អាមេរិក៖ យោងតាមសារព័ត៌មាន Reuters ឲ្យដឹងថា សហរដ្ឋអាមេរិកបានរាយការណ៍ថា មានករណីឆ្លងថ្មីនៃជំងឺ COVID-19 ចំនួន ៥៦.៣០០នាក់កាលពីថ្ងៃព្រហស្បតិ៍ ជាថ្ងៃទី៣ ដែលអត្រាឆ្លងប្រចាំថ្ងៃហក់ឡើងខ្ពស់ ជាបន្តបន្ទាប់យ៉ាងហោចណាស់ ៥៥.០០០នាក់។
ខណៈរដ្ឋកាលីហ្វ័រញ៉ា រដ្ឋហ្វ្លរីដា និងរដ្ឋតិចសាសបានបំបែកកំណត់ត្រាថ្មី ក្តីសង្ឃឹមកំពុងថមថយសម្រាប់គូប្រជែងសេដ្ឋកិច្ច ហើយភាគហ៊ុនអាមេរិកបានធ្លាក់ចុះប្រហែល ១% ដោយសារវិនិយោគិនបារម្ភថា វិធានការបិទរដ្ឋមួយផ្សេងទៀតនឹងធ្វើឱ្យអាជីវកម្មធ្លាក់ចុះ។
ក្រៅពីរដ្ឋដែលមានចំនួនប្រជាជនច្រើនបំផុតទាំង៣ ខាងលើ ករណីឆ្លងបានកើនឡើងខ្ពស់នៅរដ្ឋអាឡាបាម៉ា, រដ្ឋម៉ុនតាណា និងរដ្ឋវីសខន់សិនបានកត់ត្រានូវការកើនឡើងខ្ពស់បំផុត ក្នុងរយៈពេលមួយថ្ងៃរបស់ខ្លួនដែលមិនធ្លាប់មានកាលពីថ្ងៃព្រហស្បតិ៍។
ការឆ្លងកំពុងកើនឡើងខ្លាំងនៅក្នុងរដ្ឋចំនួន ៤១ ក្នុងចំណោមរដ្ឋទាំង ៥០ នេះបើយោងតាមការតាមដានរបស់ទីភ្នាក់ងារព័ត៌មានរ៉យទ័រ សម្រាប់រយៈពេល ២សប្ដាហ៍កន្លងមកនេះបើប្រៀបធៀបជាមួយនឹងរយៈពេល ២សប្ដាហ៍មុន។ កាលពីថ្ងៃពុធសហរដ្ឋអាមេរិកបានកត់ត្រា នូវករណីឆ្លងកើនឡើងដ៏ខ្ពស់បំផុតរបស់ខ្លួនរហូតដល់ ៦០.៥៤១នាក់ក្នុងរយៈពេលតែមួយថ្ងៃប៉ុណ្ណោះ។
សហរដ្ឋអាមេរិកបានរាយការណ៍ថា មានករណីជាង ៣លាន ២សែននាក់ និងជាង ១៣៥.០០០នាក់បានស្លាប់ដោយសារវីរុសកូរ៉ូណា ដែលធ្វើឱ្យពលរដ្ឋអាមេរិកមួយចំនួនស្ទាក់ស្ទើរ ក្នុងការវិលត្រឡប់ទៅកាន់ទីសាធារណៈ និងធ្វើអាជីវកម្មផ្សេងៗ បើទោះបីជាលោកប្រធានាធិបតី ដូណាល់ ត្រាំ ប្រឹងប្រែងសម្រាលហានិភ័យក៏ដោយ៕
