ក្រុមហ៊ុនរថយន្តជប៉ុន Honda Motor នៅថ្ងៃពុធទី ២៦ ខែមេសា ឆ្នាំ២០២៣នេះ បានបង្ហាញឱ្យដឹងថា ខ្លួនបានឈានដល់កិច្ចព្រមព្រៀងសហប្រតិបត្តិការជាយុទ្ធសាស្រ្តជាមួយក្រុមហ៊ុនផលិតបន្ទះឈីបតៃវ៉ាន់ Taiwan Semiconductor Manufacturing Co (TSMC) ដែលជាផ្នែកមួយនៃជំហានទទួលបានបន្ទះឈីបដោយស្ថិរភាព។
លោក Toshihiro Mibe ជានាយកប្រតិបត្តិបាននិយាយបែបនេះនៅក្នុងសន្និសីទសារព័ត៌មានមួយ។ លោកបានដាក់ចេញនូវយុទ្ធសាស្ត្រអាជីវកម្មរបស់ក្រុមហ៊ុនផលិតរថយន្ត Honda ថា ក្រុមហ៊ុននឹងបង្កើតទំនាក់ទំនងផ្ទាល់ជាមួយអ្នកផលិតបន្ទះឈីបសម្រាប់ការផ្គត់ផ្គង់បន្ទះឈីប ដែលមានស្ថេរភាពរយៈពេលវែង។លោក Mibe បាននិយាយថា “ក្រុមហ៊ុន Honda នឹងធ្វើការយ៉ាងជិតស្និទ្ធជាមួយគ្នាជាមួយអ្នកផ្គត់ផ្គង់លំដាប់ទី ១ និងអ្នកផលិតបន្ទះឈីប ឬហៅថា semiconductor ហើយឆ្ពោះទៅមុខជាមួយនឹងជំហានយ៉ាងខ្លាំង” ដោយបន្ថែមថាវាបានឈានដល់កិច្ចព្រមព្រៀងជាមូលដ្ឋានស្តីពីកិច្ចសហការជាយុទ្ធសាស្រ្តហើយ។
នាយកប្រតិបត្តិ Shinji Aoyama បាននិយាយថា ក្រុមហ៊ុនរំពឹងថានឹងចាប់ផ្តើមទទួលផលផ្លែផ្កា ពីការចងសម្ព័ន្ធភាពជាមួយ TSMC ចាប់ពីឆ្នាំហិរញ្ញវត្ថុឆ្នាំ ២០២៥ខាងមុខ ។ ក្រុមហ៊ុន Honda ក៏បាននិយាយដែរថា ខ្លួនគ្រោងនឹងបង្ហាញរថយន្តអគ្គិសនីថ្មីចំនួន ៤ ម៉ូដែល (EV) នៅប្រទេសជប៉ុននៅឆ្នាំ ២០២៦ផងដែរ៕
