ភ្នំពេញ៖ កញ្ញា អ៊ិន លក្ខិណា និងលោក ឡៅ បញ្ញា នឹងក្លាយជាដៃគូតំណាងឱ្យកញ្ញាឯក និងបុរសឯករបស់កម្ពុជាដំបូង ចូលរួមប្រកួតអន្តរជាតិ Miss & Mister Supranational 2022 ក្រោយពីអ្នកទាំង ២ ក្លាយជាម្ចាស់ជយលាភីនៃកម្មវិធី Miss & Mister Supranational Cambodia 2022។
ស្រីស្រស់វ័យ ២០ ឆ្នាំ កញ្ញា អ៊ិន លក្ខិណា អតីតជាកញ្ញាឯកលំដាប់រងទី១ កញ្ញាឯកដ៏អស្ចារ្យនៃកម្ពុជា ឆ្នាំ ២០២១ (Miss Grand Cambodia 2021) និងជាម្ចាស់ជយលាភីកម្មវិធី Miss Supranational Cambodia 2022 លើកដំបូង ទើបតែគ្រងមកុដថ្មីតម្លៃ ១៥ ម៉ឺនដុល្លារ ពីក្រុមហ៊ុនរៀបចំ ដើម្បីចូលរួមការប្រកួតអន្តរជាតិ Miss Supranational 2022។
ឯបុរសរូបសង្ហាមានសាច់ដុំធំ រាងខ្ពស់ស្រឡះ មានកម្ពស់ ១,៨៥ ម៉ែត្រ វ័យ ២៤ ឆ្នាំ និងធ្លាប់កាន់តំណែងជាបុរសឯកលេខ ២ អាស៊ាន ឆ្នាំ ២០១៩ លោក ឡៅ បញ្ញា បានក្លាយជាជយលាភីបុរសឯកនៃ Mister Supranational Cambodia 2022 លើកដំបូង និងត្រៀមទៅប្រកួតអន្តរជាតិ Mister Supranational 2022។
អ្នកទាំង ២ នឹងក្លាយជាកញ្ញាឯក និងបុរសឯកផ្នែកសម្រស់តំណាងកម្ពុជាសម្រាប់ការប្រកួត Miss & Mister Supranational 2022 ដែលធ្វើនៅប្រទេសប៉ូឡូញ ក្នុងខែកក្កដា ឆ្នាំ ២០២២។
កញ្ញា អ៊ិន លក្ខិណា បានបង្ហើបពីការតាំងចិត្តខ្ពស់ ក្នុងនាមជាតំណាងឱ្យកម្ពុជាលើកដំបូងនេះថា៖ «ពួកយើងទាំង២នាក់នឹងដឹកដៃគ្នា នាំយកទង់ជាតិនៃប្រទេសកម្ពុជា បើកទំព័រប្រវត្តិសាស្ត្រនៃកម្មវិធីប្រកួតសម្រស់ដ៏ធំបំផុតលើពិភពលោក Miss & Mister Supranational 2022 យើងសូមសន្យាថា នឹងនាំយកមុខមាត់ប្រទេសកម្ពុជា បង្ហាញឱ្យពិភពលោកស្គាល់ថា នេះជាបុរសឯក និងកញ្ញាឯកប្រទេសកម្ពុជា ដែលពោរពេញទៅដោយសមត្ថភាពចំណេះដឹង ភាពក្លាហានព្រមទាំងភាពថ្លៃថ្នូរ ដែលរក្សាបាននូវវប្បធម៌ និងអរិយធម៌នៃសាវតាររបស់ខ្លួនទៀតផង»។
គួរគូសបញ្ជាក់ថា កញ្ញា អ៊ិន លក្ខិណា ត្រូវបានក្រុមហ៊ុនរៀបចំ កម្មវិធីប្រកួត Miss Supranational Cambodia រើសកញ្ញាជាបេក្ខនារីតំណាងឱ្យកម្ពុជាដំបូង សម្រាប់កម្មវិធីថ្មីសន្លាងមួយនេះ។ កញ្ញា អ៊ិន លក្ខិណា នឹងត្រូវចូលរួមការប្រកួតអន្តរជាតិលើកទី១៣ ឈ្មោះ Miss Supranational 2022 ធ្វើនៅប្រទេសប៉ូឡូញ ក្នុងខែកក្កដា ឆ្នាំ ២០២២ ខាងមុខនេះ។
តារាសម្តែង ម៉ូដែល ដែលធ្លាប់ចំណាយពេលជិត ១០ ឆ្នាំ ហាត់គុនល្បុក្កតោ លោក ឡៅ បញ្ញា ក្លាយជាម្ចាស់ជយលាភី Mister Supranational Cambodia2022 នៅវគ្គផ្តាច់ព្រ័ត្រ កាលពីខែមីនា៕
