(ភ្នំពេញ)៖ ព្រះបរមសព សម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជ នៃព្រះរាជាណាចក្រកម្ពុជា ត្រូវបានគណៈកម្មាធិការជាតិ រៀបចំបុណ្យជាតិ និងអន្តរជាតិប្រារព្ធព្រះរាជពិធីថ្វាយព្រះភ្លើងហើយនៅព្រឹកថ្ងៃទី៣ខែមិថុនាឆ្នាំ២០២៤ បន្ទាប់ពីព្រះអង្គបានយាងចូលព្រះទិវង្គតហើយព្រះបរមសពត្រូវបានតម្កល់ទុករយ:ពេលជាង៣ខែ នៅវត្តឧណ្ណាលោមដែលជាវត្តរបស់ព្រះអង្គស្តេចគង់នៅកាលនៅមានព្រះជន្ម ដើម្បីប្រារព្ធព្រះរាជពិធីបុណ្យទក្ខិណានុប្បទានតាមព្រះពុទ្ធសាសនាជាបន្តបន្ទាប់ ដើម្បីថ្វាយព្រះរាជកុសលចំពោះព្រះវិញ្ញាណក្ខន្ធរបស់ព្រះអង្គ។
ក្រោយពីព្រះបរមសពបានដង្ហែចេញពីវត្តឧណ្ណាលោម មកកាន់ព្រះមេរុ មុខវត្តបទុមវតីរាជវរារាម ដើម្បីប្រារព្ធព្រះរាជពិធីថ្វាយព្រះភ្លើងក្រោមព្រះរាជាធិបតីភាពដ៏ខ្ពង់ខ្ពស់បំផុតសម្តេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជ នៃគណៈធម្មយុត្តិកនិកាយ នៃព្រះរាជាណាចក្រកម្ពុជា សម្តេចព្រះសង្ឃនាយកស្តីទី សម្តេចសង្ឃ មន្ត្រីសង្ឃជាន់ខ្ពស់គ្រប់ឋានានុក្រម និងក្រោមព្រះរាជធិបតីភាពដ៏ខ្ពង់ខ្ពស់បំផុតរបស់ព្រះករុណា ព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ព្រមទាំងព្រះវត្តមាន វត្តមានដ៏ខ្ពង់ខ្ពស់ របស់ប្រមុខថ្នាក់ដឹកនាំកំពូលៗនៃស្ថាប័នជាតិ គឺសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា សម្តេចមហារដ្ឋសភាធិការបតី ឃួន សុដារី ប្រធានរដ្ឋសភា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី សម្តេចអគ្គមហាពញាចក្រី ហេង សំរិន ប្រធានកិត្តិយសក្រុមឧត្តមប្រឹក្សាផ្ទាល់ព្រះមហាក្សត្រ សម្តេចឧត្តមប្រឹក្សាផ្ទាល់ព្រះមហាក្សត្រ ថ្នាក់ដឹកនាំ មន្ត្រីរាជការ កងកម្លាំងប្រដាប់គ្រប់ប្រភេទមកពីគ្រប់ក្រសួង ស្ថាប័ន បណ្តាអង្គទូត ភ្ញៀវកិត្តិយសជាតិ អន្តរជាតិយ៉ាងច្រើនកុះករ។
ព្រះវិយោគកថា និងព្រះជីវប្រវត្តិសម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជ នៃព្រះរាជាណាចក្រកម្ពុជា អានដោយសម្តេចព្រះឧត្តមចរិយា ឈឹង ប៊ុនឈា អនុប្រធានថេរសភា នៃពុទ្ធសាសនា ព្រះចៅអធិការវត្តវិមានតេជៈ (ហៅវត្តស្រះចក) បាន រំលេចពីព្រះគុណូបការ:ដ៏ធំធេងរបស់ព្រះអង្គក្នុងព្រះពុទ្ធសាសនានៅកម្ពុជាដែលព្រះអង្គបានខិតខំលះបង់បូជាចូលរួមទាំងក្នុងវិស័យព្រះពុទ្ធសាសនា និងវិស័យអាណាចក្រឱ្យទទួលបានការរីកចម្រើនរហូតមកដល់សព្វថ្ងៃហើយក៏បានយាងចូលរួមក្នុងសកម្មភាពព្រះពុទ្ធសាសនាក្នុងព្រឹត្តិការណ៍ធំៗដើម្បីចែករំលែកផ្លាស់ប្តូរការផ្សព្វផ្សាយចំណេះដឹងផ្នែកព្រះពុទ្ធសាសនានៅលើឆាកជាតិ អន្តរជាតិផងដែរ។
សូមរម្លឹកផងដែរថា សម្ដេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស សម្ដេចព្រះមហាសង្ឃរាជ នៃព្រះរាជាណាចក្រកម្ពុជា បានយាងចូលព្រះទិវង្គត កាលពីថ្ងៃចន្ទ ២រោច ខែមាឃ ឆ្នាំថោះ បញ្ចស័ក ពុទ្ធសករាជ២៥៦៧ ត្រូវនឹងថ្ងៃទី២៦ ខែកុម្ភៈ ឆ្នាំ២០២៤ វេលាម៉ោង១៧:៤០នាទី នៅវត្តឧណ្ណាលោម រាជធានីភ្នំពេញ ក្នុងព្រះជន្ម៩៣ព្រះវស្សា ដោយព្រះជរាពាធ៕
