គិតត្រឹមវេលាម៉ោង ៧ព្រឹក ថ្ងៃទី ១៣ ខែសីហា ឆ្នាំ២០២០ នេះ កម្ពុជារកឃើញករណីវិជ្ជមានកូវីដ ១៩ ថ្មី ចំនួន ០៤នាក់ និងជាសះស្បើយចំនួន ០៣នាក់នេះបើយោងតាមសេចក្តីប្រកាសរបស់ក្រសួងសុខាភិបាលនៅព្រឹកនេះ។
គួរបញ្ជាក់ថា អ្នកជំងឺកូវីដ ១៩ ថ្មីទាំង ០៤ នាក់ ជាបុរសជនជាតិខ្មែរទាំង ៤នាក់ ដែល ៣ នាក់មានអាស័យដ្ឋានមកពីសៀមរាប បាត់ដំបង និងភ្នំពេញ ជាអ្នកដំណើរមកពីតាមជើងហោះហើរពីប្រទេសរុស្ស៊ី តាមជើងហោះហើរឆ្លងកាត់ប្រទេសម៉ាឡេស៊ី ទទួលបាលតេស្តអវិជ្ជមានកូវីដ ១៩ ចំនួន ២ដង មកដល់កម្ពុជានៅថ្ងៃទី ១៩ ខែកក្កដា ឆ្នាំ ២០២០ ស្នាក់នៅក្នុងមណ្ឌលចត្តាឡីស័កខេត្តកំពង់ស្ពឺ ដើម្បីធ្វើចត្តាឡីស័ក ១៤ ថ្ងៃ ទទួលបាលតេស្តលើកទី ៦ នៅថ្ងៃទី ១២ ខែសីហា មានវិជ្ជមានកូវីដ ១៩ ហើយបច្ចុប្បន្នត្រូវបានដាក់ឱ្យសម្រាកព្យាបាលនៅមណ្ឌលសុខភាពបង្អែកខេត្តកំពង់ស្ពឺ។ អ្នកជំងឺជាបុរសជនជាតិខ្មែរ ០១ នាក់ទៀត មានអាស័យដ្ឋាននៅខេត្តត្បូងឃ្មុំ ជាអ្នកដំណើរមកពីតាមជើងហោះហើរពីប្រទេសឥណ្ឌូនេស៊ី មកដល់កម្ពុជានៅថ្ងៃទី ២៣ ខែកក្កដា ឆ្នាំ ២០២០ ទទួលបាលតេស្តលើកទី ៥ មានវិជ្ជមានកូវីដ ១៩ នៅថ្ងៃទី ១២ ខែសីហា ហើយបច្ចុប្បន្នត្រូវបានដាក់ឱ្យសម្រាកព្យាបាលនៅមន្ទីរពេទ្យព្រះនរោត្តមសីហនុ ខេត្តត្បូងឃ្មុំ។ ចំណែកឯអ្នកជំងឺជាសះស្បើយទាំង ៣ នាក់ ជាជនជាតិខ្មែរ ជាអ្នកដំណើរមកពីតាមជើងហោះហើរពីប្រទេសរុស្ស៊ី តាមជើងហោះហើរឆ្លងកាត់ប្រទេសម៉ាឡេស៊ី ទទួលបានលទ្ធផលតេស្តអវិជ្ជមានកូវីដ ១៩ ចំនួន ២ដង និងត្រូវបានអនុញ្ញាតឱ្យចេញពីំមណ្ឌលសុខភាពចាក់អង្រែរ រាជធានីភ្នំពេញ។
សូមជម្រាបថា រហូតមកដល់បច្ចុប្បន្ន កម្ពុជាមានចំនួនករណីវិជ្ជមានកូវីដ១៩ សរុប ២៧២ ករណីទូទាំងប្រទេស ព្យាបាលជាសះស្បើយសរុប ២២៣ ករណី អ្នកជំងឺកំពុងសម្រាកព្យាបាលនៅមន្ទីរពេទ្យរដ្ឋ និងឯកជននៅសល់សរុបចំនួន ៤៩ ករណី និងមិនមានករណីស្លាប់ទេ។
សូមអានខ្លឹមសារលម្អិតនៃសេចក្តីប្រកាសខាងក្រោម៖
