![ឥណ្ឌានឹងកាត់បន្ថយពន្ធលើការនាំចូលទូរសព្ទដៃរបស់ Apple ៥% តើមកពីមូលហេតុអ្វី?](https://www.alynana.com/storage/28-3.jpg)
ប្រទេសឥណ្ឌា បានប្រកាសថា ខ្លួននឹងកាត់បន្ថយពន្ធនាំចូលលើទូរសព្ទដៃ និងផ្នែកសំខាន់ៗមួយចំនួនពី២០% មកនៅត្រឹម១៥% ដែលជាការផ្លាស់ប្តូរមួយ ដើម្បីផ្តល់ប្រយោជន៍ដោយផ្ទាល់ដល់ក្រុមហ៊ុន Apple ដែលបានបន្តនាំចូលទូរសព្ទស្មាតហ្វូនស៊េរីទំនើបចូលក្នុងប្រទេសនេះ បើទោះបីជាមានការបង្កើនផលិតកម្មក្នុងស្រុកក៏ដោយ។ នេះបើតាមការចេញផ្សាយរបស់សារព័ត៌មានធំៗជាច្រើន។
នាបទបង្ហាញពីស្ថានភាពថវិកាប្រចាំឆ្នាំ២០២៤ និង២០២៥ នៅក្នុងសភា កាលពីពេលថ្មីៗ រដ្ឋមន្ត្រីហិរញ្ញវត្ថុឥណ្ឌា លោកស្រី នីម៉ាឡា ស៊ីថារ៉ាម៉ាន (Nirmala Sitharaman) បានលើកឡើងថា រដ្ឋាភិបាលឥណ្ឌានឹងកាត់បន្ថយពន្ធលើការនាំចូលទូរសព្ទដៃ បន្ទះសៀគ្វី និងឆ្នាំងសាកថ្មទូរសព្ទពី២០% មកនៅត្រឹម១៥% ដោយសារប្រជាពលរដ្ឋមានចំណង់ចំណូលចិត្តខ្ពស់លើផលិតផលទាំងនេះ។
លោក នែល សា (Neil Shah) សហស្ថាបនិករបស់ក្រុមហ៊ុនស្រាវជ្រាវ Counterpoint Research ដែលមានមូលដ្ឋាននៅទីក្រុងហុងកុង បានអះអាងថា ក្រុមហ៊ុន Apple បាននាំចូលទូរសព្ទ iPhone ចន្លោះពី១០ ទៅ១២% ទៅកាន់ប្រទេសឥណ្ឌាជារៀងរាល់ឆ្នាំ ហើយការកាត់បន្ថយពន្ធ៥% លើផលិតផលទាំងនេះ វានឹងផ្តល់ប្រយោជន៍ប្រចាំឆ្នាំប្រហែល៤៥លានដុល្លារដល់ក្រុមហ៊ុននេះ។
ទោះបីជាក្រុមហ៊ុន Apple បានជំរុញផលិតកម្មរបស់ខ្លួនក្នុងប្រទេសឥណ្ឌា តាមរយៈក្រុមហ៊ុន ផលិតជាប់កិច្ចសន្យាដូចជាក្រុមហ៊ុន Foxconn និងក្រុមហ៊ុន Tata Group របស់ឥណ្ឌាក៏ដោយ ក៏ក្រុមហ៊ុននេះនៅតែបន្តនាំចូលទូរសព្ទ iPhone ម៉ូឌែល Pro និង Pro Max ស៊េរីខ្ពស់មួយចំនួនចូលទៅកាន់ទីផ្សារឥណ្ឌា។ លោក សា បាននិយាយថា វិធានការថ្មីនេះ ក៏នឹងកាត់បន្ថយពន្ធនាំចូលសម្រាប់តួអង្គថ្មីៗទៀត ដែលបានចូលមកក្នុងទីផ្សារនៅឥណ្ឌា រួមទាំងក្រុមហ៊ុនកូរ៉េខាងត្បូង សាំស៊ុង ផងដែរ៕