ពេជ្រដែលជារតនៈវត្ថុមានតម្លៃមួយនៅលើទីផ្សារទូទាំងពិភពលោក បានស្រុតចុះតម្លៃជាបន្តបន្ទាប់នៅ២ឆ្នាំចុងក្រោយនេះ ពោលគឺបានធ្លាក់ចុះរហូតដល់៣០%ឯណោះ។ ដោយសារតម្លៃវាស្រុតចុះខ្លាំងបែបនេះ អ្នកវិភាគឧស្សាហកម្មពេជ្រ បានបង្ហាញការព្រួយបារម្ភថា ពេជ្រអាចនឹងលែងមានតម្លៃនៅក្នុងការជូញដូនៅលើទីផ្សារអន្តរជាតិ។ តើមានកត្កាអ្វីធ្វើឱ្យតម្លៃពេជ្រលើពិភពលោកធ្លាក់ចុះជាបន្តបន្ទាប់តាំងពីឆ្នាំ២០២២?
សារព័ត៌មាន CNBC បានរាយការណ៍ថា សន្ទស្សន៍តម្លៃពេជ្រនៅលើទីផ្សារអន្តរជាតិ នៅដើមឆ្នាំនេះធៀបនឹងឆ្នំាមុនស្រុតចុះ៥,៧% ហើយបើធៀបនឹងឆ្នាំ២០២២ គឺបានស្រុតចុះដល់ទៅជាង៣០%ឯណោះ។ ចាប់តាំងពីមន្ទីរពិសោធន៍អាចមានសមត្ថភាពផលិតពេជ្រហើយដាក់ចូលទៅក្នុងទីផ្សារមក តម្លៃពេជ្រនៅលើពិភពលោកបានចាប់ផ្តើមមានការប្រែប្រួល សូម្បីតែតម្លៃពេជ្រដែលជាភោគទ្រព្យរ៉ែក៏មានការប្រែប្រួលដូចគ្នា។
ដោយសារតែតម្លៃពេជ្រស្រុតចុះ ហើយប្រជាប្រិយភាពរបស់វាកំពុងតែរសាត់ចេញពីចំណាប់ អារម្មណ៍របស់មនុស្សជាតិ លោក ប៉ូល ហ្ស៊ីនីស្គី (Paul Zimnisky) អ្នកវិភាគឧស្សាហកម្មពេជ្រឯករាជ្យមួយរូបបានអះអាងថា ស្ថានភាពនេះកំពុងធ្វើឲ្យក្រុមហ៊ុន De Beers ដែលជាក្រុមហ៊ុនពេជ្រដ៏ធំមួយរបស់ពិភពលោកកំពុងតែរង្គោះរង្គឺ។
នៅពេលនេះ ក្រុមហ៊ុន De Beers ដែលបានបង្កើតឡើងនៅក្នុងឆ្នាំ១៩៤៨ កំពុងតែប្រេះស្រាំ នៅក្នុងរចនាសម្ព័ន្ធដឹកនាំអាជីវកម្ម។ ក្រុមហ៊ុនស្រាវជ្រាវទីផ្សារ ដាស៊ូ ខនសាល់ធីង (Daxue Consulting) បាននិយាយថា ប្រជាប្រិយភាពរបស់ពេជ្រស្រុតចុះខ្លាំងណាស់ ហើយពលរដ្ឋដែលពេញនិយមប្រើប្រាស់ពេជ្រធ្វើគ្រឿងអលង្ការនៅចិន ក៏ដូចជាឥណ្ឌា ក៏កំពុងតែរសាយចិត្តពីវាផងដែរ។ ក្រុមហ៊ុននេះបានលើកឡើងថា ដើម្បីជំរុញទីផ្សារ ក្រុមហ៊ុន De Beers បានប្រកាសបញ្ចុះតម្លៃ១០% ប៉ុន្តែនៅតែមិនអាចធ្វើឲ្យតម្រូវការកម្រើកឡើងវិញបានឡើយ។
លោក ម៉ាសេឡូ អេស្គីវេល (Marcelo Esquivel) ប្រធានផ្នែកទំនាក់ទំនងរបស់ក្រុមហ៊ុន Anglo American ដែលជាភាគហ៊ុនសំខាន់មួយនៅក្នុងក្រុមហ៊ុន De Beers បាននិយាយថា តម្រូវការពេជ្របានធ្លាក់ចុះតាំងពីសេដ្ឋកិច្ចពិភពលោកដាំក្បាលចុះ ដោយសារតែការរីករាលដាលនៃមេរោគកូវីដ-១៩មកដល់ពេលនេះ និងកំណើននៃការផ្គត់ផ្គង់ពេជ្រដែលបង្កើតដោយមន្ទីរពិសោធន៍។
នៅឆ្នាំ២០១៧ ពេជ្រដែលដាំនៅក្នុងមន្ទីរពិសោធន៍មានចំណែកទីផ្សារត្រឹមតែ២%ទេ តែនៅឆ្នាំ២០២៣ គឺឡើងដល់១៨,៤%។ ទោះបីជាវាមានតម្លៃថោកជាងពេជ្រធម្មជាតិ ៨៥% ក៏ពិតមែន តែវាអូសទម្លាក់តម្លៃពេជ្រធម្មជាតិ ឲ្យធ្លាក់ចុះដូចគ្នាដែរ៕
