អាមេរិក៖ ចំនួនអ្នកឆ្លងវីរុសកូរ៉ូណានៅក្នុងទឹកដីសហរដ្ឋអាមេរិក បានកើនឡើងដល់ជាង ៣លាននាក់កាលពីថ្ងៃពុធ ខណៈដែលលោកប្រធានាធិបតី Donald Trump បានចាប់ផ្ដើមដកប្រទេសនេះចេញពី អង្គការសុខភាពពិភពលោក។
សហរដ្ឋអាមេរិកនៅតែជាប្រទេសរងផលប៉ះពាល់ធ្ងន់ធ្ងរជាងគេបំផុត ដែលមានអ្នកស្លាប់ចំនួន ១៣១,០០០នាក់ ចំណែកប្រទេសប្រេស៊ីលដែលប្រធានាធិបតីរបស់ប្រទេសនេះ គឺលោក Jair Bolsonaro បានធ្វើតេស្តវិជ្ជមានជំងឺនេះ និងជាប្រទេសដែលមានអ្នកឆ្លងខ្ពស់ជាងគេបំផុតលំដាប់ទី២ មានអ្នកស្លាប់ជិត ៦៧,០០០នាក់ និងអ្នកឆ្លងមានជាង ១លាន ៧សែនាក់។ ទោះបីជាយ៉ាងនេះក្ដីទាំងលោក Trump ទាំងលោក Bolsonaro បានបន្តជំទាស់ទៅនឹងវិធានការបិទប្រទេស និងការរឹតបន្តឹងផ្សេងៗដែលបង្ហាញពីការខ្វែងគំនិតគ្នាកាន់តែខ្លាំង ពាក់ព័ន្ធការឆ្លើយតបទៅនឹងវីរុសនេះ។ កាលពីថ្ងៃពុធលោក Trump បានអំពាវនាវឲ្យសិស្សានុសិស្ស ត្រឡប់ទៅសាលារៀនវិញនៅរដូវស្លឹកឈើជ្រុះ បើទោះបីជាករណីឆ្លងវីរុសនេះកំពុងកើនឡើង នៅក្នុងរដ្ឋធំៗមួយចំនួនក៏ដោយ៕
