![ធនាគារកណ្ដាលឡាវ ដំឡើងអត្រាការប្រាក់កម្ចីដល់១០% ចំពេលសេដ្ឋកិច្ចកំពុងប្រឈមនឹងបញ្ហា](https://www.alynana.com/storage/untitled-1-recovered-recovered-recovered-recovered-recoveredjpg119.jpg)
ធនាគារកណ្ដាលនៃប្រទេសឡាវ (BOL) បានប្រកាសដំឡើងអត្រាការប្រាក់សម្រាប់កម្ចី រយៈពេលខ្លីពីជាង៨% ឱ្យឡើងដល់១០% ក្នុងមួយឆ្នាំ ដើម្បីឆ្លើយតបទៅនឹងការផ្លាស់ប្តូរសេដ្ឋកិច្ចទាំងក្នុងស្រុក និងពិភពលោក ដែលឆ្លុះបញ្ចាំងពីការខិតខំរបស់ធនាគារនេះក្នុងការដោះស្រាយបញ្ហាប្រឈមសេដ្ឋកិច្ចដែលកំពុងបន្តមានផងដែរ។ នេះបើតាមការចេញផ្សាយរបស់សារព័ត៌មាន Laotian Times។
ក្រោយពីមានការអនុម័តយល់ព្រមពីទេសាភិបាលធនាគារកណ្ដាលឡាវ លោក ប៊ុនលាវ ស៊ិនសាយវ៉ូរ៉ាវង់ (Bounleua Sinxayvoravong) ធនាគារនេះប្រកាសជូនដំណឹងជាផ្លូវកាលពីថ្ងៃទី១២ ខែមិថុនា ថា នឹងសម្រេចដំឡើងអត្រាការប្រាក់កម្ចីគោលឱ្យឡើងដល់១០% ក្នុង១ឆ្នាំ។
បើតាមតារាងអត្រាការប្រាក់ជាប្រវត្តិសាស្ត្ររបស់ធនាគារ BOL អត្រាការប្រាក់កម្ចីតិចជាងមួយសប្តាហ៍គឺ៧.៥% ក្នុង១ឆ្នាំគិតត្រឹមថ្ងៃទី១៣ ខែកុម្ភៈ ឆ្នាំ២០២៣។ បន្ទាប់មកអត្រានេះត្រូវបានកែសម្រួលឱ្យឡើងដល់៨.៥% កាលពីដើមខែមីនា។ ការកើនឡើងចុងក្រោយបំផុតដល់ ១០% នេះ គឺជាជំហានដ៏សំខាន់មួយនៅក្នុងកិច្ចខិតខំរបស់ធនាគារកណ្តាលឡាវ ដើម្បីដោះស្រាយស្ថានភាពសេដ្ឋកិច្ចបច្ចុប្បន្ន។
ការអនុម័តរបស់ធនាគារកណ្ដាលឡាវនេះត្រូវបានគេរំពឹងថា នឹងជះឥទ្ធិពលដល់វិស័យផ្សេងៗទៀត ជាពិសេសគឺប៉ះពាល់ដល់ការចំណាយលើកម្ចី យុទ្ធសាស្ត្របណ្ដាក់ទុន និងសកម្មភាពសេដ្ឋកិច្ចជារួមនៅក្នុងប្រទេសនេះ៕