ្យោបាយ បង់ពន្ធលើអចលនទ្រព្យ ដែលនេះជាចំណុចសំខាន់ ព្រោះបានជួយកាត់បន្ថយការចំណាយលើពេលវេលា កាត់បន្ថយការចំណាយលើថវិកា ត្រូវធ្វើដំណើរទៅបង់ពន្ធនៅទីតាំងឆ្ងាយៗ ដែលចំណុចនេះហើយ រាជរដ្ឋាភិបាលចង់ឃើញ វិស័យឯកជន និងរដ្ឋធ្វើការជាមួយគ្នា ដើរទៅមុខទាំងអស់គ្នា ។
សម្រាប់ការអនុវត្តបង់ពន្ធនេះ គឺអតិថិជនអាចទៅកាន់សាខាធនាគារវីង នៅជិតបំផុត ហើយភ្ជាប់ជាមួយឯកសារតិចតួច នៅពេលទៅដល់បញ្ជរបង់ពន្ធ និងសេវាសាធារណៈរបស់ធនាគារវីង បុគ្គលិកបម្រើសេវាកម្ម នឹងជួយសម្រួលអតិថិជន ក្នុងការជ្រើសរើសមធ្យោបាយទូទាត់ដែលមានពីរជម្រើសផ្សេងគ្នា ហើយបន្ថែមលើនេះ អតិថិជនក៏អាចជ្រើសរើសការទូទាត់តាមប្រព័ន្ធអនឡាញ ដោយប្រើប្រាស់អេបរបស់អគ្គនាយកដ្ឋានពន្ធដារគឺ អេប GDT Tax Payer ដែលអ្នកប្រើប្រាស់អាចធ្វើការបង់ពន្ធអចលនទ្រព្យ និងពន្ធផ្លូវជាដើម ៕
