នៅប៉ុន្មានខែចុងក្រោយនេះហាងឆេងមាសលើទីផ្សារអន្តរជាតិបានហក់ឡើងយ៉ាងខ្លាំង ប៉ុន្ដែកាលពីថ្ងៃម្សិលមិញនេះហើយមកទាល់ព្រឹកនេះហាងឆេងមាសបានចាប់ផ្ដើមធ្លាក់ថ្លៃយ៉ាងគំហុកក្រោយពីលោក Donald Trump ជាប់ឆ្នោតធ្វើជាប្រធានាធិបតីអាមេរិកម្ដងទៀត។
គិតត្រឹមព្រឹកនេះហាងឆេងមាសលើទីផ្សារធ្លាក់ថ្លៃចំនួន៩១ដុល្លារមកត្រឹម២,៦៤៩ដុល្លារក្នុងមួយអោន( ស្មើនឹង៣,១៩១ដុល្លារក្នុងមួយតម្លឹង)។
មូលហេតចម្បងដែលដាក់សម្ពាធឲ្យតម្លៃមាសចាប់ផ្ដើមដាំក្បាលចុះគឺដោយសារតែរងសម្ពាធពីប្រាក់ដុល្លារអាមេរិកនិងប័ណ្ណបំណុលរបស់សហរដ្ឋអាមេរិក។ ជាក់ស្ដែងប័ណ្ណបំណុលរយៈពេល១០ឆ្នាំរបស់អាមេរិកបានកើនឡើងចំនួន១៧ពិន្ទុ។ ចំណែកប្រាក់ដុល្លារអាមេរិកបានឡើងថ្លៃចំនួន១.៦%បើធៀបនឹងរូបិប័ណ្ណផ្សេងៗទៀត។
ជាធម្មតានៅក្នុងការជួញដូរលើទីផ្សារអន្តរជាតិនៅក្នុងទីផ្សារឧបករណ៍និស្សន្ទប្រាក់ដុល្លារត្រូវបានដាក់ឲ្យជួញដូរជាគូជាមួយមាសដូច្នេះបើប្រាក់ដុល្លារឡើងថ្លៃមាសនឹងធ្លាក់ថ្លៃ។ ចំពោះហាងឆេងមាសនៅស្រុកយើងវិញគិតត្រឹមព្រឹកនេះហាងឆេងមាសបានធ្លាក់មកត្រឹម៣២០ដុល្លារក្នុងមួយជី។
គួរបញ្ជក់ផងដែរមាសគឺជាទ្រព្យសុវត្ថិភាពដែលគេនិយមវិនិយោគឬទិញទុកនៅពេលពិភពលោកជួបបញ្ហាសេដ្ឋកិច្ច។ ជាពិសេសមាសគឺជាទ្រព្យដែលងាយស្រួលទិញលក់បំផុត។ ជាក់ស្ដែងប្រជាជនខ្មែរយើងចូលចិត្តទិញមាសទុកព្រោះវាជារបៀបសន្សំទ្រព្យហើយពេលពួកគាត់ជួបបញ្ហាត្រូវការលុយ ពួកគាត់អាចលក់មាសដោះស្រាយបញ្ហាភ្លាមៗ៕
